Nandarire kutja Ombeibela kambo romapangero, oro ri yandja ondunge ndji ri yo nu onanḓengu. Ondunge ndji ri mOmbeibela i yenena okuvatera omundu ngu kondja nouveruke mouripura. Tara kovihorera tjiva.

“Mbe hepa omuverukise kawo mba mbe ri nawa, nungwari owo mba mba vera.”—MATEUS 9:12.

Ombeibela i tu raera kutja matu sokukapaha omapangero. Ovandu ovengi mbe nomutjise wouripura va muna ombatero mokurihonga ondjivisiro onanḓengu ohunga nouzeu wawo nokuyenda konganga.

“Okurikuturisa orutu rwoye otjiṋa otjiwa.”—1 TIMOTEUS 4:8, Contemporary English Version.

Indu tji mo ungurisa oruveze rwoye nomasa woye moviṋa oviveruke, maku yenene okukuvatera okukara nouveruke mouripura. Oviṋa otja imbyo vi kamburira mo okurikuturisa orutu eyuva arihe, okurya ovikurya oviveruke, nokurara nawa.

“Okukara nondjoroka ku eta omberukiro. Okukara nondjenda ku ngundiparisa orutu.”—OMIANO 17:22.

Indu tji mo lese omatjangwa wOmbeibela omayanḓiparise nokutwa po ozondando nḓu mo yenene okuyenenisa, maku ku vatere okukara nondjoroka. Indu tji mo yandja ombango koviṋa oviwa mehupo nokukara nongamburiro kokutja oviṋa mavi  karunduruka moruyaveze, ihi matji yenene okukuvatera kutja u tuurunge ouzeu wouveruke mouripura.

“Okurisusuparisa okwo ounongo.” —OMIANO 11:2.

Ove mape ya o munu kutja komoo yenene okuungura oviṋa avihe omuini, ku nao nomerisusuparisiro yakura ombatero yavarwe. Omapanga noveṱunḓu roye mape ya ave vanga okukuvatera, posi ya ave ha tjiwa kutja ovikeṋa mbi mave sokutjita. Ve raera kutja ngave ku vatere momuano uṋe. O undjire ko kutja ve ku tjitire oviṋa ovingi, nu aruhe raisa ondangi kombatero ndji mave ku pe.

“Ami ee munu kutja hi ri nawa, ku nao mba ya konganga. Oyo ya yenena okumuna omutjise wandje. Ihi tje ndji vatera kutja mbi yakure ongaro mu mbi ri nokurihonga ohunga nomapangero nge ri po kokutja mbi tjevere ouveruke wandje.”—Nicole, a ngwa vera omutjise mbu tjita kutja omundu me ritjinde mozongaro pekepeke.

“Ami mba muna kutja okulesa Ombeibela aruhe pu nomukazendu wandje ku ndji vatera kutja mbi ute eyuva arihe nomeripura omawa. Omayuva tjiva tji me kondjo nomutjise wombameno momuinyo, ezeva kaaṋi ri yenena okundjiyanḓiparisa.”—Peter, ngwa vera omutjise wombameno momuinyo.

“Ya ri ouzeu okuraera varwe ohunga nomutjise wandje mena rokutja ee ṱohoṋi tjinene. Posi ya epanga randje omukazona wa yenena okupuratena nawa kwami nokundjiraisira otjari mokukondja okumuna omuano mu me fula. Eye we ndji vatera kutja mbi fule nawa nokutja e he rimunu ourike.”—Ji-yoo, ngwa ri nouzeu womutjise mbu ṱuna komuano me rya.

“Ombeibela ye ndji vatera kutja mbi kare noumune ouwa, okusuva nawa, nokuhinokuungura oviungura ovingi. Ounongo mbu ri mOmbeibela we ndji vatera kutja mbi tuurunge ouzeu wouveruke mouripura.”—Timothy, ngu nomutjise mbu tjita kutja ma kare nomeripura omengi nge ha yenene okuyetjaera.