Ovahongonone va Jehova ve ungura oviungura ovinanḓengu okuvatera ovandu momahi wokombanda 200. Posiya omahi 35 uriri onge novimariva mbya yenene okuranda ovihepwa vyawo. Omomuano uṋe omahi nge hi novimariva mbya yenene mu ye ṱakamisa ovihepwa vyawo?

 Orutu Orunane ru tara koviṋa Ovahongonone va Jehova mbi mave hepa mouye auhe kutja ve rikotamene ku Ye nokuzuvarisa ombuze ombwa. Otjimariva tji ungurisiwa nawa koviṋa mbi mavi heperwa po nongengezero. Indu Orutavi romberoo tji rwa munu ovimariva ovingi okukapita imbi mbi mavi heperwa po, ru tjita kutja otjimariva tji tja hupu tji kavatere omahi nge nouhepe. Ondyero ndji i kongorera otjihorera tjOvakriste voruveze orukuru, mbaave vaterasana “pu pe ṱeki pamwe.” (2 Ovakorinte 8:14) Owo aave ungurisa ovihupe vyawo okuvatera Ovakriste mba ri nouhepe.

 Hapo ovakambure ovakwetu mba muna ovihupe mbi okuza kotutavi twarwe va ri noumune uṋe? Otjotjihorera ohinga yovature moTanzania, ve hupa kehi yozodola N$35 meyuva, kunao ovimariva ovihupe okuza kotutavi twarwe vya yenena okuvevatera okuṱuna Etuwo rOmerikotameneno rwa Mafinga. Ombongo ya tjanga nai: “Kombunda yomaṱunino nga otjivarero tjovandu mbe ya kombongarero yombongo tja yeruruka! Matu tja ndangi kouharupu wotjira tja Jehova na imbwi wovakambure ovakwetu mouye auhe, mbwa tjita kutja tu yorokere oruveze romerikotameneno oruwa ndwi.”

 Tjiva wovakambure ovakwetu moSri Lanka va ri nouhepe wovikurya mena romutjise mbwi oCoronavirus. Ihi ma tji kamburire mo Imara Fernando nokazandona ke, Enosh. Okuhepa tjinene koviyandjewa vyouharupu okuza komahi warwe owo va yenenene okumuna ombatero. Mokakarata ku va ungurire oveni va tjangere kutja, “Matu tja ndangi kovakambure ovakwetu mbe tu raisira orusuvero moruveze rouzeu indwi. Eṱe tjiri tu nonyuṋe okurira orupa rweṱunḓu ndi, nu matu kayenda komurungu okuningira ombatero ku Jehova mokumbiro okuvatera ovakambure ovakwetu momayuva omasenina nga.”

 Kainatja kutja ovakambure ovakwetu vatura pi, owo ve kayenda komurungu okuhaṋasana mbi ve navyo kuna varwe. Otjotjihorera, Enosh wa ungura okambakete okaṱiṱi okupwikira mo ovimariva vyouharupu kokutja ma yenene okuvatera omaṱunḓu nge nouhepe. Guadalupe Álvarez wa raisa ombepo otjingeyo youharupu indjo. Eye wa tura morukondwa rwa Mexico mu ve muna otjitjamurongo tjokehi. Nandarire kutja u ri mongaro ndjo eye u yandja pu ma yenene kotjira tja Jehova. Eye wa tjanga nai: “Ami mbi nondangi kouwa wa Jehova norusuvero rwe oruṱakame. Ami mbi tjiwa kutja oviyandjewa vyandje vyouharupu vi weziwa kovikwao okukavatera ovakambure ovakwetu mbe nouhepe.”

 Otutavi twozomberoo tu tu hinda ovimariva kotuveze ku ku nouhepe, tu tjaterwa tjinene okutjita nao. Anthony Carvalho ngu vatera mOkomiti yorutavi romberoo rwa Brazil wa tja: “Oure wozombura ozengi oviungura mehi retu aavi hepa ombatero yotjimariva okuza komahi yarwe, mena rombatero ndji otjivarero tjovandu mouatjiri tja yeruruka. Nai, ouhepe wetu wotjimariva wa runduruka nu tu nondjikonekero yokuvatera varwe. Ovakambure ovakwetu moBrazil ve tara kotjiungura tjokuzuvarisa mouye auhe nu ave tara kutja mave vatere vi.”

 Omomuano uṋe omuwa Ovahongonone va Jehova mu mave yenene okuvatera ovakambure ovakwao mbe nouhepe? Ka ku hinda ovimariva ongarate kotutavi twozomberoo komahi warwe, posiya okuyandja ovimariva vyouharupu kOviungura vyOuye Auhe. Ma mu yenene okutwamo ovimariva vyouharupu moukesa mbwa tjangwa “Oviungura vyOuye Auhe” poo okuyandja okupitira morungovi ndwi donate.pr418.com. Tu nondangi onene koviyandjewa vyouhaurupu otja imbyo.