NGATU tje mo tarere okavidio ohunga nomundu omutjiukwa, ngahino omunyande womizumbi ngu ku tjatera. Okavidio nga a ke utu okunyanda indu tjaa ri omuṱiṱi, tji me rihongo nokurirongerisa okunyanda omizumbi. Okuzambo a ke raisa omuano tji ma imbura povitjitwa nokuryangera omahi pekepeke nga tja rire omundu omutjiukwa mouye auhe. Tjimanga ngunda a mo tarere, omundu ngwi wa uta okukurupa nu okuzambo a ṱu.

Okavidio nga, ka raisa ehungi ra katjiri romundu ngwa ṱa. Nandarire kutja omundu wa ri omuimbure womizumbi, omunongonone, omutupuke wotjikara poo omundu omutjiukwa tjinene, ehungi re wina atja ri yanda momuano mbo. Omundu ngo mape ya wa yenenisa oviṋa oviwa ovingi, posi yokutja andakuzu ka kurupire nokukoka, eye mape ya atja yenenisa oviṋa ovingi kombanda yanao.

Tjiri otjihihamise, posi yokutja atuhe matu kurupa nokukoka. (Omuzuvarise 9:5) Nandarire kutja twa kondjo pu pe ṱa pi, kamaatu yenene okuyepa okukurupa nonḓiro. Nu wina, mape ya atu ṱu tjimanga mena rouvere poo oumba ngamwa auhe. Otja tji pa tamunwa mOmbeibela, eṱe tu ri tjimuna omuise womuhuka “mbu munika okaruveze okaṱiṱi, nu tjazumbo au zengi.”​—Jakobus 4:14.

Mena rokutja mape ya atu ṱu oiri ngamwa aihe, ovandu tjiva ve nongaro yokutja “ngatu rye nu ngatu nwe, orondu muhuka tjandje twa ṱu.” (1 Ovakorinte 15:32) Ovandu ve hupa momuano mbo, mena rokutja ve tjiwa kutja mape ya ave ṱu oiri ngamwa aihe nu owo kave nomaundjiro woruyaveze. Tjinenenene indu tji u ri mouzeu mape ya oripura omuini kutja, ‘hapo ehupo ndi opuwo ondi ri ko?’ Eziriro mo ri vaza pi?

Ovandu ovengi ndino ve kambura mounongo wovimemwa. Ovanongonone nozonganga va muna oviṋa mbi mavi yenene okutjita kutja ovandu ve hupe orure. Nu ovanongonone tjiva ve ungura nomasa okuyenenisa ondando ndjo. Nandarire kutja ve muna ondoṋeno poo indee, eṱe ngunda tu ripura omapuriro otja inga: Ongwaye tji tu kurupa nokukoka? Hapo pe nomaundjiro wokutja omunavita na eṱe, indji onḓiro mai kaisapewa? Otupa tu matu kongorere ko matu ka konḓonona omapu ngo nokuzira epuriro ndi, ‘Ehupo ndi opuwo ondi ri ko?’