Jehova ma ṱunununa nokuhinapemwe avihe ovivi Satana mbya tjita. Jehova wa zika Jesus otjOmbara kombanda yehi arihe. Kehi youhonapare we, ehi mari tjitwa oparadisa.—Daniel 7:13, 14; Lukas 23:43, NW.

Jehova ma kwizike oviṋa mbi:

• OVIKURYA ONDJOURA: “Ehi [orini tjiri mari, NW] jandja ovihape viaro; . . . Mukuru, ngu ri Mukuru uetu, me tu sere ondaya.” “Ngamu kare ovikokotwa ovingi mehi nga kozondomba zozondundu.”—Epsalme 67:7, EEP Correct in EEP; 72:16.

• KAPE NOVITA RUKWAO: “Indjeye, mu yekutara oviungura [vyaJehova, NW], nu mu mune oviṋa ovihimise Eye mbya tjita kombanda yehi. Eye u yandisa ovita mouye auhe.”—Epsalme 46:8, 9.

• KAPE NOVANDU OVARUNDE: “Orondu ovarunde mave yandekwa . . . Mokaruveze okasupi omurunde tjandje ke tji po; tji mo mu paha poṋa pe kara, ko nakumumuna.”—Epsalme 37:9, 10.

•  KAPE NOMITJISE, ORUHOZE, POO ONḒIRO: “Indino omupoṱu ma munu, nomboro mai zuu, nomuremane ma tuka peyuru otja omenye, nu imba mba seta omaraka mave ravaere nondjoroka.”—Jesaja 35:5, 6.

  “[Nu Mukuru, EEP] omuini ma kara puna wo . . . Eye ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru vya kapita.”—Omavandururiro 21:3, 4.

Otja Satana nozondemone, Jehova ka korovizeze kaparukaze. Kangamwa atjihe eye tji ma kwizike tja sokurira ouatjiri. (Lukas 1:36, 37, sasaneka EEP) Jehova we ku suvera nu ma vanga kutja ove u kare nomuinyo mOparadisa eye ndji ma ungura. Okutja paha Ovahongonone vaJehova okurihonga komeho ohunga nouatjiri outemise mbu munika mEmbo raMukuru. Ove indu tji mo ungurisa ouatjiri momuinyo woye, ove mo kuturwa okuza komapando wouhauatjiri, ovizerika, nouhatjiwa. Momakaondjero woruveze, ove wina moo kuturwa okuza komapando wourunde nonḓiro. Otja Jesus tja tja: “Eṋe mamu tjiwa ouatjiri, nouatjiri mau mu kutura.”—Johanes 8:32.