Mombura ndji 2020, twa muna omaumba omengi tjinene, nu kombanda yanao kwa handjauka omutjise woCorona mouye auhe. Omomuano uṋe Ovahongonone va Jehova mu va vatera imba mba ṱunwa i omaumba nga?

 Mombura yoviungura vyetu ndji 2020, a Okomiti yovaworonganise yOrutu Orunane ya yakura omatau 28 0000 b okuvatera imba mba wirwa i oumba. Ombatero ndji ya vatera imba mba ṱunwa i omaumba wokombanda 200, mu ma mu kamburire mo omutjise woCorona, ovivepo ovisukusuku, omipupo moAfrika, ouhepe wovikurya moVenezuela, nourumbu moZimbabwe. Oviyandjewa vyouharupu vya vatera okuranda ovikurya, omeva, oruveze ovandu pu ve ṱizirwa, ozombanda, omiti omipange, oviṋa mbi kohorora otuveze, nokutungurura omatuwo nga ṱunwa i omaumba nga. Ngatu tare kovihorera tjiva.

 OCOVID-19. Mouye ongondoroka omutjise mbwi wa ṱuna kovakambure ovakwetu kotutu, momiinyo, na mongorongova. Kutja ve yenene okuvaterwa, pa zikamisiwa ozokomiti (DRCs) zokombanda 800 mouye okuvatera imba mba wirwa i omaumba. Ozokomiti nḓa ze tara kovihepwa vyovakambure ovakwetu, nokuyandja ondjivisiro ko kOmiti yovaworonganise okutjiwa kutja omomuano uṋe mu mave yenene okuvatera.

 Oure wombura aihe ozokomiti (DRCs) nḓa ze vatera ovengi okumuna ovikurya, omeva, oviṋa mbi kohorora, nomiti omipange. Motuveze tjiva ozokomiti nḓa ze ungura kuna ovanene vombongo okuvatera ovakambure ovakwetu okumuna ombatero ndji za kohoromende.

 Ovandu mbe heri Ovahongonone va Jehova va muna kutja tu muna ombatero okuza kotjira tja Jehova. Otjotjihorera, Field Simwinga omunane wokarukondwa ka Naconde moZambia, wa raera ovakambure ovakwetu kutja, “Matu tja okuhepa koviyandjewa vyouharupu mbye ya moruveze orusemba, nu mbya yenene vatere komaṱunḓu ngu maye hepa ombatero.”

 Ouhepe wovikurya moAngola. OCOVID-19 ya tjita kutja ape ha kara ovikurya mbya yenene moAngola nu ozopereisa zovikurya za yeruruka ko tjinene. Ovakambure ovakwetu ovengi kaave yenene okuranda ovikurya.

 Orutavi rwa Brazil rwa ningirwa okuhinda ovikurya kovakambure ovakwetu moAngola. Okuungurisa oviyandjewa vyouharupu momuano omusemba, ovakambure ovakwetu va tjita omakonḓononeno okutara kutja omuano uṋe omusemba mu mave yenene okuranda nokuhinda ovikurya. Kunao ovikurya avihe mbya randwa, pu nokuhindwa kehi rarwe avihe mbi vya kosa ozondola ape 22, ekutu arihe ndi nondjinda yozokilograma 20, nu momakutu nga mwa ri oruihi, omakunde, omaze wovikuki na vyarwe ovingi. Omakutu wovikurya nga hindwa koAngola 33 544, nu ye nonḓengu yozotona 654 (721 U.S). Oviyandjewa vyouharupu na imbi mbya yandjewa i yehi orini vya vatera ovandu vokombanda 50 000.

 Ovambure ovakwetu vari noumune uṋe ohunga nombatero ndji? Alexandre ngu hupira motukondwa twokozombanda moAngola wa tja: “Ihi tja ri otjiraisiro tjokutja Jehova we ndji suvera nu kawami erike. Nokutja wina owami omunanḓengu kotjira tja tje.” Mariza omukazendu omukombe wa tja: “Jehova wa zuva ondjuriro yandje. Ami me tja ndangi ku ye na kotjira tje.”

 Ombatero kOurumbu moZimbabwe. Ombura vyoviungura vyetu ndji 2020, ehi ra Zimbabwe ra ha verwa i ourumbu ounene tjinene. Ourumbu mbwi wa isa ovandu ovengi nondjara ovakambure ovakwetu moZimbabwe ve nouhepe wovikurya.

 Pa zikamisiwa ozokomiti (DRCs) ndano nḓu maze vatere okuyandja ovikurya kovakambure ovakwetu. Otjingi tjovakambure ovakwetu ve ri yandjera okuvatera nokupaka ovikurya, okuherura, okuyandja ovitoore vyawo kutja vi ungurisiwe okuhandjaura ovikurya mbi c. Mombura yoviungura vyetu ndji 2020 ozondola za America 691 561 za ungurisiwa okuvatera ovandu mbe ri kombanda 22 700.

 Ovakambure ovakwetu vari a va mana ovikurya vyawo indu ombatero ndji tji ye ya. Indu ovikurya tji vya vaza, ovambure ovakwetu aave tanga Jehova. Nandarire tjiva aave imbura omaimburiro wOuhona.

 Motjihuro tjimwe ovakazendu ovakambure ovahepundu vevari va ri pombongarero yotjiwaṋa ndja i hungirire kombatero yovikurya ndja yandjwa i yotjira tji tji heri tjohoromende (NGO). Posiya ombongarero ndji ya uta okuhungirira koviṋa vyozopotika, kunao ovakazendu ovakambure va tya okuhina okuyakura ombatero ndji. Owo tji va pita mombongarero ndji otjimbumba tjovandu tja uta okuvetjita ouhahu nokuveraera kutja, “Amu yekupaha ovikurya kweṱe rukwao!” Ovivike vivari kombunda yanao ovakambure ovakwetu va vaza motjirongo ho nu ave yandja ovikurya kovakazendu ovakambure mbo, ngunda ombatero okuza kotjira tji tji he ri tjohoromende itji NGO, ai hiya va za!

 Okomiti ndji yandja ombatero ku imba mba wirwa i oumba moZimbabwe, ya yandja otjihorera otjiwa kovandu mbe ha ri Ovahongonone va Jehova. Ngatu tare kotjihorera tja Prisca ngu kara kotukondwa twokozombanda. Kutja pari nouzeu wourumbu, Prisca aa kaungura otjiungura tjokuzuvarisa Oritjatatu na Ritjatano aruhe, nandarire moruveze rwokukuna. Ovandu motjirongo ma kara aave mu tjiti ouhahu nave tja: “Ma zepaisa oveṱunḓu re kondjara mena rokuzuvarisa.” Posiya Prisca aa ziri na tja: “Jehova ka zembi ovakarere ve.” Kombunda yanao eye wa muna ombatero okuza kotjira tja Jehova. Ihi tjatemisa ovararanganda ve, nu tjiva va tja ku Prisca: “Mukuru ke ku zemba, nambano matu vanga okurihonga ovingi ohunga naye.” Ovararanganda ve hambombari ve puratena kombongarero yombongo ndji pitisiwa moradio.

 Otja tji matu ya komaandero wouye mbwi, matu munu omauzeu omengi. (Mateus 24:3,7) Matu tja ndangi koviyandjewa vyeṋu vyouharupu mbi mu yandja momiano pekepeke, nokupitira morungovi ndwi donate.pr418.com. Oviyandjwa mbi vi vatera imba mbu mave hepa ombatero moruveze orusemba.