Rosie wa tja: “Ami aruhe ee rikende noviṋa mbyaa vi munika ounene tjinene momeripura wandje, pu pe heri nao. Omatjangwa yeṋe nge mu vatera? Rimwe rawo oMateus 6:34 ndi tja: “Amu rikende neyuva ramuhuka, oro tjinga ari nomerikendero waro orini. Eyuva ngamwa arihe ri kara nouzeu waro orini.” Eye nai u tja, omambo wa Jesus ngo ye mu vatera kutja ehe rikende na imbi mbi mape ya avi tjitwa muhuka. Rosie wa weza na tja: “Ami mba ri nomauzeu omengi rukuru, kuna inga nga ri momeripura wandje ohunga noviṋa mbi vi hiya tjitwa, nu porumwe mbi vi hina maavi roro okutjitwa.”

Yasmine aa munu kutja omauzeu we ye mu havera tjinene. Eye wa tja: “Omayuva tjiva ee riri, nu ozongurova tjiva hee yenene okurara. Ami ee munu kutja okuripura ohunga noviṋa mbi aa ku tjiti kutja mbi ngundipare.” Etjangwa riṋe nde mu vatera? Eye wa tja etjangwa nde mu vatera ra ri 1 Petrus 5:7, ndi tja: “Omerikendero weṋu aehe yumbeye kombanda Ye, Eye tjinga e mu pa imbi mbi mwa hepa.” Yasmine wa tja: “Otja oruveze tjaa ru kayenda, ami ee kumbu ku Jehova, nu eye wa zira ozongumbiro zandje. Ya ri tjimuna kwa isakewa omutwaro omuzeu koviṱuve vyandje. Omeripura omavi povikando tjiva ye kotoka, posi yokutja nai me tjiwa okuyetjinda.”

Omukazendu omutanda wena, Isabella wa tja: “Ami mbi muna kutja okutwirika oviungura, otjiṋa tji mba  rumata ku tate, orondu eye wina omundu ngwa suvera okutwirika oviungura. Mbi twirika okutjita oviṋa ovinanḓengu, mena rokuvanga okuripuratena poo okutarera otiivii. Oyo ongaro ombi, mena rokutja i eta ombameno nu i tjita kutja omundu aha ungura oviungura vye nawa.” Omurari mbwe mu vatera owombwi mbu ri mu 2 Timoteus 2:15, mbu tja: “Kondja tjinene okurira omupyuke komurungu wa Ndjambi otja omuungure ngu ha sokuṱohoṋi noviungura vye.” Isabella wa tja: “Ami hee vanga kutja Jehova ma ṱohoṋi noviungura vyandje, mena rokutja mbi twirika oviungura vyandje nga keyuva esenina.” Eye tjiri wa tjita omarundurukiro omanene.

Momuhingo otjingewo, Kelsey wa tja: “Mbi kara noviungura nu mbi mavi sokumanuka, posi yokutja mbi undja nga keyuva esenina. Ihi tji tjita kutja, mbi rire, mbi kuhise ozomboṱu, nu mbi rikende tjinene. Tjiri katja ri otjiṋa otjiwa kwami.” Kelsey wa muna ombatero metjangwa rOmiano 13:16 ndi tja: “Omunazondunge aruhe rutenga u ripura ngunda e hiya tjita otjiṋa; nungwari ingwi eyova u handjaura okuhinandjiviro kwe.” Eye wa kahurura imbi mbye rihonga indu tje ripurira ko oukoto ketjangwa ndi, na tja: “Okurirongerisa nawa komurungu woruveze, ounongo. Nai mbi kara nombapira potjitiha tjandje, mu mbi tjanga oviungura avihe mbi me sokuungura. Nu ihi tji ndji vatera okurirongerisa nawa kutja e ha undju nga keyuva esenina.”

Kirsten wa tja: “Omurumendu wandje we ndjesa novanatje vane.” Etjangwa riṋe nde mu vatera? Omiano 17:17, ndi mari tja: “Epanga aruhe ri raisa orusuvero rwaro; nungwari omuangu nerumbi ve riraisa moruveze rwombamisiro.” Kirsten wa paha ombatero ku varwe mombongo. Neye hapo wa muna ombatero ndjo? Eye wa tja: “Omapanga wandje ya ri mbo aruhe okundjivatera momiano omingi pekepeke! Tjiva va isa ovikurya, novibloma pomurungu wondjuwo yetu. Povikando vitatu, otjimbumba tjovakambure ovakwetu va vatera ami novanatje vandje okutjindira kondjuwo yarwe. Omundu umwe we ndji vatera okumuna oviungura. Omapanga wandje aruhe opu ya ri tjee ve hepa.”

Elizabeth ngwa tamunwa rukuru, wina aa kondjo nourike. Kombunda yoviṋa avihe ma tuurunga, eye wa tja: “Ami ee rimunu tjimuna omundu ngu hina ehupo oparukaze, nu ngu tara kehupo ewa ra varwe. Tjiri ee rimunu ourike tjinene.” Etjangwa rimwe nde mu vatera, Epsalme 68:6 ndi tja: “Eye u yandja oruuto ku imba mba hepauka.” Delphine wa tja: “Ami ee tjiwa kutja etjangwa ndi kari nakuheya ondjuwo uriri. Nungwari, mba uta okumuna kutja Mukuru u tupa eha pu matu yenene okukara noupanga ouwa kuna ye, noruveze rwondjeverero yatjiri, ndu ku vatera okukara noupanga ouwa kuna varwe mba suvera Jehova. Posi yokutja, ee tjiwa kutja himee yenene okutumbuka popezu na varwe, tji mbi ha tumbukire popezu na Jehova rutenga. Kunao, Epsalme 37:4 re ndji vatera okutjita nao. Oro ri tja: ‘Nyanda mu Muhona, nEye me ku pe imbi omutima woye mbi mau zeri.’”

Eye korusenina wa tja: “Ami mba kamuna kutja ee hepa okukara popezu na Jehova. Eye eemundu omusembasemba. Okuzambo ami mba tjanga omanyando ngu me yenene okunyanda puna varwe, kokutja mbi kare nomapanga nga suvera Jehova. Ami mbe rihonga okumuna ouwa mu varwe, nokuhina okutara kozondataiziro zawo.”

Otjingaperi kutja, omapanga nge karera Mukuru ngunda kavandu ohomonena. Ovahongonone va Jehova ve kondja nomauzeu tjimuna ovandu varwe. Posi yokutja omahongero wOmbeibela ye tunduuza ovandu okuvatera varwe pu mave yenene. Tjiri ounongo okukara nomapanga tjimuna ngo. Nu hapo omirari vyOmbeibela mavi yenene okutuvatera nomauzeu ngu tu hina maatu yenene okuzengurura ndino, tjimuna ouvere oure nonḓiro?