Paha nu u ungurise ondjivisiro ndji nouatjiri. Oviṋa avihe mbi mo hongo ngavi zikamene kEmbo ra Mukuru, nu tji mape sora lesa osemba okuza mu ro. Tji mo hungirire kondjivisiro yozonongo zovimemwa, ombuze, ehungi romundu, poo otjiṋa tjarwe tji matji ṋunisa epu roye, kondja okutara komurungu woruveze kutja ondjivisiro ndji u na yo i nouatjiri poo ondji tjiukwa nai.

Ungurisa ondjivisiro momuano omusemba. Kahurura omatjangwa otja kepu, otja kombuze yOmbeibela aihe, notja tji ye kahururwa momambo nge za ‘komukarere omuṱakame nomunazondunge.’ (Mat. 24:45) Ungurisa ondjivisiro ndji i hina okuza mOmbeibela nawa, nu o rundurura omaheero wayo poo okuhungira otjiṋa tji tja panguka ku ihi omutjange tja tjanga.

Vatera ovapuratene voye okuzuva nawa epu. Tji wa zu nokulesa etjangwa poo tji wa zu nokutamuna kutja ondjivisiro yoye ya zu pi, ungurisa omapuriro nongengezero poo ungurisa otjisasanekero okuvatera ovapuratene voye okurimunina oveni epu ndi mo vanga okuṋunisa.