HAPO ove wa rora okuwa momuinyo tjinene nga tji mo zeri okukoka? Kunao mo yenene okuzuva nawa kutja Adriana wa ri mongaro iṋe. Potuingi eye a u momuinyo nu kaari nomaundjiro mena rokurikenda aruhe. Adriana wa munikwa omutjise wombameno (clinical depression).

Wina tara kotjihorera tjomurumendu wa Japan wena Kaoru, ngwa tjevere ovanene ve mba kurupire nu mba verere. Eye wa tja: “Povikando tjiva ami mba ri kehi yozombameno mena roṋiṋikizire ndje munu poviungura. Otjoruveze tja ru kayenda hi mba ri nonḓero yokurya, nu he rara nawa. Mba uta okuripura kutja omauzeu wandje ma ye yanda indu tji mba koka uriri.”

Omurumendu wena Ojebode ngwa za ko Nigeria, wa tja: “Ami aruhe e u momuinyo nga tje utu okurira, kunao mba paha omuano wokurizepa.” Otjiṋa otjiwa kutja Ojebode, Kaoru, na Adriana kavena pu ve ri zepa. Posi yokutja ombura aihe ovandu omayovi omengi ve ri zepa.

Ovandu ovengi mbe ri zepa ovarumendu, mena rokutja ovengi vawo ve ṱohoṋi okunigira ombatero. Jesus wa tja ovandu mba vera ve hepa onganga. (Lukas 5:31) Kunao, tjiu nomeripura wokurizepa, arikana o ṱohoṋi okupaha ombatero. Ovandu ovengi mbe nozombameno va muna kutja okumuna omapangero ku ve vatera kutja ve kayende komurungu okuhupa. Ojebode, Kaoru, na Adriana va muna omapangero nu nai ve tjinda omauzeu wawo momuano omuwa.

Ozonganga mape ya a ze yandja omiti poo a ze hungire ku nomuvere poo a ze ungurisa omiano vivari mbi okuvatera omundu ngu nombameno. Imba mbe ri kehi yozombameno ve hepa omaṱunḓu nomapanga wawo okuvezuva nawa, nokuveraisira omuretima norusuvero. Jehova eepanga esembasemba omundu auhe ndu ma yenene okukara naro, nu Eye u yandja ombatero okuza mEmbo re Ombeibela.

Imba mbe hupa kehi yozombameno ve hepa okumuna omapangero oure woruveze orure, nu mape ya ave hepa okurundurura ongaro yawo. Nungwari tji u ri kehi yozombameno, ove mo yenene okukara nomaundjiro woruyaveze oruwa, tjimuna Ojebode. Eye wa tja: “Ami mbi undja nonḓero omayenenisiro womambo nge ri mu Jesaja 33:24, nga kwizika oruveze tji ku hi nokukara omundu ngu ma tja, ‘eye wa vera.’” Tjimuna Ojebode, ove mo yenene okumuna omahuhumiṋino momakwizikiro wa Mukuru ‘wehi epe,’ mu mu hi nokukakara ‘omihihamo’ rukwao. (Omavandururiro 21:1, 4) Omakwizikiro ngo ye heya kutja kaku nokukakara ozombameno rukwao. Omihihamo vyoye mavi isapewa nga aruhe, nu “mavi zembwa nu kavi nakuzemburukwa ko rukwao.”​—Jesaja 65:17.