INDU tji wa rora okuhupa kombunda yotjiwonga, ove mape ya o zuu nawa omauzeu ovandu ngu ve muna indu tji va wirwa i yotjiwonga. Ozongaro tjimuna okuuruma, okuhinongamburiro, ongurungise, omerikendero, nokukara noturoto otuvi. Ovandu ovengi mba hupa kombunda yoviwonga ve wa momuinyo nu kave kara nonḓero yokuhupa.

Indu tji wa pandjara oviṋa avihe mena roviwonga, ove mape ya omunu kutja konomasa wokutjinda omauzeu nga oparukaze. Nu ove mape ya o utu okumunu kutja kahepero okuhupa. Posi yokutja, Ombeibela i kahurura kutja omuinyo woye omunanḓengu nokutja mo yenene okukara nomaundjiro wokukahupa ehupo ewa moruyaveze.

Omuzuvarise 7:8 mari tja: “Ondjandero yotjiṋa ngamwa oyo onanḓengu pombutiro yatjo.” Indu otjiwonga tji tja manuka, pomautiro pe munika aayo konomaundjiro. Posi yokutja tji mo ungura oukukutu nomuretima okutungurura ehupo roye, oviṋa vi yenda ama vi rire ko oviwa.

Ombeibela ya hunganeka oruveze mu ‘mu hi nokukara omaririro nondjuriro.’ (Jesaja 65:19) Imbi mavi tjitwa indu ouye auhe tji wa rire oparadisa kehi yOuhona wa Mukuru. (Epsalme 37:11, 29) Kaku nokukakara oviwonga rukwao. Omihihamo avihe mbya etwa i yoviwonga nomaririro mavi isapewa nga aruhe, orondu Mukuru Omunamasaehe wa kwizika kutja, “ovitjitwa vyoruveze ndwa kapita mavi zembwa nu kavi nakuzemburukwa ko rukwao.”​—Jesaja 65:17.

Ripura notjiṋa hi: Omuute, we tu ṱunina “oruveze ndu maru ya rwomaundjiro norwouṋingandu,” ehupo rohange kehi yOuhona wa Mukuru. (Jeremia 29:11) Hapo okutjiwa ouatjiri mbwi mape ya au ku vatere okumuna ounahepero wokuhupa? Sally ngwa tamunwa morupa ndwa kapita, wa tja: “Okuzemburuka oviṋa avihe oviwa Ouhona wa Mukuru mbu mau ketu tjitira moruyaveze, maku tu vatere okuhina okuripurira koviṋa ovivi mbya tjitwa rukuru kweṱe, nungwari ku tu pa omasa wokutjinda ongaro ndji tu ri mo.”

Ongwaye tjiu hi nokurihonga ovingi ohunga nOuhona wa Mukuru kutja moruyaveze ropopezu mau eta ye kovandu? Tji wa tjiti nao, nandarire kutja kwa tjitwa oviwonga kove, mo kara nongamburiro yokumuna ounahepero wokuhupa nai, nu mo kara nomaundjiro wokutja moruyaveze matu kakuturwa komaumba otja ingo. Posi yokutja nai, Ombeibela i yandja omirari mbi mavi yenene okutuvatera okutjinda omauzeu nge ya kombunda yoviwonga. Tara kovihorera tjiva