Ombeibela i tja omuengeli omupirukire kombunda ngwa katjiukwa otja Satan Omudiaboli, wa pirukira ousemba wa Mukuru womananeno. Eye wa tja ovandu mave yenene okuhupa mondjoroka nokuhinokuriwisa kehi ya Mukuru. Otjihihamise kutja ovanene vetu ovatenga Adam na Eva va puratena ku Satan nu va pirukira Mukuru.​—Genesis 3:1-6; Omavandururiro 12:9.

Mena rokutja Adam na Eva va nakaura Mukuru otjomunane wawo, owo va pandjara omaturiro wawo wOparadisa nomaundjiro wokuhupa nga aruhe nokuhinokuvera. (Genesis 3:17-19) Otjiṋa ho tja ṱuna kozondekurona zawo. Ombeibela i tja, “ouvi wa zira momundu umwe nau ya mouye, nonḓiro ai zu mouvi.” (Ovaroma 5:12) Ouvi wa eta ouzeu warwe ounene: “omundu umwe rumwe u honaparera omukwao nga tji ma humapara.” (Omuzuvarise 8:9) Pu mape hee kutja ovandu tji mave rihonaparere po oveni mape kara omauzeu aruhe.

Omundu omutenga okuhonapara ngwa tamunwa mOmbeibela ya ri Nimrod. Neye wa pirukira omananeno wa Jehova. Okuza komananeno wa Nimrod ovarumendu ovanauvara va ungurisa ouvara wawo momuano omuvi. Ozombura ape 3 000 nḓa kapita, Ombara Salomo wa tjanga kutja: “Imba ovaṋiṋikiziwa ve ṱoruhoze, nungwari owo kave na ngu me ve yarura omitima pehi, imba ovaṋiṋikize vawo tjinga e ri mbe nouvara.”⁠—⁠Omuzuvarise 4:1.

Eṱe tuna ouzeu otjingewo ndino. Mombura ndji 2009, embo rimwe nda pitisiwa i yOmihoko omikutasane ra tja parira opakahu kutja “omananeno omavi onga etisa ouzeu auhe mouye.”

Ouye u hepa ovahonapare ovasemba nozohoromende ozombwa. Nu imbyo ooviṋa Omuute wetu mbye tu kwizikira.

Mukuru wa zika Ouhona poo ohoromende ndji mai pingene omananeno aehe wovandu ‘nu tjazumba owo mau karerere nga aruhe.’ (Daniel 2:44) Imbwi oOuhona ovandu ovengi mbu ve kumbira. (Mateus 6:9, 10) Posi yokutja Mukuru ka ngu ma honaparere po Ouhona mbo omuini. Nungwarwi eye wa zika Omunane ngwa hupire otjomundu. Hapo Mukuru wa toorora uṋe?