Ena raMukuru ri tjangwa nomaposapamwe yane wOtjiheberi nga יהוה (YHWH) nu ri munika povikando ape 7 000 mOmatjangwa wOtjiheberi. Omaposapamwe yane ngo ye kuramena po ena ndi “Jehova,” nu ye isanewa o-Tetragrammaton mOtjiheberi. Ena ndo eena ndi ungurisiwa tjinene mOmbeibela. Nandarire kutja ovatjange vOmbeibela ovengi tji mave hungire ohunga na Mukuru aave ungurisa omaisaneno wondjozikiro tjimuna “Omunamasaaehe,” “Owokombandambanda,” na “Muhona,” omaposapamwe wo-Tetragrammaton aaye ungurisiwa okukuramena po ena raMukuru omuini.

Jehova Mukuru ongwa hinga ovatjange vOmbeibela kutja ve ungurise ena re. Okutara kotjihorera, eye wa hinga omuprofete Joel okutjanga kutja: “Auhe ngu ma isana ena raJehova ma hupisiwa.” (Joel 2:32, NW) Mukuru wina wa hinga omutjange wEpsalme umwe okutjanga kutja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.” (Epsalme 83:19, EEP) Ena raMukuru ri munika povikando ape 700 membo rOmapsalme ariyerike, oro ndi ri embo romiimbo mbyaavi sokuimburwa nokuserekarerwa kotjiwaṋa tjaMukuru. Nu hapo ongwaye ena raMukuru tji ra isamewa mOzombeibela ozengi? Ongwaye Ombeibela ndji o-New World Translation tji i ungurisa ena ndi “Jehova”? Nu ena ndi Jehova ri heya tjike?

Ongwaye ena raMukuru tji ra isamewa mOzombeibela ozengi? Omaziriro kepuriro ndi ya panguka. Tjiva ve muna kutja Mukuru Omunamasaaehe kahepa okukara nena rapeke kutja ma tjiukwe. Varwe ve munika aayo va yakura otuzo twOvajuda tu tu tjaera okuungurisa ena raMukuru, ngahino mena rokutira kutja ngaave zunḓa ena re. Nu varwe ve muna kutja tjinangara kape nomundu ngu ma tjiwa nawa kutja ena raMukuru ri isanewa vi, okutja ma rire nawa okuungurisa omaisaneno wondjozikiro tjimuna “Muhona” poo “Mukuru.” Omapu otja ingo kaye nongurameno, mena romapu ngu maye kongorere mba:

• Imba mbe muna kutja Mukuru Omunamasaaehe kahepa okukara nena rapeke kutja ma tjiukwe, ve nakaura ouatjiri oukahu wokutja  ena raMukuru aari munika motupa otukuru twOmbeibela, tjimuna itwi tu twa ri ko komurungu waKristus. Otja tji pa raisiwa pomautiro, Mukuru ongwa tjita kutja ena re ri tjangwe mEmbo re povikando ape 7 000. Pu mape hee kutja eye u vanga kutja tu tjiwe ena re nu tu riungurise.

• Ovatoroke mbe isa mo ena raMukuru mOmbeibela mena rotuzo twOvajuda ve nakaura ouatjiri ounanḓengu. Nandarire kutja ovatjange tjiva vOvajuda kaave vanga okutamuna ena raMukuru, owo kave na pu va isa mo ena ndo mOzombeibela zawo. Ena ndo aari munika potuveze otuingi momambo omakuru omamangwa nga vazewa mo-Qumran popezu nOmurongawomongwa. Ovatoroke tjiva vOmbeibela va raisa kutja ena raMukuru aari munika momatjangwa omatengatenga, nu ve ripingenisa nomaisaneno wondjozikiro nga “MUHONA,” nga tjangwa momambo omanene. Posi yokutja pe nepuriro rokutja, Ongwaye ovatoroke mba tji va muna kutja mave sokupingenisa poo okuisamo ena raMukuru mOmbeibela ngunda ave itavera kutja aari munika povikando omayovi omengi mOmbeibela? Owaṋi ngwe ve pa ousemba wokutjita omarundurukiro ngo? Owo oveni ombu mave yenene okuzira epuriro ndo.

• Imba mbe tja ena raMukuru kari sokuungirisiwa mena rokutja kari tjiukwa nawa kutja ri sokuisanewa vi, kave tira okuungurisa ena raJesus. Omuano ovahongewa vaJesus veserewondo etenga maave isana ena raJesus wa panguka komuano Ovakriste ovengi ndino mu ve isana ena ndo. KOvakriste mba ri Ovajuda ena raJesus ngahino aari isanewa Yeshua. Nu omaisaneno nga “Kristus” ngahino aaye isanewa otja Mashiach poo “Messias.” Ovakriste mbaave hungire Otjigrike aave mu isana Iesous Khristos, nu Ovakriste mbaave hungire Otjilatina aave mu isana Iesus Christus. Kehi yombepo ondjapuke omatorokero wena re mOtjigrike ya tjangwa mOmbeibela nu ihi otjiraisiro tjokutja Ovakriste veserewondo etenga va toora omukambo omusemba wokuungurisa omuano womaisaneno wena ndo mbwaau tjiukwa meraka rawo. Momuano otjingewo, Okomiti yomatorokero wOmbeibela ndji o-New World Translation ya muna kutja ondunge ombwa okuungurisa omaisaneno nga “Jehova,” nandarire kutja imbwo kaamuano ena raMukuru maari isanewa mOtjiheberi tjaatji ungurisiwa rukuru.

Ongwaye Ombeibela ndji o-New World Translation tji i ungurisa ena ndi “Jehova”? Ozoleṱera ine zOtjiheberi nḓe isanewa o-Tetragrammaton (יהוה), mOtjiingirisa ze kuramenwa po i omaposapamwe nga YHWH. Otja tji pa ri momambo aehe omakuru wOtjiheberi, o-Tetragrammaton kaai tjangwa nomapose. Indu Otjiheberi otjikuru tjaatji ungurisiwa, ovalese aave weza omapose ngu maye heperwa po.

Ozombura ape 1 000 kombunda ya indu Omatjangwa wOtjiheberi tji ya manuka okutorokwa, ovahongwa vOvajuda va zikamisa omiano vyomaisaneno poo oviraisiro mbi mavi ve vatere okutjiwa kutja omapose yeṋe ngu mave sokuungurisa tji mave lese Otjiheberi.  Nungwari oruveze ndwo, Ovajuda ovengi va ri novizerika mbyaavi tjaere okutamuna ena raMukuru, okutja owo va pingenisa ena ndo ku nomaisaneno warwe. Kunao, pe munika aayo indu tji va toroka o-Tetragrammaton, owo va waneka omapose womaisaneno ngu va pingenisa na wo ena raMukuru ku nomaposapamwe ngaaye kuramene po ena raMukuru. Okutja omambo nga tjangwa nomapose ngo kaye tu vatere okutjiwa nawa kutja ena ndi aari isanewa vi mOtjiheberi. Tjiva ve muna kutja ena ndo aari isanewa otja “Yahweh,” ngunda varwe ave noumune mbwa panguka. MEmbo emangwa rOmurongawomongwa mu mwa ri orupa rwembo raLevitikus mOtjigrike, ena ndo ra torokerwe otja lao. Pendje nomuano womatorokero mbwo, ovatjange vOtjigrike ovakuru ve tja ena ndo aari isanewa otja lae, labe na laoue. Nungwari kamaatu tja otjinga peri tjiri. Orondu katu nakutjiwa kutja ovakarere vaMukuru ena re aave riisana vi mOtjiheberi. (Genesis 13:4; Eksodus 3:15) Posi yokutja matu tjiwa nawa kutja Mukuru aa ungurisa ena re povikando ovingi indu tjaa hungire ku novakarere ve, ngandu owo tjaave mu isana kena ndo nu aave ungurisa ro noupupurukwe indu tjaave hungire ku novandu varwe.—Eksodus 6:2; 1 Ozombara 8:23; Epsalme 99:9.

Nu hapo ongwaye Ombeibela ndji o-New World Translation tji i ungurisa ena ndi “Jehova”? Mena rokutja omuano womaisaneno wena raMukuru mbwi ombwa ungurisiwa oure wozombura ozengi meraka rOtjiingirisa.

Otjikando otjitenga ena raMukuru tji ra uta okuungurisiwa mOmbeibela yOtjiingirisa ya ri mombura ndji 1530 momatorokero waWilliam Tyndale womambo yetano omatenga wOmbeibela. Eye wa tjanga ena ndo otja “Iehouah.” Otja oruveze tjaaru kayenda eraka rOtjiingirisa ra runduruka nu omuano ena raMukuru maari tjangwa wina wa runduruka. Okutara kotjihorera, mombura ndji 1612 Henry Ainsworth wa ungurisa  omatorokero nga “Iehovah” indu tja toroka embo rOmapsalme. Okuzambo mombura ndji 1639, eye wa ungurisa omatorokero nga “Jehovah,” indu tja tjita omarundurukiro komatorokero we omatenga nu aye pirindwa pu nomambo yetano omatenga wOmbeibela. Mombura ndji 1901, ovatoroke vOmbeibela ndji o-American Standard Version va ungurisa omatorokero nga “Jehovah” apehe ena raMukuru pu ra ri momatjangwa wOtjiheberi.

Omukonḓonone umwe wOmbeibela wena Joseph Bryant Rotherham wa tja otjiṋa tja ungurisira ena ndi “Jehovah” moruveze rwokuungurisa “Yahweh” momatorokero we wo-Studies in the Psalms mombura ndji 1911, ya ri mena rokutja aa vanga okuungurisa “ena ndaari tjiukwa nawa (nu nda yakurirwe) i ovalese vOmbeibela.” Mombura ndji 1930, omukonḓonone wena A. F. Kirkpatrick wa ṋunisa epu otjingero ohunga nomaungurisiro wena ndi “Jehovah.” Eye wa tja: “Ovatjiwe vondyero yeraka ve tja ena ri sokuisanewa Yahveh poo Yahaveh; nungwari mOtjiingirisa ena ndi JEHOVA ondi tjiukwa tjinene, nu epu enanḓengu karondi rokutja ena ri isanewa vi nungwari orondi rokumuna kutja oro ena raMukuru nokutja kamaisaneno wondjozikiro uriri tjimuna ‘Muhona.’”

Ena ndi Jehova ri heya tjike? MOtjiheberi, ena ndi Jehova ra za ketjitambo ndi heya “ngape kare,” nu ovakonḓonone ovengi ve muna kutja ri kahurura omundu ngwa uta oviṋa avihe. Kunao, Okomiti yomatorokero wOmbeibela ndji o-New World Translation ya muna kutja ena ndo ri heya kutja “Eye u tjita kutja pe kare.” Ovakonḓonone ovengi ve noumune mbwa panguka ohunga notjiṋa hi, okutja kamaatu hungirire ko oukahu. Nungwari omaheero wena raJehova nga, maye hitasana nawa notjihako tje otjOmuute woviṋa avihe nOmuyenenise wondando ye. Eye katjitire kutja pe kare evaverwa noviutwa avihe ovinazondunge uriri, nungwari wina otja ovitjitwa tji mavi kahuka eye u kayenda komurungu okutjita kutja ombango nondando ye i yenenisiwe.

Kunao, ena raJehova ri nomaheero omengi kombanda ya inga nge ri mu Eksodus 3:14, nge tja: “Ami owAmi ngwi ngu mbi ri Ami.” Okutja omambo ngo kamaheero okuura wena raMukuru. Nungwari ye tu raisira kutja Mukuru omundu ngu ri vi, nu ye raisa kutja eye u rira ngamwa atjihe tji matji heperwa po mongaro yorive ndjo kutja ma yenenise ondando ye. Okutja, nandarire kutja ena raJehova mape ya ari kara nomaheero ngo, oyo kaye ṱunu ku imbi porwavyo eye mbi ma toorora okutjita. Nungwari wina ye ṱuna ku imbi mbye tjita kutja vi kare po ohunga noviutwa vye nomayenenisiro wondando ye.