OMUANO WOKUYANDISA OMATONDASANENO
4 | Tuurunga omatondero nombatero ya Mukuru
Ombeibela i tja:
“Ovihape vyOmbepo ovyo mbi: orusuvero, enyando, ohange, omuretima, oupore, omutima omuwa, ouṱakame, omerisusuparisiro nomeritjaerero.”—OVAGALATE 5:22, 23.
Etjangwa ndi mari hee kutja:
Nombatero ya Jehova, eṱe matu yenene okunakaura omatondero. Ombepo ye ondjapuke i yenene okutuvatera okukara novikaṋena mbi tu hi na vyo. Ku nao, matu sokuṱaṱera ku Jehova kombatero ndje tu pa kokutja tu isa okutonda nungwari kamomasa wetu oveni. Indu tji twa ṱaṱere ku Mukuru, matu kara noumune tjimuna womuapostele Paulus, eye ngwa tja: “Ami me yenene okutjinda avihe, Kristus tjinga e ndji pa omasa womasorero.” (Ovafilipi 4:13) Nu matu yenene okutja: “Ombatero yandje i za ku Muhona.”—Epsalme 121:2.
Oviṋa mbi mo yenene okutjita:
“Jehova we ndji rundurura okuza komurumendu ngu tjita outwe komundu wohange.”—WALDO
Kumba ku Jehova noupaturuke okumuningira ombepo ye ondjapuke. (Lukas 11:13) Mu ningira okukuvatera kutja u kare novikaṋena oviwa mehupo roye. Konḓonona kutja Ombeibela mai tja vi ohunga novikaṋena tjimuna imbi orusuvero, ohange, omuretima, nomeritjaerero, mbi vatera okuisa po okutonda. Paha omiano kutja u kare novikaṋena mbyo mehupo roye. Nu kondja okukara pamwe nomapanga poo ovandu mbe vanga okukara novikaṋena mbyo. Ovandu otja imbo mave ku vatere okukara “morusuvero na moviungura oviwa.”—Ovaheberi 10:24.
