Embo ndi Ombeibela mbi i tu honga na indi Ombeibela mbi i honga, omambo yemwe. Oviungurisiwa vyetu vyokuzuvarisa aviyevari mbi, vi honga ouatjiri momuano umwe na mongongorasaneno imwe. Posi yokutja embo ndi Ombeibela mbi i tu honga ri ungurisa omambo omapupu nomakahururiro omapupu. Oro ra ungurirwa imba mbe muna ouzeu okuzuva nawa embo ndi Ombeibela mbi i honga. Moruveze rwoviweziwako, embo ndi Ombeibela mbi i tu honga, ri nomambo wokehi nge yandja omakahururiro omapupu womambo tjiva nomapu tjiva nge ri momakondwa. Omakondwa kaye utu nomapuriro nu kaye nokaongo komapuriro. Posi yokutja ye yanda nouatjiri wOmbeibela mbwa kahururwa mekondwa. Tjimuna tji peri ohunga nembo ndi Ombeibela mbi i honga, embo ndi Ombeibela mbi i tu honga mari yenene okuyandjwa ngamwa oruveze, nandarire kutja kari raisirwe otjembo ndi mari sokuyandjwa omueze mbo. Omomuano uṋe mbu matu yenene okuungurisa embo ndi Ombeibela mbi i tu honga indu tji matu rihongo Ombeibela kuna ovandu?

OMAKAHURURIRO: Kovandu ovengi, omuhingo wetu wokulesa oparagrafa membo ndi Ombeibela mbi i honga nokupura omapuriro otjiṋa tji tji ungura nawa tjinene. Indu omuhongwa tje ha tjiwa nawa eraka poo tje ha tjiwa okulesa nawa matu sokutjita vi? Mongaro otja indjo, eṱe matu yenene okuungurisa embo ndi Ombeibela mbi i tu honga. Okuzambo omakahururiro nge ri komaandero wekondwa matu yenene okuungurisa okukonḓonona Ombeibela ku nomuhongwa, nomuhongwa ma yenene okutunduuzwa okulesa ekondwa omuini. Orupa aruhe rouatjiri wOmbeibela maru yenene okukambura ozominute ape 15. Mena rokutja omakahururiro nga kaye kara noviṋa mbi ri mekondwa, ingwi ngu ma hongo ma sokurirongerisa nawa ame ripurire kovihepwa vyomuhongwa. Ingwi ngu ma hongo tji ma ungurisa ekondwa momakonḓonona we wOmbeibela kuna omundu, okutja omakahururiro nge ri komaandero wekondwa maye yenene okuungurisiwa otja omapuriro wokurizemburukisa.

OMAMBO WOKEHI: Omambo nomapu nge ri momambo wokehi ye ri mongongorasaneno mu ye munika mekondwa rembo. Omundu ngu ma hongo ma yenene okutya kutja ma vanga okuhungirira komambo wokehi membo ndi Ombeibela mbi i tu honga ngunda ame rihongo kuna omuhongwa poo indee.