Okutunga ondjuwo ondjapuke yaMuhona moIsrael aaku hepa ovimariva nokuungura oukukutu. Posi yokutja, Ovaisrael va yandja oruvara nonḓero yatjiri kotjiungura hi. (1Ekuruh 29:2-9; 2Ekuruh 6:7, 8) Ondjuwo ondjapuke tji ya manuka okutungwa, omaṱunino Ovaisrael ngu va tjita aaye raisa ongamburiro yawo poo okuhina ongamburiro kwawo. (2Ozomb 22:3-6; 2Ekuruh 28:24; 29:3) Kundino, Ovakriste ve ungura oukukutu okutunga, okukohorora, nokuṱuna Omatuwo wOmerikotameneno nowOmaworonganeno omanene. Nu okuungura puna Jehova momuano mbwi tjiri ondjingonekero onene nu orupa rwotjiungura tjetu otjiyapuke.—Eps 127:1; Omavan 7:15.

• Mokukohorora kombunda yombongarero aihe. Ndovazu konokuyenena okukohorora, toora ondova ndji ri ongondoroka noruveze pu wa haama.

• Mokukara norupa momakohororero nomaṱunino wEtuwo rOmerikotameneno aruhe. Omake omengi ye sora oviungura nu ye eta ondjoroka.—lv 92-93 opar. 18.

• Mokuyandja ombatero yotjimariva. Nandarire okuyandja “oumariva uvari wongoporo mbu nonḓengu yosenta imwe” okuza komutima, ku yorokisa omutima waJehova.—Mar 12:41-44.

• Mokuriyandjera okuvatera okutunga nokuṱuna otuveze twomerikotameneno ozongaro zoye tji maze ku yandjere okutjita nao. Kona okuhepa okukara nondjiviro yokutunga kutja u kare norupa motjiungura hi.