EHUNGI 110

Timoteus, omuvatere waPaulus omupe

OMURUMENDU omutanda ove ngu mo munu mba puna Paulus oTimoteus. Timoteus aa kara pu neṱunḓu re moListra. Ena raina oEunike nu indi oraina mukurukaze oLois.

Ihi otjikando otjitjatatu ku Paulus okuyekuryanga koListra. Ape ombura imwe poo nao rukuru, Paulus na Barnabas rutenga ve ere ngwi mouyenda wokuzuvarisa. Nu nambano Paulus wa kotoka rukwao pu nepanga re Silas.

Ove mo tjiwa kutja Paulus ma tja vi ku Timoteus? Eye we mu pura na tja: ‘Ove mo vanga okuyenda puna ami na Silas? Eṱe matu hepa ombatero yoye okukazuvarisira oviwaṋa mbi ri kovirongo vyokokure.’

Timoteus we mu zira na tja: ‘Ami me vanga okuyenda.’ Okutja tjimanga kombunda yanao Timoteus wa isa eṱunḓu re na i puna Paulus na Silas. Nungwari ngunda atu hiye rihonga ohunga nouyenda wawo, indjeye tu konḓonone imbi mbya tjitwa ku Paulus. Nai pa kapita ozombura ape 17 kombunda yaindu Jesus tje rimunikisa ku ye mondjira okuyenda koDamaskus.

Zemburuka kutja Paulus we ya koDamaskus okuyekutatumisa ovahongewa vaJesus, nungwari nai eye omuini omuhongewa we! Kombunda yanao tjiva vovanavita va tya okuzepa Paulus mena rokutja owo kaave vanga kutja ma honge ohunga na Jesus. Nungwari ovahongewa va vatera Paulus okuhena. Owo ve mu twa motjimbamba nave mu herurire pendje yekuma rotjihuro.

Okuzambo Paulus wa ya koAntiokie okukazuvarisa. Imba ovahongewa vaJesus opu va uta okuisanewa Ovakriste. Paulus na Barnabas okuzambo va hindwa okuza koAntiokie mouyenda wokukazuvarisa komahi wokokure. Tjimwe tjovihuro owo ku va ire oListra, mu mwa turire Timoteus.

Kombunda yombura ape imwe, Paulus wa kotoka koListra mouyenda outjavari. Ove mo tjiwa kutja Timoteus tja ya puna Paulus na Silas, owo va ya pi? Tara kotjikarata tjehi, nu indjo tu rihonge omahi tjiva.

Rutenga owo va ya kotjihuro tjopopezu tjena Ikonium, okuzambo ave i kotjihuro otjitjavari tjena Antiokie. Kombunda yanao va ya nga kotjihuro Troas, okuzambo ave i koFilipi, Tesalonika na Berea. Otjihuro Atene mo tji munu motjikarata? Paulus wa zuvarisa ombuze ngo. Kombunda yanao owo va kara ombura nohinga amave zuvarisa mu Korinte. Korusenina va kakurama ousupi moEfesus. Okuzambo va kotoka motjiyaha tjomomeva koSesarea, nave kayenda nga koAntiokie, Paulus ke kara.

Okutja Timoteus wa kayenda ozokilometa omasere nomasere ama vatere Paulus okuzuvarisa “ombuze ombwa” nokuuta ozombongo ozengi zOvakriste. Indu ove tji wa rire omunene, mo rire omukarere omuṱakame waMukuru tjimuna Timoteus po?

Oviungura 9:19-30; 11:19-26; ekondwa 13 ngandu kekondwa 17; 18:1-22.

Omapuriro womakonḓononeno

[Map]

(For fully formatted text, see publication)

Roma

Malta

Tesalonika

Berea

Korinte

Filipi

Atene

Krete

Troas

Efesus

Milete

Kolose

Antiokie

Ikonium

Listra

Antiokie

Siprus

Damaskus

Sesarea

Jope

Jerusalem

OKUVARE OKUNENE

(OKUVARE KOPOKATI)