Otja ovandu ovengi pu ve papitisiwa mombura aihe, kunao tu hepa okutunga otuveze otwingi okuungurisa momerikotameneno wetu kuna Jehova. Kunao, orupa romatungiro ndwi, Local Design/Construction mouye auhe rwa tya okutunga nokuṱuna otuveze twomerikotameneno twokombanda 2 700 mombura yoviungura vyetu a 2020.

 Ouhumandu, ondando ndji ya yarurwa ombunda mena romutjise woCorona. Okomiti yomapitisiro yOrutu Orunane ya tjaera omatungiro omengi mouye auhe, ihi tja tjitirwa okutjevera ovakambure ovakwetu nokupuratena komaraa wohoromende. Posiya, mombura yoviungura vyetu 2020, otuveze twomerikotameneno twokombanda 1 700 twa yenena okutungwa nokuṱunwa komurungu womutjise woCorona. Nu wina otuveze twokombanda 100 twa yenena okutungwa okuza porutavi romberoo. Tara kutja omomuano uṋe otuveze tuvari tu twa manuka okutungwa mu twa eta ouwa kovakambure ovakwetu.

 Orutavi rwomberoo rwa Cameroon. Orutavi rwomberoo rwa Douala, rwa ri oruveze oruṱiṱi nu aaru hepa okuneneparisiwa. Okomiti yomapitisiro ya tya okutungurura orutavi rwomberoo ndo, posiya otjimariva tjaa tji sokuungurisiwa tja ri otjingi tjinene okukapita oruveze rwomberoo ndo. Owo wina va kondjisa omuano warwe wokutunga oruveze orupe poo okuranda oruveze ndu mave ṱunu koupe, posiya avihe mbi kavi tuurungire.

 Moruveze ndo, ovakambure ovakwetu va zuva kutja komanene wa Douala ohoromende ya tye okutunga ondjira ndji mai kapitira petuwo rOmaworonganeno wOrukondwa. Ondjira ndji mai tjiti kutja oviungurisiwa vi yenene okuyetwa oupupu poruveze ndo. Imbi vya yenenisa ondando yorutavi rwomberoo. Kunao, Orutu Orunane rwa yakura omatungiro worutavi romberoo orupe meṋe yetuwo rOmaworonganeno worukondwa.

 Ovakambure ovakwetu novatunge mbe he ri Ovahongonone va Jehova va ungura pamwe, kunao ihi tja tjita kutja ve ungurise otjimariva noruveze momuano omuwa. Kunao, otjiungura hi tja ungurisa ozodola omangete yevari (U.S.) pu ihi tja tji undjirwa ko! Nu eṱunḓu roBetel ra yenena okutjindira koruveze rwawo orupe ngunda omutjise woCorona au hiya handjauka.

 Ovakambure ovakwetu poBetel ya Cameroon ve tjaterwa okukara nokuungurira poruveze rwawo orupe, nu owo ve muna orutavi romberoo orupe ndwi otjotjiyandjewa okuza ku Jehova. Ovakupasane vemwe va tja: “Eṱe matu vanga okuungura oukukutu nokuraisa ondangi kotjiyandjewa hi.”

 Omberoo yomatorokero ya Tojolabal, moMexico. Oure wozombura ozengi, otjimbumba tjovatoroke tja Tojolabal aatji ungurire porutavi rwomberoo rwa Central America, meṋe yotjihuro Mexico. Posi yokutja, eraka rOtjitojolabal ri hungirwa tjinene moAltamirano na Las Margaritas, ape ozokilometa 1 000 okuza motjihuro tja Mexico. Kunao, ovatoroke aave munu ouzeu okutjiwa omuano eraka rOtjitojolabal mu rirunduruka. Nu orutavi romberoo aa ru muna ouzeu okumuna ovakambure ovakwetu okuvatera momatorokero na momakamburiro weraka mOtjitojolabal.

 Mena repu ndi, Okomiti Otjange yOrutu Orunane aa i vanga okutjindisa okambumba komatorokero keraka rOtjitojolabal koruveze ku ku hungirwa eraka ndo tjinene. Okuyenenisa ondando ndji orutavi romberoo rwa tya okuranda oruveze nokuruṱuna. Okutjita nao, maku pwike otjimariva pendje nokutunga poo okuhira oruveze.

 Omutoroke umwe wa raisa omuano ma muna ouwa eye wa tja: “Oure wozombura omurongo nḓu mba ungura porutavi romberoo hina pu mba hakaena pu neṱunḓu ndi hungira eraka randje. Nai omberoo yetu i ri poruveze pu pe novahungire ve ra rOtjitojolabal. Eyuva arihe mbi hakaena ku novahungire wotjiraka tjOtjitojolabal. Ihi tja tjita kutja mbi rihonge omambo warwe omape nu oviungura vyandje vyomatorokero vya pwira ko.”

 Indu ongaro yetu tji mai tu yandjere, mombura yoviungura vyetu 2021, pe nondando yokutunga ozomberoo romatorokero 75 notuveze tozoskole zOuhona. Nu oviungura hambondatu ovinene vyorutavi romberoo mavi kayenda komurungu okutungwa, tjimuna omberoo Ohongora poRamapo, tja New York, na wina orutavi rozomberoo rwa Argentina na indwi orwaItaly. Kombanda yanao, pena Omatuwo wOmerikotameneno wokombanda 1 000 omape ngu maye sokutungwa, nu pe notuveze twomaworonganeno twokombanda 6 000 tu matu sokutungururwa, nu Omatuwo Omerikotameneno 4 000 maye sokuṱunwa.

 Otjimariva tji tji ungurisiwa kokutunga nokuṱuna tji za pi? Mbuti Lázaro González, okaṋepo kokomuti yorutavi romberoo ya Central America, wa zira epuriro ndi, indu tja hungire ohunga nomatungiro womberoo yomatorokero ya Tojolabal. Eye wa tja: “Momaturiro wetu katu noviungurisiwa mbya yenene, nokuhina ombatero yovakambure ovakwetu katja tu yenena okutunga ozomberoo zomatorokero zomaraka pekepeke. Otjimariva tjouharupu okuza kovakambure ovakwetu ongondoroka nouye tja tjita kutja i rire oupupu kovatoroke kokutja ve yenene okukara momaturiro mu mu hungirwa eraka rawo. Kunao matu tja ndangi kouharupu wovakambure ovakwetu mouye auhe.” Otjingaperi kutja, oviungura vyokutunga vi yenenisiwa mena roviyandjewa vyouharupu kOviungura vyOuye Auhe, ovingi mbi yandjewa okupitira morungovi ndwi donate.pr418.com, okuhepa tjinene koviyandjewa vyeṋu vyouharupu.