Otjiṋa tji matji ku vatere tji mo vanga okutjiwa omundu nawa, okurihonga oviṋa mbya tjita nomauzeu ma tuurunga. Momuano otjingewo tji mo vanga okutjiwa Mukuru nawa, ove mo sokutjiwa imbi mbya tjita. Otja pu mo tjiti nao, mo kahimwa tji mo munu oviṋa ovingi mbye tu tjitira nai, nu mbi tjita kutja tu yenene okukara noruyaveze oruwa.

Jehova Mukuru ongu ri Omuute Omunenenene, nu “omasa we waaruhe nongaro ye otja ngu ri Ndjambi, vya vandururwa poruhaera; ovyo vi munikira kovitjitwa vye.” (Ovaroma 1:20) “Ndjambi wa utire ehi momasa we, Eye wa memene ouye mounongo we, nu wa tandavarisire omayuru mondjiviro ye.” (Jeremia 10:12) Oviutwa vya Mukuru ovihimise vi raisa kutja eye u nonḓero mweṱe.

Jehova wa mema ovandu “otja kombunikiro ye.” (Genesis 1:27) Ihi matji hee kutja eye wa tjita kutja tu yenene okuraisa ovikaṋena vye. Eye we tu mema momuano wokuyenena okuzuva nawa oumune we nomirari vye. Otja tji matu kondjo okuṱakamisa omirari vye, tu kara nondjoroka onene nomuhunga mehupo. Nu wina eye wa tjita kutja tu yenene okukara noupanga kuna ye.

Tji matu tara koviṋa Mukuru mbya uta kombanda yehi, tu muna kutja eye u noumune uṋe ohunga na eṱe. Momambo womuapostele Paulus, Mukuru “aruhe u raisa kutja Eye ongu ri Ye ngwi ngu tjita oviṋa oviwa: Eye u mu rokisira ombura okuza keyuru, nu u mu pa omakondero wovikunwa moruveze orusemba; Eye u mu parura novikurya nu e urisa omitima vyeṋu nenyando.” (Oviungura 14:17) Mukuru ketu pere oviṋa mbi matu hepa kutja tu kare nomuinyo uriri. Nungwari wetu pa oviṋa ovingi pekepeke kokutja tu yenene okukara nondjoroka mehupo. Avihe mbi oviraisiro oviṱiṱi uriri vyoviṋa Mukuru mbye zera kutja tu kare nonyuṋe mo.

Jehova wa mema ehi kokutja ovandu ve yenene okutura mo nga aruhe. Ombeibela mai tja: “Indi ehi Eye wa yandja kovandu,” nu “ke ri ungurire kutja ri kare ongaango, nungwari kutja ri rire poṋa povandu okutura mo.” (Epsalme 115:16; Jesaja 45:18) Hapo ehi mamu katura uṋe nu orure ndu ṱa pi? “Ovasemba mave rumata ehi, nu mave tura mu ro nga aruhe.”​—Epsalme 37:29.

Kunao, Jehova opa memena omurumendu nomukazendu omutenga, Adam na Eva, ne ve twa  motjikunino kombanda yehi “okutjiungura nokutjitjevera.” (Genesis 2:8, 15) Mukuru wa tja ku wo: “Kwatasaneye, takavareye nu mu urise ehi, noro ngari kare kehi yeṋu.” (Genesis 1:28) Okutja Adam na Eva va ri nomaundjiro wokukara nehupo rondjoroka ndi hina omaandero kombanda yehi. Ouhumandu, owo va toorora okuhina okukara nonḓuviro ku Mukuru nu va pandjara omaundjiro wokukara mokati ka imba “ovasemba” mbu “mave rumata ehi.” Posi yokutja, otja tji matu kamuna, ovitjitwa vyawo kavina pu vya rundurura ondando ya Jehova ohunga na eṱe poo ehi. Nungwari rutenga ngatu tare kotjiṋa tjarwe Mukuru tja tjita.

Ombeibela wina i tjiukwa otjEmbo ra Mukuru. Nu hapo ongwaye Mukuru tje tu pa Ombeibela? Epu enenenene omena rokutja u vanga kutja tu rihonge ohunga na ye. (Omiano 2:1-5) Otjiperi kutja Ombeibela kai ziri omapuriro wetu aehe ngu tu na wo ohunga na Mukuru, nu kape nembo ndi yenena okutjita nao. (Omuzuvarise 3:11) Posi yokutja oviṋa avihe mbi ri mOmbeibela vi tu vatera okutjiwa Mukuru. Eṱe tu muna kutja eye omungendu momuano mbwe tjinda ovandu. Wina tu rihonga kutja eye wa suvera ovandu mbe ri vi, nokutja wa tonda ovandu veṋe. (Epsalme 15:1-5) Tu rihonga oumune we ohunga noviṋa tjimuna omerikotameneno, ongaro yomeritjindiro, nomauini. Nu Ombeibela i tu pa omakahururiro omakahu ohunga novikaṋena vya Mukuru, okupitira momambo na movitjitwa vyOmuna we Jesus Kristus.​—Johanes 14:9.

Epu rarwe Jehova nde tu pera Embo re Ombeibela, omena rokutja u vanga kutja tu tjiwe omuano wokukara nehupo rondjoroka. MOmbeibela Jehova u tu honga omuano wokukara neṱunḓu eṋingandu, okukowa moviṱiṱi nokutjinda omauzeu wehupo. Nu otja tji mape kakahururwa kombunda mokambo nga, Ombeibela i nomaziriro komapuriro omananḓengu tjinene tjimuna: Ongwaye ovandu tji ve muna omauzeu? Ouye mbwi wa tanda pi? Ombeibela wina i kahurura oviṋa Mukuru mbya tjita kutja ondando ye i yenenisiwe.

Pe nomiano vyarwe omingi mu matu yenene okuraisa kutja Ombeibela Embo rapeke ndi mari sokuza ku Mukuru porwe. Oro ra tjangwa oure wozombura zokombanda 1 600, nu ra tjangwa i ovarumendu 40, posi yokutja ri hungirira kepu rimwe mena rokutja Mukuru ongu ri omutjange waro. (2 Timoteus 3:16) Oro irimwe romambo, nga ṱakama oure wozombura ozengi, otja tji pa raisiwa momatjanga omakuru wOmbeibela. Ombeibela wina ya yenena okutuurunga nga kundino, nandarire kutja pa tjitwa ozongondjero zokutjaera kutja ai ha torokwa, ai ha handjaurwa nokulesewa. Oyo i imwe yomambo nga handjaurwa nokutorokwa tjinene ndino. Mena rokutja Ombeibela ngamba okuiri, otjiraisiro tjokutja “embo ra Ndjambi wetu ri karerera nga aruhe.”​—Jesaja 40:8.

Otjiṋa tjarwe Mukuru tja tjita, wa yandja otjiṋa tjapeke okutupa ongamburiro yokutja ma yenenise ondando ye kweṱe. Otja tji pa tamunwa rukuru, Mukuru aa vanga kutja ovandu ve hupe kombanda yehi nga aruhe. Nungwari, indu Adam tje hina wa puratena ku Mukuru na katuka, eye kapandjarere omuinyo waaruhe kourike we uriri, nungwari ozondekurona ze wina za pandjara omuinyo. “Ouvi wa zira momundu umwe nau ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe, owo avehe tjinga ava tjita ouvi.” (Ovaroma 5:12) Mena rokutja Adam wa katuka, aape munika aayo ondando ya Mukuru kombanda ehi kamaai yenenisiwa. Hapo Jehova wa tjita vi?

Ovitjitwa vya Jehova aavi hitasana novikaṋena vye. Eye wa raisa ousemba mokuvara Adam na Eva otjovanandjo mena romukambo mbu va toora, posi yokutja wa tjita ondyero yorusuvero na vatere ozondekurona zawo kutja ze kamune oruyaveze oruwa. Mounongo we, Jehova wa tya kutja ma tjindi vi ongaro ndjo, nu tjimanga wa  tjivisa omuano wokuzengurura ouzeu mbo. (Genesis 3:15) Okuyamwa kouvi nonḓiro ma ku zu mOmuna wa Mukuru, Jesus Kristus. Nu hapo aaku kamburire mo tjike?

Okuyama ovandu koviṋa avihe mbya kongorera komapirukiro wa Adam, Jehova wa hinda Jesus kombanda yehi kutja me yekuhonga ovandu omuano omusemba wokuhupa, “nokuyandja omuinyo we u rire onguturiro yovengi.” a (Mateus 20:28; Johanes 14:6) Jesus aa yenene okuyandja otjisuta tjonguturiro mena rokutja eye wa ri ohomonena tjimuna Adam. Posi yokutja eye wa raisa onḓuviro nga konḓiro ye. Mena rokutja Jesus kaa sokuṱa, Jehova we mu pendura kutja ma kahupe rukwao meyuru. Nai Jesus aa yenene okutjita imbi Adam mbye hina wa yenena okutjita, okuyandja omaundjiro womuinyo waaruhe kovandu mbe nonḓuviro. “Ovandu avehe otja punga ava rira ovanauvi motjimbe tjokuhazuva kwomundu umwe, owo avehe wina opunga amave varwa otja ovasemba komurungu wa Ndjambi motjimbe tjonḓuviro yOmundu umwe ngwi.” (Ovaroma 5:19) Okupitira mombunguhiro ya Jesus, Mukuru ma yenenisa omakwizikiro we wokutja ovandu ve hupe nga aruhe kombanda yehi.

Tu rihonga ovingi ohunga na Jehova komuano mbwa tjinda omauzeu nga kara po mena rokuhina onḓuviro kwa Adam. Nu tu muna kutja kape notjiṋa tji matji yenene okutjaera Jehova okumana imbi mbya uta. Embo re arihe nda hungira mari ‘yenenisiwa.’ (Jesaja 55:11) Wina twe rihonga kutja Jehova we tu suvera pu pe ṱa pi. “Nu Ndjambi wa raisa orusuvero rwe ku eṱe, indu tja hinda Omuna we erike porwe kouye, kokutja eṱe tu mune omuinyo mu Ye. Norusuvero rwakatjotjiri ru ri nai: Kakutja oweṱe mbu twa suvera Ndjambi, nungwari Eye ongwe tu suvera na hindi Omuna we kokutja mu Ye eṱe tu isirwe omauvi wetu.”​—1 Johanes 4:9, 10.

Mukuru “ka ruruparere Omuna we omuini, nungwari we Mu yandjera eṱe,” okutja tu nongamburiro yokutja Mukuru wina me tu pe “avihe” mbya kwizika. (Ovaroma 8:32) Mukuru wa kwizika kutja me tu tjitire tjike? Lesa komurungu.