Omena raye ovandu ovengi tji va tonda ovakwao?
Ongwaye omatondero tji ye kayenda komurungu? Okutjiwa otjiṋa ho, eṱe matu hepa okutjiwa kutja omatondero otjikeṋa, omena raye ovandu tji ve uta okutonda, nokutja ye handjauka vi.
Okutonda otjikeṋa?
Okutonda omundu, okuhinokuvanga omundu worive poo otjimbumba kaaṋi, oko kaku ri tjimuna okupindikira omundu, nungwari otjiṋa tji tji kayenda komurungu oure woruveze orure.
OMENA RAYE OVANDU TJI VE UTA OKUTONDA?
Ovandu ve uta okutonda mena romapu omengi. Owo mape ya ave tondo ovandu avehe mba za kokambumba kaaṋi nandarire imba mbe hi ya tjita oviṋa ovivi. Owo mape ya va tonda okambumba kaaṋi ngo mokumuna kutja ovandu avehe mokambumba ngo ovavi, ovanaumba, nu mbe ha runduruka okutjita oviṋa ovisemba. Nu wina mape ya ave varwa otjovandu mbe nonḓengu yokehi, poo mbe tjita kutja ku kare nomauzeu. Imba mbe tonda varwe mape ya va muna omauzeu wokutjindwa navi, ouhasemba, poo ovitjitwa varwe mbya tjita kutja ve fule nao.
OMUANO OMATONDERO MU YE HANDJAUKA
Omundu u yenene okutonda omundu warwe ngu ve hi ya hakaena. Otjotjihorera, ovandu potuingi ve kara noumune umwe tjimuna eṱunḓu rawo poo omapanga wawo ohunga notjimbumba tjovandu kaaṋi ho. Ku nao, indu tji pe na tjiva meṱunḓu rawo mba tonda otjimbumba tjarwe, ovandu avehe motjimbumba ho ve uta okukara noumune tjingewo mbwo.
Indu tji twa tjiwa omuano omatondasaneno mu ye handjauka oupupu, eṱe matu yenene okumuna kutja omena raye ovandu ovengi tji va tonda varwe. Nungwari, kutja tu ise okutonda varwe, eṱe matu sokutjiwa kutja okutonda kwa uta vi. Nu otjiṋa ho matu yenene okurihonga okuza mOmbeibela.
OMBEIBELA I HUNGIRA KUTJA OKUTONDA KWA UTA VI
OKUTONDA KATJIṊA TJI TJA UNGURWA MOVANDU. Okwo kwa uta indu omuengeli meyuru ngu isanewa Satan Omudiaboli, tja pirukira Mukuru. Omudiaboli wa ri “omuzepe okuza kombutiro,” indu tja uta omapirukiro. Otja “tjinga e ri omunavizeze ne ri ihe yovizeze avihe”, u kayenda komurungu okutjita kutja pe kare omatondero nomapindi. (Johanes 8:44; 1 Johanes 3:11, 12) Ombeibela i tja Satan omundu ngu tonda, ngwa pindika, nu ngu nomazenge.—Job 2:7; Omavandururiro 12:9, 12, 17.
KU RIRA OUPUPU KOVANDU MBE HE RI OHOMONENA OKUTONDA. Omurumendu omutenga Adam wa horera kovitjitwa ovivi vya Satan. Mena ranao, ovandu avehe va rumata ouvi nu kavandu ohomonena. (Ovaroma 5:12) Otjiveri tja Adam, Kain wa tondere omuangu we, Abel nu e mu zepa. (1 Johanes 3:12) Otjiperi kutja, ovandu ovengi ve raisa orusuvero notjari. Posi ya mena rouvi mbu twa rumata, ovandu ovengi ve tondasana mena rokuripurira ku wo oveni, eruru, nomeritongamisiro.—2 Timoteus 3:1-5.
I RIRA OUPUPU OKUTONDA OVANDU MBA PANGUKA KOVE. Mouye mu tu hupa u tunduuza omatondero mokuhandjaura ovikaro ovivi nomeritjindiro omavi. Mena rokutja “ouye auhe u ri kehi youhonapare waingwi umwe Omunaurunde,” ngu ri Satan Omudiaboli, ombangu, okutonasana, okunyona oviṋa, nokuhungirasana omambo omavi, imbi oviṋa mbi riyamena komurungu.—1 Johanes 5:19.
Posi yokutja, Ombeibela i hungira ovingi pendje nokuhungirira kutja okutonda kwa uta vi. Oyo wina i hungira ohunga nomazengururiro.
