OMUANO WOKUYANDISA OMATONDASANENO
3 | Isa okutonda mouripura woye
Ombeibela i tja:
“Ndjambi nge mu yarure koupe mourekoto womitima vyeṋu. Indino otji mamu yenene okukara nondjiviro mombango yaNdjambi, okutja mu tjiwe kutja ihi tji tji ri otjiwa nEye me nonyuṋe, nu tji tja pwira Ye, otjikeṋa.”—OVAROMA 12:2.
Etjangwa ndi mari hee kutja:
Oviṋa mbi tu ripura na vyo ovinahepero ku Mukuru. (Jeremia 17:10) Eṱe matu hepa okuungura ovingi pendje nokunakaura omambo novitjitwa ovivi. Okutonda ku za momeripura nomuano mu tu fula. Ku nao, eṱe matu hepa okunakaura omeripura nge eta omatondero tjimanga. Tji twa tjiti nao, ‘matu yarurwa koupe’ natu isa okutonda.
Oviṋa mbi mo yenene okutjita:
Ripura omuini omuano mbu u fula ohunga novandu veraka rarwe poo mba za kehi rarwe. Ripura omuini kutja: ‘Hapo u ve vara vi? Hapo oumune wandje u ri otja kondjiviro ndji me tjiwa ohunga na wo? Poo u ri momuano wombangu?’ Isa okutarera poo okulesa oviṋa korungovi mbi eta omatondero noutwe.
Embo ra Mukuru mari yenene okutuvatera okutuurunga omatondero momitima na momeripura
Katjiṋa otjipupu okukonḓonona omeripura wetu poo omuano mu tu fula. Posi yokutja, Embo ra Mukuru ri tu vatera ‘okusosonona [poo okukonḓonona] omeripura nomerizemburukiro womutima.’ (Ovaheberi 4:12) Kayende komurungu okukonḓonona Ombeibela. Sasaneka imbi Ombeibela mbi i honga ku nouripura woye, nu kondja nomasa okuripura momuano mbu u raisa ondengero ku Mukuru. Embo ra Mukuru ri yenena okutuvatera okurundurura omatondero nge ri “oviṱunga ovizeu” poo omatondero ngu twa iririra momitima nomeripura wetu.—2 Ovakorinte 10:4, 5.
