Erakiza rOmbeibela: “Ongarero yeṋu ngai kare nokuhinoukorokope, nu kareye nohange na imbi mbi mu na vyo.”​—Ovaheberi 13:5.

Ndino pe noviṋa ovingi ovandu mbi ve tja tu sokukara na vyo. Posi yokutja, Ombeibela i tja eṱe matu yenene okukara ‘nohange na imbi mbi tu na vyo.’ Omomuano uṋe?

Nakaura “oukorokope wotjimariva.” Ovandu ovengi ve twa mo ouveruke wawo, eṱunḓu, oupanga wawo kuna varwe, ongaro ombwa yomeritjindiro moumba nu nandarire okutengwa i varwe mena ‘roukorokope wotjimariva.’ (1 Timoteus 6:10) Okutjita nao okuungurira ombandjarero! Omundu ngwa suvera outumbe “kamaa munu ovimariva mbya yenene.”​—Omuzuvarise 5:10.

Ovandu ovananḓengu poviṋa. Ouatjiri kutja atuhe tu hepa omauini. Posi yokutja, oviṋa otja imbyo kavi yenene okutusuvera poo okuraisa ondangi, nungwari ovandu ombe yenena okutjita nao. Okukara ‘nepanga’ ratjiri maku tu vatere okukowa mehupo.​—Omiano 17:17.

Erakiza rOmbeibela: “Okukara nondjoroka ku eta omberukiro.”​—Omiano 17:22.

Tjimuna omuti omuwa omupange tji u eta “omberukiro,” ondjoroka wina mai yenene okutuvatera okutjinda ouvere. Hapo matu kara vi nondjoroka indu tji tu ri kehi youvere?

Kara nondangi. Indu tji twe ripura ohunga nomauzeu wetu uriri, eṱe kamaatu kara nondjoroka ‘mehupo.’ (Omiano 15:15) Nungwari Ombeibela i tja: “Nopu mamu sokutjera okuhepa!” (Ovakolose 3:15) Rihonga okukara nondangi koviṋa oviwa mehupo nandarire kutja oviṱiṱi. Oviṋa tjimuna eyuva tji mari hiti, omuinyo omuwa weyuru poo omusuverwa wetu tji ma meṱameṱa, oviṋa otja imbi vi tu etera ondjoroka.

Vatera varwe. Nandarire kutja ouveruke wetu ka uri nawa, “mokuyandja mu nenyando tjinene pokupewa.” (Oviungura 20:35) Indu varwe tji mave raisa ondangi koviṋa mbi matu ve tjitire, eṱe tu kara nondjoroka nu katu ripurire komauzeu wetu. Eṱe matu yenene okurundurura ehupo retu momuano omuwa indu tji matu vatere varwe okurundurura ehupo rawo.

Erakiza rOmbeibela: “Kokutja mu sore okutoorora imbi mbi ri oviwaviwa.”​—Ovafilipi 1:10.

Ovakupasane mbe ha kara pamwe tjinene mape ya ave hihamisa oupanga wawo. Ovarumendu novakazendu mba kupasana ve sokuvara orukupo rwawo otjotjiṋa otjiwatjiwa poo otjinanḓengu nomasa mehupo rawo.

Ungureye oviṋa pamwe. Rirongeriseye okuungura oviṋa pamwe. Ombeibela i tja: “Okokuwa tji mu ri mu vevari komeho yokurira umwe ṱii.” (Omuzuvarise 4:9) Mamu yenene okuzika, okurikuturisa orutu poo okuungura oviṋa vyarwe pamwe.

Raisa orusuvero rwoye. Ombeibela i tunduuza omurumendu nomukazendu okusuverasana nokuraisasana ondengero. (Ovaefese 5:28, 33) Okumeṱameṱa, okupukata poo okuyandja otjiyandjewa otjiṱiṱi matji yenene okupamisa ourukupo. Otjingaperi kutja ovakupasane mave sokuraisasana orusuvero rwapeke ku wo aveyevari uriri.​—Ovaheberi 13:4.