Rose wa tja: “Ami mba kwatwa nomutjise mbwaa u tjiti kutja mbi kare nomuhihamo omunene aruhe. Ouvere wandje aau ryamene ko komurungu.” Ouzeu umwe Rose mbwa muna, owombwi wokutja eye kaa yenene okuyandja ombango komakonḓononeno we wOmbeibela, noviṋa mbi mavi tjama nomerikotameneno we. Posi yokutja eye wa vaterwa i omambo wa Jesus nge ri mu Mateus 19:26 nge tja: “Ndjambi ke notjiṋa tji tje mu ura.” Rose we rihonga kutja pe nomiano omingi mu mo yenene okutjita omakonḓononeno woye. Mena rokutja omuhihamo we aau tjiti kutja povikando tjiva aha yenene okulesa, eye wa uta okupuratena Ombeibela nomambo nge ri movipuratenwa. * Eye wa tja: “Andakuzu kapa ri ovipuratenwa, hina ku tjiwa kutja etje yenena vi okuṱakamisa oupanga wandje kuna Jehova.”

Indu Rose tje nomuhihamwatima mena roviṋa mbye hina aa yenene okutjita rukwao, eye wa muna omahuhumiṋino momambo nge ri 2 Ovakorinte 8:12, nge tja: “Omundu tje nombango ombwa na yandja otja ku imbi mbye na vyo, Ndjambi ma yakura ihi otjiyandjewa. Ndjambi ke nakuundja okupewa i omundu ngo imbi eye mbye hi na vyo.” Omambo ngo ya zemburukisa Rose kutja, Mukuru u tjaterwa i oviṋa eye mbye tjita, orondu u tjita atjihe tji ma yenene.

Elizabeth, ngwa tamunwa rukuru wa tja: “Kombunda yonḓiro yomuatje wandje omukazona wozombura 18,  tjiri mba ri nomuhihamo tjinene, nu kee kambura kutja me yenene okukayenda komurungu okuhupa. Onḓiro ye ya rundurura oviṋa ovingi.” Posi yokutja, Elizabeth wa muna omahuhumiṋino omanene momambo nge ri mEpsalme 94:19, omutjange wepsalme ma tja ku Mukuru: “Tji mba ri nomeripuriro omazeu morukoro rwandje, omahuhumiṋino woye ya tarareka omuinyo wandje.” Eye wa tja: “Ami mba kumba ku Jehova kutja me ndji vatere okumuna oviṋa mbi me yenene okuungura, mbi mavi ndji vatere okuisapo omuhihamo wandje.”

Elizabeth wa uta okuungura oviungura vyokuvatera varwe. Nu eye kombunda, wa uta okurisasaneka noukereite ovanatje mbu ve ungurisa okuperenda na wo. Owo nandarire kutja wa teka, u yenena okuungurisiwa. Momuano otjingewo, nandarire kutja eye wa ngundiparisiwa i omuhihamo, eye ngunda aa yenene okuvatera varwe. Eye wa tja: “Ami tjimanga mba muna kutja indu tji me ungurisa Ombeibela okuhuhumiṋa ovandu mbee hongo Ombeibela, ya ri omuano Jehova mee ndji huhumiṋa wina.” Eye wa tjanga omana wovandu mba tamunwa mOmbeibela, mbaa ri noruhoze. Eye wa tja: “Ami mba muna kutja owo avehe va ri ovandu mba suverere okukumba.” Neye wina we rihonga kutja, “komoo yenene okutjinda omauzeu woye, indu tji u hina okulesa Ombeibela.”

Okukonḓonona Ombeibela kwa vatera Elizabeth okuyandja ombango koruyaveze, nu kakorukapitaveze. Omaundjiro nga tamunwa mOviungura 24:15, ye mu pa omahuhumiṋino nga: “Ovandu avehe ovawa novavi mave penduka movakoke.” Hapo eye u nongamburiro ndji ṱa pi, kutja Jehova ma kapendura omuatje we omukazona? Elizabeth wa zira omuini na tja: “Ami tji me tara koruyaveze, mbi muna omuatje wandje omukazona. Mourizemburuka wandje, mbi muna oukahu kutja omuatje wandje omukazona ma kapendurwa moruveze Jehova ndwa twa po. Ami mbi rimuna puna ye motjikunino tjetu, tjimuna indu tjee mu munu meyuva nda kwatwa.”