ORussia ya uta okuumba oUkraine tji ya ri 24 ku Februari 2022, ihi tja tjita kutja ovandu ovengi ve kare moumba, nu ve hakahane okupita mehi. a

 “Mwa ri ovipamuke ovingi. Ya ri noviṋa mbyaavi tu tirisa omundu mbi u hi nokuyenena okukahurura. Indu tji twa tjiwa kutja pe nozomahina nḓu maze vatere ovandu okutaura, twe ri pura okupita tjimanga. Eṱe aa tu sokuisa avihe kombunda, mena rokutja auhe aa hepa okutoora okaaṱu okaṱiṱi uriri. Aa tu hepa okutoora opassport noID nomiti omipange, omeva oureke noutjepsa. Eṱe twa isa oviṋa avihe vyarwe kombunda a twi korutenda rwomahina, ngunda ovipamuke omavi pamuka ongondoroka na eṱe.”—Nataliia, okuza Kharkiv, Ukraine.

 “Eṱe kaatu ripurire ko kutja mape ya aku kara ovita. Ami ee zuu omingunda motjihuro, nu otuiho aa tu nyinganyinga. Ami mba tya okutaura nokutoora oviṋa mbi me hepa uriri. Ami mba zapo ponganda mo 8:00 yomuhuka omunene, nekaronda omahina ndji ma ii koLviv, nokuzambo e karonda ombesi okuyenda koPoland.”—Nadija, okuza Kharkiv, Ukraine.

Morupa ndwi matu katara ku imbi:

•  Ovikeṋa mbya tjitisa kutja ovandu ve taure?

•  Ovikeṋa mbi mavi yenene okutjita kutja ovataure ve kare nomaundjiro?

•  Hapo Ombeibela mai yenene okuvatera ovataure?

 Ovikeṋa mbya tjitisa kutja ovandu ve taure?

 Ovita moUkraine vya uta mena rokutja orupa rwovita rwa Russia rwa uta okuumba oUkraine. Ombeibela i vandurura oviṋa mbi kayetisa kutja pe kare ovataure.

•   Ozohoromende zovandu mouye auhe kaze toṋene okuvatera ovandu noviṋa mbi mave hepa. Ozohoromende potuingi ze ungurisa ouvara wazo mokuṋiṋikiza ovandu.—Omuzuvarise 4:1; 8:9.

•   Satan omudiaboli, “omuhonapare wouye,” u ungurisa ombepo ombi okupopa ovandu, ku nao Ombeibela i tja: “Ouye auhe u ri kehi youhonapare waingwi umwe Omunaurunde.”—Johanes 14:30; 1 Johanes 5:19.

•   Pendje nomauzeu ovandu ngu va muna oure wombura ozengi, eṱe nai tu hupa moruveze Ombeibela mu ya hunganeka kutja: “Momayuva omasenina mamu kara otuveze otuzeu.” ( 2 Timoteus 3:1) Nu momayuva ngo mamu kara ovita, omaumba, ondjara, nomitjise, ovitjitwa mbyo mavi tjiti kutja ovandu ve ise ozonganda zawo.—Lukas 21:10, 11.

 Ovikeṋa mbi mavi yenene okutjita kutja ovataure ve kare nomaundjiro?

 Ombeibela i vandurura Omuute wetu Jehova Mukuru, b ngwa suvera, nu ngu raisa otjari kovataure novandu mba isa ozonganda zawo. (Deuteronomium 10:18) Eye wa kwizika okuzengurura omauzeu nge tjitisa kutja pe kare ovataure, okupitira mohoromende ye yomeyuru ndji isanewa Ouhona wa Mukuru ndji mai pingenisa ozohoromende zovandu. (Daniel 2:44; Mateus 6:10) Jehova ma ungurisa Ouhona we okuisa po Satan Omudiaboli. (Ovaroma 16:20) Ohoromende ndjo mai honaparere po ouye auhe, nu mai kaisa po ohaṋi ndja etwa i yoviwaṋa. Ovandu avehe mave rire eṱunḓu rimwe mouye auhe. Kapena ngu ma isa onganda ye, Ombeibela ya kwizika nai: “Auhe ma haama mohange kehi yomuvite na kehi yomukuyu we, nokuhinarive me mu handuza. Muhona Omunamasaaehe ongwa kwizika otjiṋa hi.”—Mika 4:4.

 Ouhona wa Mukuru porwe ombu mau yenene okuyeta omazengururiro omakarerere koviṋa mbi tjita kutja pe kare ovataure ndino. Jehova ma ungurisa Ouhona we okukaisa po omazeu nge ṋiṋikiza ovandu okurira ovataure. Tara kovihorera tjiva mbi:

•   Ovita. Jehova “u yandisa ovita.” (Epsalme 46:9) Tji mo vanga ondjivisiro ohunga nomuano Mukuru mu ma yandisa ovita, lesa orupa ndwi, “Peace on Earth—How Will It Come?”

•   Oṋiṋikizire noutwe. Jehova ma “kutura omiinyo vyawo kondatumisire na kozondjito zoutwe.” (Epsalme 72:14) Tji mo vanga ondjivisiro ohunga nomuano ovandu mu vandurura ozongaro zawo, lesa kotupa ndwi, “Breaking the Cycle of Hatred.”

•   Osyona. Jehova ma “yama omusyona ngu ma ku ombatero.” (Epsalme 72:12) Tji mo vanga ondjivisiro ohunga nomuano Mukuru mu ma isa po ousyona lesa orupa ndwi, “Is a Fair Economic System Possible?”

•   Ondjara. “Ngamu kare ovikokotwa ovingi mehi.” (Epsalme 72:16) Tji mo vanga ondjivisiro ohunga nomuano Mukuru mu ma kaisa po ondjara, lesa orupa ndwi, “A World Without Hunger?”

 Hapo Ombeibela mai yenene okuvatera ovataure?

 Ii. Pendje nokuraera ovataure ohunga nomaundjiro woruyaveze, Ombeibela mai yenene okuvevatera nomauzeu ngu ve na wo nai.

 Omurari wOmbeibela: “Amu rikendere otjiṋa, nungwari mozongumbiro zeṋu azehe ningireye ku Ndjambi imbi mbi mwa hepa, aruhe amamu tja okuhepa ku Ye. Nohange yaNdjambi ndja kapita ozondunge azehe zovandu mai ṱakamisa omitima vyeṋu nouripura weṋu mu Kristus Jesus.”—Ovafilipi 4:6, 7.

 Mari hee nai: Ningira ku Mukuru kutja me kupe ohange noupore momuinyo, mongaro aihe mu u ri. Lesa orupa ndwi, “Philippians 4:6, 7—‘Do Not Be Anxious About Anything.’”