Mombura aihe ovakambure ovakwetu mbe ungurira Jehova oruveze aruhe ve ṋangwa koskole ya Gilead, ndji kara poWatchtower Educational Center moPatterson, tja New York. a Poskole ndji ovahongwa ve rihonga omuano wokukara nondoṋeno moviungura vyawo pekepeke motjira tja Jehova. Omahongero nga ye yandja omasa nokuzikamisa ozombongo notutavi twozomberoo motjira tja Jehova mouye auhe.

 Tjiri oGilead oskole youye auhe. Otjotjihorera oklasa ndji 147 ndja tjitwa mo 2019, ya ri novahongwa 56 okuza momahi 29. Ovahongwa mba ri poskole ya Gilead aave karere Jehova oruveze aruhe tjimuna moBetel, ovatarere mbe varura ozombongo, ovahindwa, novakandjira vapeke.

 Omerirongerisiro woskole ye uta rukuru ngunda orupa orutenga romahongero aru ha uta. Otjotjihorera orupa ndwi WHQ Travel rurandera imba mbu mave ya koskole oukarata wonḓera. Oklasa ya Gilead ndji 147, omuhongwa auhe okuyenda nokuza koPatterson aa ku mu kosa N$ 16 506.62. Ovahongwa okuza kokakoverwahi kaSolomon aave sokutoora ozonḓera ine okuvaza koPatterson, na zarwe ndatu okuyaruka konganda, ouyenda mbwi wa ri nozokilometa zokombanda 35 400! Okakarata komuhongwa auhe aa kekosa N$ 35 316.50. Kutja atu ha ungurisa ovimariva ovingi orupa ndwi WHQ Travel ru ungurisa oviunguriswa mokombiuta okupaha oukarata wonḓera mbu nozopereisa zokehi. Nandarire kutja va munu oukarata wonḓera kopereisa yokehi, oprograma yokombiuta i kayenda komurungu okupaha kutja pe nozopereisa nḓa yaruka kehi poo indee. Orupa ndwi WHQ travel wina ru ungurisa ozopenda nḓe tjita kutja omundu ma ronde onḓera otjari nḓe yandjewa i ovakambure ovakwetu noukarata mbu tjita kutja omundu ma rande otjari mozostora.

 Ovahongwa ovengi ve hepa ombapira yokuhita momahi Omakutasane wa Amerika. Kunao, Orupa roviṋa vyOveta pomberoo Ohongora ru vatera ovahongwa okumuna ombapira ndji. Otjimariva tjokuritjangisa nombapira yomuhongwa auhe i kosa ape N$ 7 831.05

 Ouwa waye mbu tu muna okuza komahongero ovahongwa mba ngu va muna? Hendra Gunawan ngu karerera otjomunene wombongo kuṱa komamuhowehi ra Asia, u ri mombongo ku novakupasane mbaza kOskole ya Gilead. Eye wa tja: “Komurungu wa nao mombongo yetu kamwa ri ovakandjira ovakarerere. Owo tji ve ya otjihorera tjawo otjiwa noupyuke vya ṱuna ku varwe, novakambure ovakwetu mombongo va uta okukarera otjovakandjira ovakarerere. Nu kombunda yanao omukazendu omukambure mombongo yetu wa ya kOskole yOvazuvarise vOuhona!”

 Sergio Panjaitan u ungura puna imba mbaza koGilead poBetel kuṱa komamuhowehi ra Asia. Eye wa tja: “Omahongero ngu va muna kayeetere ozondaya kuwo uriri, nungwari ya eta ozondaya kweṱe atuhe. Owo ve rihonga ovingi! moruveze rokurimuna kutja ovasemba povandu varwe, owo ve haṋasana oviṋa mbi ve rihonga kuna varwe. Ihi tji tu tunduuza kutja tu yenene okuvatera varwe wina.”

 Ovimariva mbi ungurisiwa poskole ndji vi za pi? Ovimariva vi za koviyandjewa vyouharupu vyouye auhe mbi yandjewa okupitira morungovi ndwi donate.pr418.com. Matu tja okuhepa koviyandjewa vyeṋu vyouharupu mbi vatera oskole mu mu hita ovahongewa okuza komahi pekepeke.