NANDARIRE kutja okuhinonḓuviro kwa Adam na Eva kwe tu etera ouvi nonḓiro, ihi katji ya rundurura ondando ya Mukuru kovandu. Ombeibela i hungira povikando ovingi kutja ondando ye kai ya runduruka.

• “Ovasemba mave rumata ehi, nu mave tura mu ro nga aruhe.”​—Epsalme 37:29.

• “Muhona Ndjambi ma nyono onḓiro nga ko nga aruhe! Eye ma pyoṋa omahoze momeho waauhe.”​—Jesaja 25:8.

• “Nomunavita omusenina ngu sokuyandekwa, oyo ndji onḓiro.”​—1 Ovakorinte 15:26.

• “Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.”​—Omavandururiro 21:4.

Omomuano uṋe Mukuru mu “ma nyono onḓiro” poo omunavita ngwi onḓiro mai kaisapewa vi? Ombeibela i hungira oukahu kutja “ovasemba mave rumata ehi, nu mave tura mu ro nga aruhe.” Posi yokutja, oyo wina i tja “kape nomundu omusemba kombanda yehi ngu tjita ouwa porwawo.” (Omuzuvarise 7:20) Hapo mape hee kutja Mukuru ma isa okukongorera omirari vye mbya twapo, kutja ovandu mbe he ri ohomonena nu mbe tjita ouvi ve ka hupe nga aruhe? Kako Katjiperi! Eye kamaa roro okutjita nao mena rokutja ‘Ndjambi ka wovisa.’ (Titus 1:2) Nu hapo Mukuru ma tjiti vi okuyenenisa ondando ye kovandu?

Jehova Mukuru wa raisa orusuvero rwe mokuyandja otjisuta tjonguturiro okukutura ovandu konḓiro. Embo ndi otjisuta tjonguturiro, ri kamburira mo otjimariva tji tji sutwa okuyarurapo onḓengu konyonokero ndja tjitwa kotjiṋa poo okuyenenisa imbi mbi undjirwa ko koveta. Mena rokutja ovandu avehe ve nouvi nu va pewa omberero yonḓiro. Ombeibela i tja: “Kape nomundu ngu ma sora okukutura omuinyo womukwao nokumusutira ovyongutukiro ku Ndjambi; orondu omasutiro womuinyo womundu owo omengi tjinene; imbi mbi ma sora okusuta kamaavi yenene.”​—Epsalme 49:7, 8.

Indu omundu ngu he ri ohomonena tja ṱu, eye u suta ouvi we omuini uriri posi yokutja ka yenene okuriyama omuini poo okusuta ouvi womundu warwe. (Ovaroma 6:7) Eṱe aatu hepa omundu ohomonena okuṱira ouvi wetu, posi yokutja kawombwi owe omuini.​—Ovaheberi 10:1-4.

Mukuru wa tjita kutja pe kare nao. Eye wa hinda Omuna we Jesus okuza keyuru okukwatwa otjomundu ohomonena ngu he nouvi. (1 Petrus 2:22) Jesus wa tja eye we era ‘okuyandja omuinyo we, u rire onguturiro yovengi.’ (Markus 10:45) Eye wa ṱa kutja ma sute ouvi wetu nokutukutura konḓiro.​—Johanes 3:16.

Ndino, tu muna omayenenisiro womaprofetero nge ri mOmbeibela, wokutja tu hupa ‘motuveze otuzeu.’ Ihi tji raisa kutja tu hupa “momayuva omasenina” wouye ourunde mbwi. (2 Timoteus 3:1) Komaandero womayuva omasenina, ovarunde mave “pangurwa nokunyonwa.” (2 Petrus 3:3, 7) Posi yokutja ovandu mba suvera Mukuru mave yamwa nu mave munu ondaya ‘yomuinyo waaruhe.’—Mateus 25:46.

Ovandu omangete omengi varwe, mave munu omuinyo waaruhe indu tji va pendurwa. Indu Jesus tja karyangera otjihuro tja Nain, eye wa katjita  ombendukiro. Omuatje omuzandu erike womuhepundu wa ṱire, nu Jesus tja muna omukazendu ngwi “we mu ṱira ondjenda” na pendura omuatje we komuinyo. (Lukas 7:11-15) Omuapostele Paulus wa tja: “Ami mbi nomaundjiro tjingewo nga mu Ndjambi . . . wokutja ovandu avehe ovawa novavi mave penduka movakoke.” Omaundjiro nga, tjiri ye raisa kutja Mukuru u norusuvero rwapeke kovandu.​—Oviungura 24:15.

Omangete wovandu ve nomaundjiro wokukahupa nga aruhe. Ombeibela i tja: “Ovasemba mave rumata ehi, nu mave tura mu ro nga aruhe.” (Epsalme 37:29) Moruveze ndo ovandu mave kara nondjoroka tjinene nu mave yanḓiparisiwa okumuna omayenenisiro womambo womuapostele Paulus nga tjanga ozombura ape 2 000 nḓa kapita. Indu tja tja: “Nḓiro outoṋi woye u ri pi? Nḓiro, omasa woye wokuzepa ye ri pi?” (1 Ovakorinte 15:55) Tjiri, omunavita wetu onḓiro mai kaisapewa!