1, 2. (a) Otjikeṋa tji tja vatera kutja ombuze ombwa i handjauke mOuhona waRoma auhe, meserewondo etenga? (b) Otjikeṋa tji matji raisa kutja eṱe ndino tu ungura nombatero yaJehova? (Wina tara kokaongo nga “ Ombuze ombwa momaraka wokombanda 670.”)

 OVANDU mbe ya okuryanga koJerusalem kaave kambura oviṋa mbyaave zuu. Ovagalilea aave hungire omaraka womahi warwe oukahu nu ombuze ndjaave zuvarisa ya nana ombango yovapuratene. Oro ra ri eyuva raPentekoste mombura ndji 33, indu ovahongewa tji va za nokupewa otjiyandjewa tjokuhungira momaraka pekepeke momuano omuhimise nu tjaatji raisa kutja owo va ri nombepo yaMukuru. (Lesa Oviungura 2:1-8, 12, 15-17.) Ombuze ombwa ndjaave zuvarisa eyuva ndo ya va za kovandu vozongaro nḓa panguka nu okuzambo ai handjauka mOuhona waRoma auhe.—Kol. 1:23.

² Kundino, ovakarere vaMukuru kave yenene okuhungira momaraka pekepeke momiano omihimise. Posi yokutja, ve yenena okuvasisa ombuze ndji kovandu vomaraka omengi kombanda ya inga oweserewondo etenga, mokutoroka ombuze yOuhona momaraka wokombanda 670. (Oviung. 2:9-11) Ovakarere vaMukuru va ungura omambo motjivaro otjingi na momaraka omengi tjinene, nga ombuze yOuhona tji ya vaza mouparanga wouye auhe. a Ihi wina otjiraisiro otjikahu tjokutja Jehova u ungurisa Ombara Jesus Kristus okuhongorera oviungura vyokuzuvarisa. (Mat. 28:19, 20) Otja tji matu tara koviungurisiwa tjiva mbi twa ungurisa kutja tu kare nondoṋeno motjiungura hi ozombura 100 nḓa kapita, ngatu yandje ombango kokutja Ombara ya yenda amai tu rongerisa vi kutja tu kare nonḓero movandu nu ye tu tunduuza vi okurira ovahonge vEmbo raMukuru.—2 Tim. 2:2.

3. Ongwaye tji tu ungurisa oviungurisiwa pekepeke motjiungura tjokuzuvarisa?

³ Jesus wa sasaneka “embo rOuhona” kozondwi nu omutima womundu we u sasaneka nehi romakunino. (Mat. 13:18, 19) Tjimuna omuungure wovikunino tje ungurisa oviungurisiwa pekepeke okurongerisa ehi nawa kutja ma yenene okukuna ozondwi ze, ovakarere vaJehova wina va ungurisa oviungurisiwa pekepeke mbye ve vatera okurongerisa omitima vyovandu omangete omengi kutja ve yenene okuyakura ombuze yOuhona. Oviungurisiwa tjiva mbi, vya yenena okuungurisiwa oruveze orusupi uriri.  Vyarwe, tjimuna omambo noumbo, ngamba vi ungurisiwa pondondo yokombanda. Oviungurisiwa ovingi mbya tamunwa mba kavi ri otja imbi mbya tamunwa mekondwa nda zu ko, mbyaavi vasisa ombuze kovimbumba ovinene vyovandu uriri, nungwari ovyo vya vatera ovazuvarise vOuhona okuvasisa ombuze ndji kovandu kourike wawo.—Oviung. 5:42; 17:2, 3.

4, 5. Ovipuratenwa mbyaavi nyandwa kongramafona aavi ungurisiwa vi, nungwari ovyo kaavi yenenisa tjike?

⁴ Omahungi omapuratenwa. Mozombura nḓa 1930 na inḓa 1940, ovazuvarise aave ungurisa omahungi wOmbeibela ngaaye kamburwa na ye nyandwa kozongramafona. Ehungi arihe aari nyandwa oure wozominute zokehi ya 5. Omahungi nga povikando tjiva ya ri nomapu omasupi wOtjiingirisa tjimuna ndi “Mukuru vetatu mumwe,” “Ondatumisire” na indi “Ouhona.” Omahungi omapuratenwa nga, aaye ungurisiwa vi? Mbuti Clayton Woodworth, Jr. ngwa papitisiwa mombura ndji 1930 moAmerika wa tja: “Ami ee tjindi ongramafona ndji ṱeki pokakofa komambo ndji ya ri nokaṋa okare ku kwa ri onane ndjee sokutwa kotjiplate kutja i ete ombosiro. Okutja ee ya pondjuwo yomundu, e paturura okakofa kandje, e twa okaṋa okare ngo pombanda yotjiplate okuzambo e kongora omuvero. Indu omunionganda tja paturura omuvero, ami ee mu raere kutja, ‘Ami mbi nombuze onanḓengu ndji me vanga kutja u zuve.’” Ovandu aave raisa ongaro iṋe? Mbuti Woodworth wa tja: “Povikando ovingi ovandu aave raisa ombepo ombwa. Povikando vyarwe, aave pata omivero uriri. Nu tjiva aave ripura kutja ami me randisa ozongramafona.”

⁵ Mombura ndji 1940, pa pitisiwa omahungi omapuratenwa wokombanda 90 nu pa ri omahungi omapuratenwa wokombanda yengete rimwe. Mbuti John E. Barr, ngwaa ungura otjomukandjira moBritanje oruveze ndwo nu ngwa karira okaṋepo kOrutu Orunane wa tja: “Mozombura nḓa 1936 nga 1945, ongramafona  ya ri otjiṋa tji mba suverere okutwaerera aruhe. Nu nandarire hee sora nokuhina yo. Okuzuva eraka raMbuti Rutherford pomivero vyovandu tja ri otjiṋa otjiyanḓiparise tjinene; ya ri tjimuna eye wa ri mbo puna ami. Otjiperi kutja ongramafona ngunda kaai yenenisa otjiuṋe otjinanḓengu momazuvarisiro wombuze ombwa, okuṱuna komitima vyovandu.”

6, 7. (a) Okuungurisa oukarata wondjiukiro wa ri nouwa waye, posi yokutja kaau yenenisa tjike? (b) Omomiano viṋe Jehova me ‘tu pa omambo ngu matu sokuhungira’?

⁶ Oukarata wondjiukiro. Momautiro wombura ndji 1933, ovazuvarise va tunduuzwa okuungurisa oukarata wondjiukiro tji mave zuvarisa okuza kondjuwo nga kondjuwo. Okakarata kondjiukiro ka ri nounene wokambapira ku tu ungurisa okutjivisa oviungura vyetu vyokuzuvarisa. Oko ka ri nombuze yOmbeibela osupi nu aake kahururire omunionganda ohunga nomambo nga zikamena kOmbeibela ngu ma yenene okupewa. Omuzuvarise aa yandja okakarata nga komunionganda nu e mu ningire kutja ma lese. Lilian Kammerud, kombunda ngwa kakarera otjomuhindwa moPuerto Rico na Argentina, wa tja: “Ami mba yakura omaungurisiro woukarata wondjiukiro tjinene.” Ongwaye tja tja nao? Eye wa tja: “Kavandu avehe mbe yenena okuuta ehungi nawa ku nomundu warwe. Okutja okakarata nga ke ndji vatera okuiririra okuuta ehungi ku novandu.”

⁷ Mbuti David Reusch, ngwa papitisiwa mombura ndji 1918 wa tja: “Oukarata wondjiukiro wa vatera ovakambure ovakwetu tjinene, orondu ovengi aave tira kutja mape ya ave hungire oviṋa mbi ve ha sere.” Posi yokutja okakarata nga kaake yenenisa avihe mbyaatu undjire ko. Mbuti Reusch wa tja: “Povikando tjiva, aatu hakaene novandu mbaave nangarasi oweṱe ovikume. Aape munika aayo otjingi tjetu kaatu yenene okuhungira. Posi yokutja Jehova ee tu rongerisa otjovazuvarise ve kutja tu iririre okuhakaena ku novandu. Moruyaveze rwopopezu eye me tu hungirire po mokutuhonga okuungurisa Omatjangwa tji matu zuvarisire ovandu. Ihi tja yenenisiwa okupitira mOskole yOviungura vyOkuzuvarisa ndja uta mozombura nḓa 1940.”—Lesa Jeremia 1:6-9.

8. Mo yenene vi okuyandjera kutja Kristus me ku honge?

⁸ Omambo. Okuza kombura ndji 1914, ovakarere vaJehova va pitisa omambo pekepeke wokombanda 100 nge kahurura omapu wOmbeibela. Omambo tjiva nga ya ungurirwa okurongerisa ovazuvarise kutja ve zuvarise ombuze noupyuke. Anna Larsen, waDenmark ngwa ri omuzuvarise oure wozombura ape 70 wa tja: “Jehova we tu vatera okurira ovazuvarise ovapyuke okupitira mOskole yOviungura vyOkuzuvarisa nomambo woskole ndji ngu twa pewa. Me zemburuka kutja embo etenga ndi twa pewa ra ri ndi Theocratic Aid to Kingdom Publishers, nda pitisiwa mombura ndji 1945. Oro ra kongorerwa i indi “Equipped for Every Good Work,” nda pitisiwa mombura ndji 1946. Nai tu ungurisa embo ndi Benefit From Theocratic Ministry School Education, nda pitisiwa mombura ndji 2001.” Oskole yOviungura vyOkuzuvarisa nomambo wayo tjiri ye tu vatera tjinene, Jehova tjinga e “tu pa omasorero wokurira ovakarere” ve. (2 Kor. 3:5, 6) Ove we ritjangisa kOskole yOviungura vyOkuzuvarisa? U twaerera embo roye ndi Ministry School kombongarero otjivike atjihe? Nu u kongorera membo roye indu  omutarere woskole tji ma hungirire kondjivisiro okuza mu ro? Tji wa tjiti nao, okutja mo yandjere kutja Kristus me ku honge okurira omuzuvarise omusemba.—2 Kor. 9:6; 2 Tim. 2:15.

9, 10. Omambo aaye vatere vi mokukuna nokutjatja ozondwi zouatjiri?

⁹ Jehova wina we tu vatera okupitira momambo nge za kotjira tje nge tu vatera okukahurura omahongero omananḓengu wOmbeibela. Embo rimwe nda ri nondoṋeno tjinene ra ri ndi The Truth That Leads to Eternal Life. Oro rutenga ra pitisiwa mombura ndji 1968 nu ra nana ombango yovengi tjimanga. Okambapira kOviungura vyEtu vyOuhona kaTjikukutu 1968 ka tja: “Embo ndi ra ningirwa tjinene ngandu onganda yomapitisiro yotjira tjaJehova moBrooklyn tji ya ningira okuungura mongurova yapeke mu Ndengaṋi, kutja ve yenenise omaningiriro ngo.” Okambapira nga komurungu ka tja: “Otjikando tjimwe mu Katjose omaningiriro wembo ndi ya ruruma otjivaro tjomambo ngaaye yandjwa aruhe nengete 1.5!” Mombura ndji 1982, omambo wokombanda yomangete 100 ya pitisiwa momaraka 116. Ozombura 14 okuza kombura ndji 1968 nga 1982, embo ndi The Truth That Leads to Eternal Life ra vatera ovandu vokombanda yengete rimwe okurira ovazuvarise vOuhona. b

¹⁰ Mombura ndji 2005, mwa pitisiwa embo rarwe ndi Ombeibela tjiri i honga tjike?, ndi vatera momakonḓononeno wOmbeibela tjinene. Omambo ape omangete 200 ya pitisiwa rukuru momaraka 256! Kwa kongorera tjike? Mozombura 7 uriri, okuza kombura ndji 2005 nga 2012, ovandu ape engete 1.2 va rira ovazuvarise vombuze ombwa. Nu moruveze otjingerwo, otjivaro tjovandu mbe rihonga Ombeibela tja yeruruka okuza komangete ape 6 nga kovandu vokombanda yomangete 8.7. Ihi otjiraisiro otjikahu kutja Jehova tjiri u sera ozongondjero zetu ondaya zokukuna nokutjatja ozondwi zouatjiri wOuhona.—Lesa 1 Ovakorinte 3:6, 7.

11, 12. Otja komatjangwa nga tamunwa mbo, oumbo wetu wa ungurirwa ovangendu?

¹¹ Oumbo. Okuza kombutiro, okambo nga The Watch Tower tjinenenene kaungurirwa ‘okarupanda okaṱiṱi,’ imba mba “isanenwa okurumata ovyeyuru.” (Luk. 12:32; Hebr. 3:1) Metenga raSeninaṋi 1919, otjira tjaJehova tja pitisa okambo karwe ku kaungurirwa okunana ombango yovandu mbe ha tjiwa ouatjiri. Okambo ngo ka tjiukwa tjinene i Ovakonḓonone vOmbeibela novandu mbe ha tjiwa ouatjiri nga oure wozombura ozengi tji kahandjaurwa tjinene okukapita okambo nga The Watch Tower. Okambo ngo rukuru aake isanewa The Golden Age. Mombura ndji 1937, ena rokambo ngo ra rundururirwa kena ndi Consolation. Nu okuza kombura ndji 1946, oko ka uta okuisanewa o-Awake!

¹² Otja ozombura tjaaze kayenda, ombuniko yokambo nga The Watchtower na inga o-Awake! ya rundururwa, posi yokutja ondando yawo kai yarunduruka. Owo ngunda u tjivisa Ouhona waMukuru nu u kurisa ongamburiro yovandu mOmbeibela. Kundino, okambo nga The Watchtower keungurirwa omakonḓononeno wombongo nu karwe keungurirwa ovandu mbe ha tjiwa ouatjiri. Okambo komakonḓononeno kaungurirwa ‘ovakarere,’ owo mbe ri ‘okarupanda okaṱiṱi’ na imba ‘ozonḓu zarwe.’ c  (Mat. 24:45; Joh. 10:16) Inga okarwe kaungurirwa ovandu mbe ha tjiwa ouatjiri nungwari mbe nondengero kOmbeibela na ku Mukuru. (Oviung. 13:16) Okambo nga o-Awake! ke yandja ombango tjinene ku imba mbe ha tjiwa Ombeibela na Mukuru watjiri Jehova nawa.—Oviung. 17:22, 23.

13. Otjikeṋa tji tji ku tjatera ohunga noumbo wetu? (Hungirira kokaongo nga “ Otjivaro tjomambo mouye auhe.”)

¹³ Okuza pomautiro wombura ndji 2014, momueze auhe pa pitisiwa oumbo mbwi Awake! wokombanda yomangete 44 na imbwi The Watchtower ape omangete 46. Okambo nga o-Awake! katorokwa momaraka ape 100 nu inga The Watchtower, katorokwa momaraka wokombanda 200. Pu mape hee kutja owo ooumbo mbwa handjaurwa pondondo yokombanda mouye auhe! Indji tjiri ondoṋeno yapeke, posi yokutja kai sokutuhimisa tjinene. Orondu moumbo mbwi mu nombuze Jesus ndja tja mai zuvarisiwa mouye auhe.—Mat. 24:14.

14. Eṱe twa tunduuza tjike noupatje, nu omena ratjike?

¹⁴ Ombeibela. Mombura ndji 1896, Mbuti Russell novakwao mbaave ungura pamwe va rundurura ena ronganda ndjaave ungurisa okupitisa omambo kutja ri ute okuungurisa embo ndi “Ombeibela.” Oyo ya uta okutjiukwa otja o-Watch Tower Bible and Tract Society. Inga ya ri omarundurukiro omasemba orondu Ombeibela ondja ri otjiungurisiwa otjinenenene mokuhandjaura ombuze ombwa ohunga nOuhona waMukuru. (Luk. 24:27) Mombwaneno nena ronganda ndji rokotjiveta, ovakarere vaMukuru va tunduuza omahandjauriro nomalesero wOmbeibela. Okutara kotjihorera, mombura ndji 1926 twa pirinda Ombeibela ndji The Emphatic Diaglott, kozomahina zetu, ndja torokwa okuza ko-Christian Greek Scriptures ndja pitisiwa i Benjamin Wilson. Momautiro wombura ndji 1942, twa pirinda nokuhandjaura ozOmbeibela nḓa King James Version ape 700 000. Ozombura 2 kombunda yanao, twa uta okupirinda Ombeibela ndji American Standard Version, ndji ungurisa ena raJehova povikando 6 823. Mombura ndji 1950, twa handjaura ozOmbeibela zokombanda 250 000.

15, 16. (a) Otjikeṋa tji tji ku tjatera ohunga nOmbeibela ndji o-New World Translation? (Hungirira kokaongo nga “ Omatorokero wOmbeibela wohakahana.”) (b) Mo yenene vi okuyandjera Jehova kutja ma ṱune komutima woye?

¹⁵ Ombeibela ndji o-New World Translation of the Christian Greek Scriptures ya pitisiwa mombura ndji 1950. Ombeibela ndji o-New World Translation of the Holy Scriptures ya pitisiwa otjembo rimwe mombura ndji 1961. Oyo i yozika Jehova mokuyarura po ena re poruveze pu ra ri rukuru momatjangwa wOtjiheberi omatenga. Ena raMukuru wina ri munika povikando 237 mOmatjangwa wOtjigrike wOmbeibela ndji o-New World Translation. Oyo ya rundururwa povikando ovingi, nu ya za nokurundururwa rukwao mombura ndji 2013 ku tja i rire ongahu nombupu okuilesa. Okuza kombura ndji 2013, Ozombeibela nḓa o-New World Translation zokombanda yomangete 201 za pitisiwa momaraka 121 motupa poo moumbomba wa zo.

¹⁶ Ovandu tjiva va raisa ongaro iṋe tji va za nokulesa Ombeibela ndji o-New World Translation meraka rawo oveni? Omurumendu Omunepali wa tja: “Ombeibela onguru yOtjinepali ya ri onḓeu kovandu ovengi okuizuva, orondu ya ungurisa eraka ndi ha ungurisiwa rukwao. Nungwari nai tu zuva Ombeibela ndji nawa, orondu i ungurisa eraka ndi tu ungurisa eyuva arihe.” Indu  omukazendu mo-Central African Republic tja uta okulesa Ombeibela yOtjisango, eye wa uta okurira na tja: “Indi tjiri eraka romutima wandje.” Eṱe wina matu yenene okuyandjera Jehova okuṱuna komitima vyetu tjimuna omukazendu ngo, indu tji matu lese Embo Re eyuva arihe.—Eps. 1:2; Mat. 22:36, 37.

17. Mo raisa vi kutja u nondangi koviungurisiwa nomahongero ngu wa muna nu okutjita nao maku ku etere ouwa waye?

¹⁷ Ove u raisa ondangi koviungurisiwa nomarongerisiro omawa Ombara Jesus Kristus nge tu pa poo indee? Ove u twapo oruveze rwokulesa omambo otjira tjaJehova ngu tji pitisa, nokuyeungurisa kutja u vatere varwe? Tji pe ri nao, ove mape ya okara noumune tjimuna owaSisi Opal Betler ngwa papitisiwa tji ya ri 4 ku Seninaṋi 1914. Sisi Opal wa tja: “Otja ozombura tjaaze kayenda, ami nomurumendu wandje [Edward] aatu ungurisa ongramafona noukarata wondjiukiro. Eṱe aatu zuvarisa okuza kondjuwo nondjuwo nu aatu ungurisa omambo noumbo. Aatu kara norupa movitjitwa vyapeke vyokuhandjaura ombuze ombwa kotjiwaṋa. Kombunda twa hongwa omuano wokukavarura ovandu rukwao nokuhonga ovandu mba raisa ombango, Ombeibela pozoyawo. Indwi rwari oruveze rwoviungura ovingi nu rwondjoroka ku eṱe.” Jesus wa kwizika kutja ovakarere ve mave kara noviungura ovingi vyokukuna, okukonda nokuyoroka pamwe. Otja Opal, ovengi mave itavere kutja omakwizikiro ngo ya rira ouatjiri.—Lesa Johanes 4:35, 36.

18. Eṱe tu nondjingonekero yatjike?

¹⁸ Ovengi ngunda mbe hiya rira ovakarere vOmbara mape ya ave vara ovakarere vaMukuru otjovandu “uriri mbe hi na indu va hongerwe.” (Oviung. 4:13) Nungwari ripurira kotjiṋa hi! Ombara ya tjita kutja ovandu vakauriri ve yenene okuungura omambo nge torokwa nokuhandjaurwa pondondo yokombanda mekurungi arihe rovandu! Tjinenenene, oyo ye tu honga nokututunduuza okuungurisa oviungurisiwa mbi okuhandjaura ombuze ombwa kovandu voviwaṋa avihe. Tjiri tu nondjingonekero onene yokuungura puna Kristus okukuna ozondwi zouatjiri nokuwonga ovahongewa!