Tji pe he ri nao, ove mape ya wa muna okuza ku varwe momuano umwe poo omukwao. Eṱe potuingi tu zuva ohunga novandu mbe tondwa mena rokutja ovomihoko vyarwe, vaza komahi yarwe, poo mena rokutja ve tjita omahakaeneno womonyama ku novarumendu ovakwao poo ovakazendu ovakwao. Ku nao, ozohoromende ozengi ze twa po ozoveta nḓe yandja omberero komundu ngwa tjiti ouvi mena rokutja wa tonda okambumba kaaṋi kovandu.

Ovandu mba muna omauzeu mena rokutondwa, owo potuingi ve tonda varwe. Nu ovandu mba potuingi ve ṱiza ongore nokukayenda komurungu okutjita oviṋa ovivi ku varwe.

Ngahino ove wa muna ombangu youmuhokohoko, okunyekererwa, nokuhungirwa omambo omavi. Indu omatondero nga tji maye kayenda komurungu, oyo ye tjita kutja omundu ma kare novikaṋena ovivi, tjimuna omapindi, okuhihamisa varwe kotutu, okutjera, nokuzepa.

Okambo nga make ziri omapuriro ngu maye kongorere mba, nu make raisa omuano mu mo yenene okutoṋa omatondero:

• Omena raye ovandu ovengi tji va tonda ovakwao?

• Hapo omatondero maye yandisiwa vi?

• Hapo mape kara oruveze indu omatondero tji ye hi nokukara po nga aruhe?