Omuano mu matu yenene okuvatera imba mbe nouzeu wouveruke mouripura.
OMBEIBELA I TJA: “Epanga aruhe ri raisa orusuvero rwaro.” —OMIANO 17:17.
Etjangwa ndi mari hee ye?
Eṱe mape ya atu munu kutja kamaatu yenene okuvatera epanga retu indu tja vera mouripura. Posi yokutja, eṱe matu yenene okuraisa omuano mu matu yenene okurikendera ku ye mokumuvatera okutuurunga omutjise mbwo.
Omomuano uṋe okuṱakamisa etjangwa ndi mu maku tu vatere?
“Omundu auhe nga hakahane okupuratena.”—JAKOBUS 1:19.
Omuano umwe wokuvatera epanga roye, okumupuratena eye tji ma vanga okuhungira. O munu kutja ove mo sokuzira oviṋa avihe mbi ma hungire. Mu raisira kutja ove u puratena nokurikendera ku ye. Kondja okuzuva omuano eye me fula, nu o kondjo okumupangura. Zemburuka kutja eye mape ya a hungire oviṋa ovivi, nu kombunda a kahihamwa omutima.—Job 6:2, 3.
‘Yanḓipariseye’ —1 OVATESALONIKA 5:14.
Epanga roye mape ya ari kara nomerikendero, poo mape ya ari kondjo nouzeu wokurimuna okuhinonḓengu. Okumuraisira kutja u rikendera ku ye, ove mo yenene okumuhuhumiṋa nokumutunduuza nandarire indu tji u hi nokutjiwa kutja ngo tje vi.
“Epanga aruhe ri raisa orusuvero rwaro.”—OMIANO 17:17.
Mu vatera momiano vyarwe pekepeke. Pendje nokumuna kutja ove mo tjiwa omiano mu mo yenene okumuvatera, mu ningira oviṋa mbi mo yenene okutjita. Indu epanga roye tji rimuna ko ouzeu okuhungira oviṋa mbi ma hepa, kondja okupura otjiṋa tji mamu yenene okuungura pamwe, tjimuna okukerinana. Poo mo yenene okuyandja ombatero yokukaranda oviṋa mbi ma hepa, okukohorora, poo okuungura otjiṋa tjarwe.—Ovagalate 6:2.
‘Kara nomuretima.’—1 OVATESALONIKA 5:14.
Kaaruhe epanga roye tji mari vanga okuhungira. Mu tunduuza kutja ove u nonḓero okupuratena ku ye indu tji ma vanga okuhungira. Mena romutjise we, epanga roye mape ya ari hungire poo ari tjiti oviṋa mbi mavi ku hihamisa. Eye mape ya a ha vanga okutjita oviṋa mbi mwa ri amamu sokutjita pamwe poo a yeruka. Otja tji mo yandja ombatero ndji ma hepa raisa omuretima.—Omiano 18:24.
Okuyandja ombatero maku yenene okuvatera epanga roye
“Ami mbi tjita kutja mbi rire epanga eye ndi ma yenene okuṱaṱera ko aruhe. Nandarire kutja hi yenene okuzengurura omazeu we, ami aruhe mbi kondja okupuratena koviṋa eye mbi ma hungire. Povikando tjiva, eye u hepa omundu ngu me mu puratene nu iho tji tjita kutja ma fule nawa.”—Farrah, a ngu ri epanga romukazendu ngu kondja nomutjise mbu ṱuna komuano me rya, omerikendero, nombameno momuinyo.
“Epanga randje ngu ri omukazendu, u notjari nu u ndji tunduuza. Eye we ndji ṋanga koye keriro ewa. Eye aa raisa orusuvero nu wa tjita kutja i rire oupupu kwami okuhungira omuano mu me fula nu iho tjiri tje ndji tunduuza.”—Ha-eun, ngwa ri nomutjise wombameno momuinyo.
“Okukara nomuretima otjiṋa otjinanḓengu. Indu omukazendu wandje tji ma tjiti otjiṋa tji matji ndji pindikisa, ami mbi rizemburukisa omuini kutja omutjise we ombu mau tjiti kutja me ritjinde momuano mbwo. Nu ihi tji ndji vatera kutja e ha pindike nu mbi ripurire ku ye tjinene.”—Jacob, omurumendu womukazendu ngu nomutjise wombameno momuinyo.
“Omukazendu wandje u ndji vatera tjinene nu u ndji huhumiṋa. Indu tji mbi nomerikendero tjinene, eye ke ndji ṋiṋikiza okutjita oviṋa mbi mbi hi nokuvanga okutjita. Ihi matji hee kutja povikando tjiva ka tjiti otjiṋa eye tja suvera okutjita. Eye omuhuze kwami mena rokutja omuharupu nu ke ripurire ku ye omuini.”—Enrico, ngu kondja nouzeu womerikendero.
a Omana tjiva ya rundururwa.
Mo yenene okutara ku imbi wina
OZOVIDIO OZOPERENDWA
Epanga ratjiri orondi ndi ri vi?
Oupupu okumuna omapanga woposyo, nu hapo mo yenene vi okumuna epanga ratjiri?
OHUNGA NA EṰE
Ningira omahongero wOmbeibela wotjari
Hungirira kepuriro rOmbeibela, poo rihonga ovingi ohunga nOvahongonone va Jehova.
