Mukuru wa uta otutu twetu kutja tu yenene okuriverura otuini. Indu tji twa kondwa poo okuhihamisiwa i otjiṋa, “orutu ru uta okuriṱuna oruini momuano omuhimise mbu tjita kutja oviraro oviṱiṱi novinene vi veruke.” (Johns Hopkins Medicine) Tjimanga orutu ru tjita otjiṋa tji tji tjaera kutja ombinḓu i ise okuziza, nokuuta okuvatera otjiraro okuveruka.

RIPURIRA KU IMBI: Tjinangara Omuute wa uta otutu twetu kutja tu yenene okuriverura otuini tji tu novirwaro, hapo katu sokukara nongamburiro momakwizikiro we wokutja me tu vatere okuverukisa ovirwaro mbi tu na vyo momuinyo wina? “Eye u verukisa imba mbe nomitima mbya ṱukuṱuka, nu u kuta ovirwaro vyawo.” (Epsalme 147:3) Indu tji u nomuhihamo momuinyo mena roviṋa mbya tjitwa kove morukapitaveze poo nai, hapo mo yenene vi okukara nongamburiro kutja Jehova ma verura ovirwaro vyoye nai na moruyaveze?

Mukuru ma kwizike nai: “O tira, Ami mbi ri puna ove! OwAmi Ndjambi woye, o urumisiwa i otjiṋa! Me ku zeuparisa, nu me ku vatere.” (Jesaja 41:10) Omundu ngu tjiwa kutja Jehova u nakonatja na ye u kara nohange momuinyo nu u kara nomasa wokutjinda ngamwa omauzeu. Omuapostele Paulus wa tja ohange yomomuinyo ndji, ‘ohange ya Ndjambi ndja kapita ozondunge azehe zovandu.’ Paulus komurungu wa tja: “Ami me yenene okutjinda avihe, Kristus tjinga e ndji pa omasa womasorero.”​—Ovafilipi 4:4-7, 9, 13.

Omatjangwa ye tu vatera okutunga ongamburiro momakwizikiro Jehova nga tjita ohunga noruyaveze rwovandu. Otjotjihorera, Omavandururiro 21:4, 5 (nge ri pomukuma mbu mau kongorere ko) maye tu raere imbi Jehova mbi ma tjiti nokutja ongwaye tji matu yenene okukara nongamburiro yokutja ma tjiti nao:

• “Eye ma pyoṋa omahoze aehe” momeho wovandu. Jehova ma isapo omauzeu nozongendo zetu azehe, nandarire inḓa nḓe ha munika otjozongendo ozonene ku varwe.

• “Ingwi ngu ri kotjihavero tjouhona” meyuru, Omunamasaaehe nOmbara yoviutwa avihe, ma ungurisa omasa nouvara we okutjaera kutja atu ha munu ouzeu, nokutupa ombatero ndji matu hepa.

• Jehova me tu yanene kutja omakwizikiro we “omauatjiri nomaṱakame.” Ihi matji hee kutja Jehova me tu yanene nena re nomuano mbwe tjiukwa kutja ma yenenisa omakwizikiro we.

“‘Eye ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru vya kapita.’ Nu Ingwi ngu ri kotjihavero tjouhona arire tja tja: ‘Tara, Ami me yarura avihe koupe!’ Eye wina wa tjere ku ami: ‘Tjanga omambo nga, owo tjinga aye ri omauatjiri nomaṱakame.’”​—Omavandururiro 21:4, 5.

Oviutwa vye nOmbeibela vi raisa ongaro novikaṋena vya Tate wetu womeyuru. Momuano umwe poo omukwao oviutwa vi tu ṋanga okutjiwa Mukuru otjEpanga ropopezu. Posi yokutja Ombeibela i tu ṋanga poruhaera nomambo nga: “Tumbukeye ku Ndjambi, nEye ma tumbuka ku eṋe.” (Jakobus 4:8) Oviungura 17:27 mari tja: “Eye hapo ke ri kokure na eṱe atuhe.”

Otja tji mo kondjo okutjiwa Mukuru, ove mo utu okukara nongamburiro yomasa kutja eye tjiri “u nakonatja na ove.” (1 Petrus 5:7, NW) Okukara nongamburiro otja indji mu Jehova ku tu etera ouwa waye?

Ngatu tare kehungi romurumendu wena Toru ngwa za koJapan. Eye we kurisiwa i omukazendu Omukriste, posi yokutja wa kakara norupa motjimbumba otjinautwe tjaatji tjiukwa otjoMafia ya Japan. Eye wa tja: “Ami ee kambura kutja Mukuru kendji vanga, nu ee munu kutja onḓiro yovandu vopopezu na ami nu tjinene imba mbu mba suvera, ya ri omberero kwami.” Toru u itavera kutja mena rokukara mongaro ombi otja indji, eye wa rira “omundu ngu hari nombinḓu komutima nu ngu hari nondjenda novandu varwe.” Ohunga nonḓero ye onene, eye wa tja: “Ami ee vanga okukoka ambi ri omutanda tji mba zu nokuzepa omundu omutjiukwa tjinene pwami nu momuano mbwo otji me ritjitisa ena enene.”

Nungwari Toru nomukazendu we Hannah tji va za nokurihonga Ombeibela, Toru wa tjita omarundurukiro omanene mehupo na mongaro ye. Hannah wa  tja: “Ami ee munu nawa omarundurukiro omurumendu wandje ngaa tjiti.” Nai Toru u tja nai nongamburiro yatjiri: “Mukuru ngu nakonatja novandu avehe tjiri okeri. Eye kavanga ovandu okukoka, nu u nonḓero yokuisira imba mbe ritanaura tjiri komauvi wawo. Eye u puratena koviṋa mbi tu ha yenene okuraera kovandu varwe, noviṋa ovandu varwe mbi ve hina okuzuva nawa. Moruyaveze ropopezu, Jehova ma isapo omauzeu aehe nomihihamo vyovandu. Nandarire nai, eye u tu vatera momiano mbi tu ha undjire ko. Eye we tu suvera nu u tu vatera tji twa ngundipara.”​—Epsalme 136:23.

Tjimuna otjihorera tja Toru tji tja raisa, okutjiwa kutja Mukuru ma yenene, nu moruyaveze ropopezu ma isapo omauzeu aehe nomahoze aehe, ku tupa omaundjiro watjiri koruyaveze nu wina ku tu vatera okukara nehupo ewa nai. Okutja nandarire mouye mbwe ura omauzeu mbwi, eṱe matu yenene okumuna ouwa morusuvero rwa Mukuru.