“Muhona, hi kwe ombatero kOve tungapi kutja u ndji zuvire; nu hi urakane ondjamo kOve tungapi kutja u ndji yame kozondjito zoutwe?” (Habakuk 1:2, 3) Inga omapuriro omurumendu omusemba wena Habakuk, ngwa ri noupanga ouwa kuna Mukuru nga pura. Hapo omapuriro we aaye raisa kutja ke nongamburiro? Kako katjiperi! Mukuru wa wisa omutima wa Habakuk pehi mokumuraera kutja eye wa twapo oruveze mu ma isapo omauzeu aehe.​—Habakuk 2:2, 3.

Indu ove omuini poo omundu wopopezu na ove tji ma munu ouzeu, ku rira oupupu okumuna kutja Mukuru u womba okukuvatera, nokutja Eye aa sokutja wa isapo rukuru omauzeu ngo. Posi yokutja Ombeibela i tu pa ongamburiro ndji: “Muhona ka wombo okutjita imbi mbya kwizika otja tjiva tji ve ripura. Moruveze rwanao Eye u nomuretima na eṋe, tjinga e ha vanga kutja omundu nangarire umwe a yandekwe, nungwari tjinga e vanga kutja avehe ve ritanaure komauvi wawo.”​—2 Petrus 3:9.

Moruyaveze ropopezu tjinene! Jesus wa tjivisa kutja omuhoko worive mau munu ozongaro nḓu maze raisa kutja tu hupa momayuva omasenina “wouye mbwi.” (Mateus 24:3-42) Omayenenisiro womahunganekero wa Jesus momayuva wetu nga, ye raisa kutja Mukuru u ri pokutoora omikambo okuisapo omauzeu nga. *

Nu hapo Mukuru ma isapo vi omauzeu aehe? Indu Jesus tja ri kombanda yehi, eye wa raisa kutja omasa wa Mukuru ye isapo vi omauzeu wovandu. Ngatu tare kovihorera tjiva.

Oviwonga: Indu Jesus novaapostele ve tji va ri motjiyaha mOkuvare kwa Galilea, kweya otjivepo otjizeu tji tja hara okuṱomwinisa otjiyaha. Posi yokutja Jesus wa raisa kutja Ihe u nomasa wokutjaera oviutwa vye. (Ovakolose 1:15, 16) Jesus wa vera otjivepo na tja kozongazona: “Porimaneye mu tje nduu nyee!” Pa tjitwa tjike? “Otjivepo otji tja yaruka pehi, aku mwina aku tja nduu!”​—Markus 4:35-39.

Omitjise: Jesus aa tjiukwa nawa kutja u nomasa wokuverura ovapoṱu, ovaremane na imba mba ri nomitjise tjimuna omutjise wokuseuka (epilepsy), ongana poo omitjise vyarwe. Eye wa “verukisa avehe mba ri nomitjise.”​—Mateus 4:23, 24; 8:16; 11:2-5.

Ouhepe wovikurya: Jesus wa ungurisa omasa nga pewa i Ihe okutjita kutja oukurya ouṱiṱi u rire ovikurya ovingi. Ombeibela i raisa kutja indu tjaa zuvarisa, eye wa parura ovanandjara povikando vivari.​—Mateus 14:14-21; 15:32-38.

Onḓiro: Mozombendukiro 3 nḓa tjangwa mOmbeibela, Jesus nḓa tjita, za raisa kutja Jehova u nomasa wokuisapo onḓiro. Umwe pu imba mba pendurwa wa ri a koka oure womayuva 4.​—Markus 5:35-42; Lukas 7:11-16; Johanes 11:3-44.