Jesus we tu vatera okumuna kutja matu yenene vi okumuna kutja “Ouhona wa Ndjambi wa tumbuka.” (Lukas 21:31) Eye wa hunganenka kutja maku kara ovita, omanyinganyingiro wehi, ondjara, nomitjise, mbiri oviṋa mbi tu muna ndino.—Lukas 21:10-17.

Ombeibela wina ya tja “momayuva omasenina” wouhonapare wovandu, ovandu mave kara nozongaro ozombi. Ove mo yenene okulesa ohunga nozongaro nḓa mu 2 Timoteus 3:1-5. Omaprofetero wOmbeibela tjiri ye hitasana nozongaro novitjitwa ndino.

Ihi matji hee tjike? Oruveze rwa tumbuka Ouhona wa Mukuru okutjita omarundurukiro omanene ngu maye ṱunu kweṱe momuano omuwa. (Lukas 21:36) Mombeibela, Mukuru wa kwizika oviṋa oviwa ku imba mbu mave katura kombanda yehi. Ngatu tare kovihorera tjiva.

“Eye [Jesus] wa pewa ouvara nondjozikiro nomasa wokuhonapara, kokutja ovandu voviwaṋa novomihoko avihe nowomaraka aehe ve rikotamene ku ye. Ouvara we mau karerere nga aruhe, nouhona we kamaau yanda ko.”—DANIEL 7:14.

Ihi matji hee tjike: Mo yenene okuyorokera ehupo kehi yohoromende ndja zikwa i Mukuru nu ndji na Jesus otjOmbara.

“Nu kape nomundu ngwa tura mehi retu, ngu ma unauna rukwao kutja eye wa vera.”—JESAJA 33:24.

Ihi matji hee tjike: Mo yenene okuhupa nga aruhe nokuhinokuṱa, okuvera poo okuremana.

‘Eye ma yandisa ovita mouye auhe.’ —EPSALME 46:9.

Ihi matji hee tjike: Ovita nouzeu mbu tu muna mena rovita mau isapewa.

“Omurunde tjandje ke tji po . . . Ovanandjenda mave rumata ehi.”—EPSALME 37:10, 11.

Ihi matji hee tjike: Kape nokukakara ovandu ovarunde, nungwari owo mba mbe nonḓuviro ku Mukuru uriri.

“Ovandu mave tungu ozondjuwo nave tura mo oveni; mave kunu omivite nave ri ovihape vyavyo.”—JESAJA 65:21, 22.

Ihi matji hee tjike: Ehi arihe mari rire ewa. Mukuru ma yenenisa ozongumbiro zetu zokutja ombango ye ngai tjitwe “kombanda yehi.”—Mateus 6:10.