•  Omambo wokuuta ombongarero 2

•  Ovihuze okuza mEmbo ra Mukuru 3-5

  •  Ehungi 3

  •  Okupaha ovihuze mOmbeibela 4

  •  Omalesero wOmbeibela 5

•  Ungura oukukutu motjiungura tjokuzuvarisa 6-14

  •  Okuuta ehungi 7

  •  Okukavarura rukwao 8

  •  Okukaisa po ovandu ovahongewa 9

  •  Okukahurura ongamburiro yoye 10

  •  Ehungi 11

  •  Epu ndi mo hungirire ko 12

  •  Oruveze pu u ri 13

  •  Okuungurisa ouvidio nomambo 14

•  Okuhupa otjOvakriste 15-16

  •  Omakonḓononeno wOmbeibela wOmbongo 16

•  Omambo wokupata ombongarero 17

•  Okutanga nokuyandja omaronga 18

•  Oiri 19

•  Omutarere worukondwa tji me mu varura 20

•  Otjivike tjOmaworonganeno wOrukondwa poo wOtukondwa 21

•  Otjivike tjOmazemburukiro wOnḓiro ya Jesus 22

•  Omutarere wombongarero ndji Ehupo retu roukriste notjiungura tjetu tjokuzuvarisa 23

•  Omuhaamise wombongarero ndji Ehupo retu roukriste notjiungura tjetu tjokuzuvarisa 24

•  Omuyandje womaronga omutjavari 25

•  Oskole oitjavari 26

•  Ouvidio 27

1. Omirari mbi ri mombapira ndji mavi vatera avehe mbe norupa pombongarero yEhupo retu rOukriste notjiungura tjetu tjokuzuvarisa. Ngunda ave hi ye rirongerisa, imba mbe norupa mave sokutara komirari mbi ri mokambo nga Ehupo retu rOukriste notjiungura tjetu tjokuzuvarisa, nomirari mbi ri mombapira ndji. Ovazuvarise avehe ve sokutunduuzwa okukara norupa moskole yomokati kotjivike. Nu varwe mbe ya kombongarero yombongo aruhe, mave yenene okukara norupa moskole nandarire kutja kavahongonone va Jehova, indu owo tji ve kambura momahongero wOmbeibela, nu ongaro yawo yomeritjindiro tji mai hitasana nomirari vyehupo rOukriste. Omutarere wombongarero ndji Ehupo retu roukriste notjiungura tjetu tjokuzuvarisa ma sokuhungira ku nomundu auhe ngu he ri omuzuvarise nu ngu ma vanga okukara norupa moskole, ohunga nokutja ovikeṋa mbi mavi heperwa po kutja ma kare norupa moskole ndji. Omutarere wombongarero ma sokuhungira ku na ye ngunda omundu ngu ve rihonga pamwe Ombeibela e ri po, (poo ngunda omunene we ngu ri Omuhongonone wa Jehova e ri po). Eye ma kapurwa omapuriro tjimuna nge purwa komundu ngu ma vanga okurira omuzuvarise ngu ha papitisiwa.—od-E ekond. 8 opar. 8.

2. Ominute 1. Otjivike atjihe, kombunda yeimburiro etenga nongumbiro, omuhaamise wombongarero ma vatere ovapuratene okukara nomaundjiro koprograma ndji mai kongorere ko. Omuhaamise wombongarero tjinene nga yandje ombango komapu ngu maye vatere ombongo.

 3. Ehungi: Ozominute 10. Epu, noviṋa vivari poo vitatu ovinanḓengu mbi maku sokuhungirirwa vya yandjwa mokambo nga Ehupo retu rOukriste notjiungura tjetu tjokuzuvarisa. Ehungi ndi mari sokuyandjwa i yomunene wombongo poo omuvatere wombongo ngu nondjiviro ombwa. Tjinangara omalesero wOmbeibela wotjivike maye zu membo epe rOmbeibela, okutja mape nyandwa okavidio ku make tjiukisa embo rOmbeibela ndo. Omuyandje wehungi ma yenene okuhungirira koviṋa mokavidio mbi mavi hitasana nepu rorupa ndu ma yandja. Posi yokutja, ma sokuhungirira komapu ayehe nge ri mokambo komakonḓononeno. Oruveze tji maru yandjere, eye wina nga ungurise nawa oviperendero mbi ri mokambo komakonḓononeno, nu mbya ungurirwa okuṋunisa orupa ndu ma hungirire ko. Eye wina ma yenene okuungurisa ondjivisiro yarwe ndji mai ṋunisa epu ndi ma hungirire ko.

 4. Okupaha ovihuze mOmbeibela: Ozominute 10. Indwi orupa ndu maru kara nomapuriro nomaziriro nokuhinomambo wokuuta nokupata. Oro maru sokuyandjwa i yomunene wombongo poo omuvatere wombongo ngu nondjiviro ombwa. Eye nga pure ovapuratene omapuriro yevari ngo. Nu wina, ma yenene okutoorora kutja mave lese omatjangwa morupa ndwi poo indee. Imba mbu mave pewa oruveze rwokuyandja omaziriro mave sokuyeyandja mozosekonde 30 poo kehi yanao.

 5. Omalesero wOmbeibela: Ozominute 4. Orupa ndwi maru sokuyandjwa i yomurumendu. Eye ma sokulesa orupa ndwa pewa nokuhinokuhungira otjiṋa pomautiro poo pomaandero womalesero we. Omuhaamise wombongarero ma sokuyandja ombango yapeke kokuvatera omuhongwa okulesa nawa, momuano mbu mau zuvakwa, oukahu, okuṋunisa omambo nawa, nokuyandja ombango komarundurukiro wombosiro yeraka, okusuvana poruveze ndu ri rwo, nokulesa momuano ovandu mu ve hungira aruhe. Mena rokutja omalesero wOmbeibela tjiva omare nu tjiva omasupi, omutarere wombongarero yombongo u sokutara nawa kutja omuhongwa uṋe ngu ma yenene okulesa orupa rwOmbeibela kaaṋi ndo, indu tji ma rongerisa oumbapira womalesero wOmbeibela.

6. Ozominute 15. Orupa rwombongarero ndwi rwa ungurirwa okuyandja oruveze ku avehe kutja ve yenene okukara nondjiviro onyingi yokuhungira ku novandu, okuzuvarisa, nokuhonga. Indu tje ri ohepero, ovanene vombongo mave yenene okukara norupa. Omuhongwa auhe nga ungurire kepu ndi ri mokambo nga Okuhonga poo inga Suvereye ovandu ndi ri mokambo nga Ehupo retu rOukriste notjiungura tjetu tjokuzuvarisa. Povikando tjiva, orupa ndwi maru rire otjihungiriro otjipaturuke. Orupa otja indwo maru yandjwa i yomunene wombongo poo i yomuvatere wombongo ngu nondjiviro ombwa.—Ohunga nokutja mo kayendisa vi otupa twi, lesa  oparagrafa 15.

 7. Okuuta ehungi: Orupa ndwi maru ungurwa i yomurumendu poo omukazendu. Ingwi ngu me mu vatere nga rire omurumendu omukwao poo omukazendu omukwao, poo okaṋepo keṱunḓu re. Omuzuvarise nomundu ngu me mu vatere mave yenene okuhaama poo okukurama.—Kondjivisiro yokomurungu ohunga nepu ndi mo hungirire ko, noruveze pu u ri, lesa  oparagrafa 12 no  13.

 8. Okukavarura rukwao: Orupa ndwi maru yandjewa i yomurumendu poo omukazendu. Ingwi ngu me mu vatere nga rire omurumendu omukwao poo omukazendu omukwao. (km-E 5/97 omuk. 2) Omuhongwa nomundu ngu me mu vatere mave yenene okuhaama poo okukurama. Omuhongwa nga raise kutja ma kahurura vi epu ndi va hungirire ko otjikando tji tja zu ko.—Kondjivisiro yokomurungu ohunga nepu ndi mo hungirire ko, noruveze pu u ri, lesa  oparagrafa 12 no  13.

 9. Okukaisa po ovandu ovahongewa: Orupa ndwi maru yandjewa i yomurumendu poo omukazendu. Ingwi ngu me mu vatere nga rire omurumendu omukwao poo omukazendu omukwao. (km-E 5/97 omuk. 2) Omuhongwa nomundu ngu me mu vatere mave yenene okuhaama poo okukurama. Orupa ndwi ngaru raise omakonḓononeno wOmbeibela nga kayendisiwa rukuru. Ko nokuhepa omambo wokuuta poo wokupata tji u hi nokuungurira komapu ngo. Kahepero okulesa otupa atuhe ku maku ungurirwa, nandarire kutja otjiṋa hi mape ya atji tjitwa.

 10. Okukahurura ongamburiro yoye: Indu orupa ndwi tji ru ri ehungi, maru yandjewa i yomurumendu. Nu indu tji ru ri otjihorera tjovitjitwa, maru yandjewa i yomurumendu poo omukazendu. Ingwi ngu me mu vatere nga rire omurumendu omukwao poo omukazendu omukwao, poo okaṋepo keṱunḓu re. Omuhongwa ma sokuhungira momuano wondengero nu mbu mau zuvakwa nawa, otja tji ma ziri epuriro ndi ma hungirire ko, ama ungurisa ondjivisiro ndja pewa. Omuhongwa ma yenene okutjivisa kutja ondjivisiro ndjo wa isa pi poo indee.

 11. Ehungi: Omurumendu ongu ma sokuyandja orupa ndwi otjehungi kombongo. Indu ehungi tji ra zikamene kepu okuza koviweziwako A okuza mokambo nga Suvereye ovandu, omuhongwa nga ṋunise kutja omomuano uṋe mu matu ungurisa etjangwa ndo poo omatjangwa ngo motjiungura tjokuzuvarisa. Otjotjihorera, eye ma yenene okukahurura kutja etjangwa mari ungurisiwa vi, omaheero wetjangwa, nokutja matu yenene vi okukahurura etjangwa ndo kovandu. Indu ehungi tji ra zikamene kehongwa ndi ri mokambo nga Suvereye ovandu, omuhongwa ma sokuyandja ombango kutja matu ungurisa vi epu ndo motjiungura tjokuzuvarisa. Eye ma yenene okuṋunisa otjihorera tji tji ri mepu 1 rehongwa, poo a ṋunisa omatjangwa warwe nge ri mehongwa ndi, indu tje ohepero.

   12. Epu ndi mo hungirire ko: Ondjivisiro ndji ri moparagrafa ndji, na indji ndji mai kongorere ko mai ṱunu korupa ndwi “Okuuta ehungi” na indwi “Okukavarura rukwao.” Tji pe ha raisirwe momuano warwe, ondando yomuhongwa oyokuraera omundu ouatjiri wOmbeibela mbu mau hitasana nongaro ye, nokumwesa nepu ndi mamu yekuhungirira ko otjikando tjarwe. Omuhongwa ma sokutoorora epu ndi mari nana ombango yovandu momaturiro we, nu ndi mari hitasana noviṋa mbi mavi tjitwa ongondoroka na wo. Eye ma yenene okutjiukisa embo, okambo, okambapira, poo okavidio okuza mOviungurisiwa vyetu vyOkuhonga poo a ha roro okutjiukisa tjimwe tjoviṋa mbi oparukaze. Moruveze rwokuṱiza oviṋa mbi mave kahungira motjiuru, ovahongwa mave sokurihonga omuano wokuhungira, tjimuna okuraisa onḓero momundu nokuhungira momuano mu ve hungira aruhe.

   13. Oruveze pu u ri: Omuhongwa ma sokuungurisa ovihorera vyotuveze tu matu hitasana nomaturiro we. Otjotjihorera:

1.  (1) Ondjuwo nondjuwo: Maku kamburire mo okuzuvarisa okuza kondjuwo nondjuwo kutja okuhungira ku nomundu ponganda ye, okupitira mongoze, poo okutjanga orutuu, na wina okuyaruka rukwao komundu ngwa raisire onḓero.

2.  (2) Okuzuvarisa ngunda au he ri motjiungura tjokuzuvarisa: Matu sokukondja okutanaurira ehungi ndi twa vazewa na ro mombuze yOmbeibela. Wina maku kamburire mo okuhaṋasana etjangwa ku nomundu ngu mu ungura pamwe, ngu mu hita pamwe oskole, ngu mwa rondo pamwe mo-taxi poo mombesi, poo ngu mwa hakaene poruveze rwarwe.

3.  (3) Okuzuvarisa momivanda vyotjihuro: Maku kamburire mo okuzuvarisa pokatemba komambo, okuzuvarisa potuveze twomarandero, movivanda vyotjihuro, potuveze twomerinaneno, potuveze pu pe kurama ozohauto, na potuveze twarwe pu mo vaza povandu.

 14. Okuungurisa ouvidio nomambo: Omuhongwa ma yenene okutya kutja ma raisa okavidio poo ma yandja okambo, poo indee. Indu tje sokuraisa okavidio mehungi re, omuhongwa ma yenene okuhungirira ko, posi ya a ha nyanda okavidio.

15. Kombunda yeimburiro orupa rwozominute 15 ndwi, maru kara norupa rumwe poo tuvari tu matu vatere ovapuratene okuṱakamisa Embo ra Mukuru. Ndoovazu kape raisirwe omuano warwe, otupa twi matu yenene okuyandjwa i yovanene vombongo poo ovavatere vombongo mbe nondjiviro ombwa, pendje na indu tje ri ovihepwa vyombongo. Ovyo mavi sokuyandjwa i yomunene wombongo. Indu orupa ndwi tji ru ri otjihungiriro otjipaturuke, omukayendise worupa ndwi, ma yenene okupura omapuriro warwe okuweza ku inga nge ri porukuru. Indu tji ma tjiukisa orupa rwe, eye ka sokuhungira omambo omengi, posi ya ma sokuyandja ombango komapu ngu ma hungirire ko, nu ma sokuyandja oruveze kovapuratene okukara norupa. Orupa ndwi tji maru kamburire mo omapuriro ngu maye purwa komundu, tji mape sorwa, eye ma sokuronda kombanda moruveze rwokuhaama poruveze rwe.

  16. Omakonḓononeno wOmbeibela wOmbongo: Ozominute 30. Orupa ndwi maru sokuyandjwa i yomunene wombongo ngu nondjiviro ombwa. (Ozombongo nḓe nouhepe wovanene vombongo maze yenene okuungurisa ovavatere vombongo, indu tje ri ohepero.) Orutu rwovanene vombongo ngaru zikamise kutja oouṋe mbu mave yenene okuyandja orupa rwOmakonḓononeno wOmbeibela wOmbongo. Imba mbu mave yandja orupa ndwi, ngave yandje momuhingo omuwa, ave kapitisa oruveze, ngave ṋunise omatjangwa ngu maye hongo omapu omananḓengu, nu ngave vatere avehe okumuna ouwa wokuṱakamisa omapu ayehe worupa ndwo. Imba mbu mave kayendisa orupa ndwi, mave munu ouwa mokulesa rukwao ondjivisiro ndja pitisiwa ohunga nokuhongorera po orupa ndu nomapuriro. (w23.04 omuk. 24, okawongo) Kombunda yaindu omapu ayehe yotjivike tji ya ungurwa nawa, ko nokuhepa okutjita kutja omakonḓononeno wombongo ye rire omare. Tji mape yenene, omuyandje nomulese worupa ndwi ngave rundururwe otjivike atjihe. Omuhaamise wombongarero yomokati kotjivike tja raisa kutja orupa ndwi ngaru susuparisiwe, ku nao omuyandje worupa ndwi nga tare kutja ma tjiti vi kutja orupa rwe ru rire orusupi. Eye ma yenene okutoorora ozoparagrafa tjiva uriri okulesewa.

17. Ozominute 3. Omuhaamise wombongarero ma hungirire ousupi komapu tjiva omananḓengu nga ṋunisiwa mombongarero. Eye wina ma sokuhungirira komapu wombongarero yotjivike tji matji kongorere ko. Eye ma yenene okulesa omana wovazuvarise mbe notupa otjivike tji matji kongorere ko, tji pe noruveze rwokutjita nao. Ndoovazu kape raisirwe omuano warwe, tji pe nomatjivisiro poo otutuu omuhaamise wombongarero ma lesere ombongo otjorupa womambo we wokupata. Omatjivisiro nge tjitwa aruhe, tjimuna wozombongarero zokuzuvarisa nomakohororero wEtuwo rOmerikotameneno kaye sokutjivisiwa pombongarero yombongo, nungwari ngaye tuwe potjimborta tjomatjivisiro. Ndoovazu omatjivisiro notutuu matu kambura oruveze orure okutjivisiwa, omuhaamise wombongarero ma sokuningira ovarumendu ovakambure mbe notupa morupa ndwi Okuhupa otjOvakriste okutjita otupa twawo kutja tu rire otusupi. ( Oparagrafa 16 no  19) Ombongarero mai pata neimburiro nongumbiro.

18. Omuhongwa auhe tja zu nokumana ehungi re, omuhaamise wombongarero nga ungurise ape ominute imwe okutanga omuhongwa nokuyandja omaronga nga zikamene okuza kepu rwomakonḓononeno. Omuhaamise wombongarero tji ma tjiukisa orupa rwomuhongwa ndu ma yandja, ka sokutjivisa epu ndi ma ungurire ko. Omuhongwa tja mana orupa rwe, omuhaamise wombongarero nge mu tange, nu nga tjivise kutja eye wa ungurire kepu riṋe. Eye nga raise kutja ongwaye tji ma munu kutja omuhongwa wa ungura nawa poo nga kahurure kutja ongwaye omuhongwa tji ma sokukayenda komurungu okuungurira kepu ndo, nokutja eye ma yenene okuriyenenisa vi. Omuhaamise wombongarero ma yenene okuhungirira komapu warwe ngu ma munu kutja maye vatere omuhongwa novapuratene. Kombunda yombongarero poo poruveze rwarwe, omuhaamise wombongarero ma yenene okuyandja omaronga komuhongwa kourike we ohunga nomuano ma yandja orupa rwe poo okuhungirira kepu rarwe romakonḓononeno. Omaronga ngo maye sokuzikamena kokambo nga Suvereye ovandu, Okuhonga poo kembo ndi Ministry School.—Ondjivisiro yokomurungu ohunga notjiungura tjomutarere wombongarero, notjiungura tjomuyandje womaronga omutjavari, tara  oparagrafa 19,  24, no  25.

19. Ape ningi orupa poo omambo womuhaamise wombongarero ngu maye sokukapita ozominute nḓa tu wa po. Nandarire kutja okambo kEhupo retu rOukriste notjiungura tjetu tjokuzuvarisa ka twa pokutja orupa aruhe maru sokukambura oruveze ndu ṱa pi, indu tji wa hungire ondjivisiro aihe ndji mai heperwa po, o tjiti kutja ehungi roye ri rire ere poo okuyenenisa ozominute nḓu wa pewa. Otupa tji twa kapita oruveze, omuhaamise wombongarero ndji Ehupo retu roukriste notjiungura tjetu tjokuzuvarisa poo omuyandje womaronga omutjavari ma sokuronga omundu ngwa kapitisa oruveze kourike we. ( Oparagrafa 24 no  25) Ombongarero aihe ku nomaimburiro nozongumbiro mai sokukambura oure woiri 1 nozominute 45.

20. Indu ombongo tji mai varurwa i yomutarere worukondwa, oprograma yombongarero mai sokukayenda otja tji pa raisiwa mokambo nga Ehupo retu rOukriste notjiungura tjetu tjokuzuvarisa, posi yokutja orupa rwOmakonḓononeno wOmbeibela wOmbongo ndu ri kehi yorupa ndwi Okuhupa otjOvakriste, maru pingenisiwa nehungi romutarere worukondwa rozominute 30. Komurungu wehungi romutarere worukondwa, omuhaamise wombongarero nga ṋunise omapu omananḓengu woprograma ndja zu nokutjitwa, nu ma ṋunise omapu omananḓengu woprograma yotjivike tji matji yende, nu wina nga tjivise omatjivisiro omananḓengu nokulesa otutuu otunanḓengu. Okuzambo ma tjiukise omutarere worukondwa. Omutarere worukondwa tja mana okuyandja ehungi re, nga pate ombongarero neimburiro nda toorora omuini. Eye ma yenene okuṋanga omurumendu warwe omukambure okuyekupata nongumbiro. Otjivike tji mamu varurwa i yomutarere worukondwa ape kara oskole oitjavari meraka rombongo. Okambumba keraka rarwe make yenene okukayendisa ozombongarero zako komurungu, nandarire kutja omutarere worukondwa ma varura ombongo ndjo. Nungwari, okambumba ngo make sokukawana pu nombongo aihe indu omutarere worukondwa tji ma yandja ehungi.

21. Motjivike tji ku nomaworonganeno worukondwa poo wotukondwa, kape nokukara ozombongarero zombongo. Ombongo mai sokuzemburukisiwa kutja omundu auhe poo eṱunḓu arihe mari sokukonḓonona oviṋa mbi mavi sokuhungirirwa ko pozombongarero otjivike ho ku wo oveni.

22. Indu Eyuva rOmazemburukiro wOnḓiro ya Jesus tji ri ri mokati kotjivike, kape nokukara ombongarero yombongo yomokati kotjivike.

23. Omunene wombongo ngwa toororwa i yorutu rwovanene vombongo ongu ma karere otjomutarere wombongarero ndji Ehupo retu rOukriste notjiungura tjetu tjokuzuvarisa. Eye ongu nomerizirira wokutjita kutja ombongarero yombongo ndji i kayende otja komirari mbi. Eye ma sokukara nomaunguriro omawa ku nomuyandje womaronga omutjavari. Okambo komakonḓononeno nga Ehupo retu rOukriste notjiungura tjetu tjokuzuvarisa tji ka piti, omutarere wombongarero ma sokutoorora ovakambure ovakwao mbu mave yandja otupa twombongarero yomokati kotjivike tu matu yandjwa momieze vivari mbyo. Imbi mavi kamburire mo otupa atuhe twombongarero, okutoorora kutja omurumendu uṋe omukambure ngu ma ungura otjomuhaamise wombongarero okuza ku imba mba toororwa i yovanene vombongo, na wina imba mbe notupa moskole. ( oparagrafa 3-16 no  24) Indu tji ma yandja orupa komuhongwa, ma sokuripurira kotjiwondo tje, kondjiviro ye, nokutja omuhongwa kaaṋi ngo ke nokuputarisa varwe mena rokutja katjihorera otjiwa mepu ndi mari hungirirwa ko. Eye wina ma sokuripurira komapu tjingewo ngo indu tji ma yandja otupa twarwe twombongarero yombongo kovandu varwe. Orupa aruhe maru sokuyandjwa ovivike ape vitatu komurungu woruveze. Otupa twovahongwa matu sokutjangwa moforoma ndji Our Christian Life and Ministry Meeting Assignment (S-89). Omutarere wombongarero ma sokutara kutja ongongorasaneno yotupa atuhe twombongarero yombongo tu ri kotjimborta tjomatjivisiro wombongo. Orutu rwovanene vombongo maru yenene okuzika omunene wombongo warwe poo omuvatere wombongo okumuvatera. Posi ya, ovanene vombongo uriri ombe nousemba wokutoorora ovarumendu ovakambure okuyandja otupa tu tu he ri twi twoskole.

24. Otjivike atjihe, omunene umwe wombongo ongu ma karere otjomuhaamise wombongarero aihe. (Ozombongo nḓe nouhepe wovanene vombongo maze yenene okuungurisa ovavatere vombongo, indu tje ri ohepero.) Eye ma kara nomerizirira wokurongerisa omambo wokupaturura nokupata ombongarero. Eye wina ma tjivisa otupa atuhe twombongarero, nu otja kotjivaro tjovanene vombongo mbe ri po eye ma yenene okuungura otupa tjiva twombongarero wina, tjinenenene orupa ndu maru raisa ouvidio uriri nokuhinokuhungirira ko. Omuhaamise wombongarero ka sokuhungira oviṋa ovire pokati kotupa pekepeke. Orutu rwovanene vombongo ondu maru toorora kutja ovanene veṋe vombongo mbu mave yenene okuyandja orupa ndwi. Ovanene vombongo mba toororwa mave yandjasana oruveze okuungura otjiungura hi. Omutarere wombongarero ma yenene okuungurisiwa tjinene otjomuhaamise wombongarero povanene varwe vombongo. Indu omunene wombongo tja toororwa i yorutu rwovanene vombongo okuhongorera po Omakonḓononeno wOmbeibela wOmbongo, eye potuingi ma yenene okurira omuhaamise wombongarero. Posi ya, zemburuka kutja omunene wombongo ngu ma karere otjomuhaamise wombongarero ma sokutanga imba mbe notupa moskole nokuvepa omaronga momuano worusuvero, indu tje ri ohepero. Omuhaamise wombongarero wina u nomerizirira wokutjita kutja ombongarero i yande moruveze. ( Oparagrafa 17 no  19) Omuhaamise wombongarero tji ma vanga nu tji pe noruveze ndwa yenene kombanda, mape tuwa ombako yarwe komurungu omuhaamise wombongarero pu ma tjivisire otupa atuhe tu matu yandjewa, kutja omurumendu omukambure ngu mee ku yandja orupa kaaṋi ndo ma kurame rukuru kombanda mbo. Momuano tjingewo, omuhaamise wombongarero tji ma vanga ma yenene okuhaama komurungu, ngunda omuhongwa ama lese Ombeibela, nu wina ma yenene okutjita nao morupa ndwi Ungura oukukutu motjiungura tjokuzuvarisa tji maru kayendisiwa. Okutjita nao, maku vatere kutja atu ha morosa oruveze.

25. Tji mape sora, ma rire nawa okutoorora omunene wombongo ngu ri omuhungire omuwa okuungura otjiungura hi. Otjiungura tjomuyandje womaronga omutjavari, otjokuyandja omaronga ngu maye heperwa po kovanene vombongo novavatere vombongo kourike wawo, ohunga nomuano wokuungura otupa twawo, tjimuna pombongarero yEhupo retu rOukriste notjiungura tjetu tjokuzuvarisa, omahungi, nokukayendisa Omakonḓononeno wokambo kOruhungu poo omalesero wOmakonḓononeno wOmbeibela wombongo. ( Oparagrafa 19) Tji pe novanene vombongo ovengi mbe ri ovayandje vomahungi novahonge ovasemba, okutja ombura aihe mape sokutoororwa omuyandje womaronga omutjavari warwe. Kahepero komuyandje womaronga okuyandja eronga korupa aruhe ndwa yandjwa.

26. Okuisira kotjivaro tjovazuvarise mbe ri po, ombongo mai yenene okukara noskole oitjavari. Oskole aihe mai sokukara nomuyandje womaronga ngwa toororwa i yorutu rwovanene vombongo, nu tji mape yenene eye nga rira omunene wombongo. Tje ri ohepero, omuvatere wombongo ngwa toororwa i yorutu rwovanene vombongo, ma yenene okuungura otjiungura hi. Orutu rwovanene vombongo ondu maru sokutya kutja ouṋe ngwa pu okuungura otjiungura hi, nokutja orupa ndwi maru sokuungurwa i yomundu umwe uriri poo indee. Omuyandje womaronga ma sokukongorera omirari mbya yandjwa  moparagrafa 18. Tji mape kara oskole oitjavari, ovazuvarise mbe notupa moskole ndjo mave sokuraerwa kutja ve yende ketuwo oritjavari kombunda yorupa ndwi, Okupaha ovihuze mOmbeibela ndu ri kehi yorupa ndwi Ovihuze okuza mEmbo ra Mukuru. Mave sokurikuta ku nombongo kombunda yorupa orusenina rwoskole.

27. Ouvidio mbwa toororwa ombu mau ungurisiwa pombongarero yombongo. Ouvidio wombongarero yomokati kotjivike mau vazewa moprograma ndji JW Library^® nu mo yenene okuungurisa mouyendjezewa pekepeke.

© 2023 Watch Tower Bible and Tract Society of Pennsylvania

S-38-HR 11/23