Mukuru wa raera Adam kutja, “ko nokurya kovihape vyawo. Tji mo tjiti nao, mo ṱu.” (Genesis 2:17) Andakuzu Mukuru wa ungura Adam kutja ma kurupe nokukoka katjape kara ohepero okumupa erakiza ndo. Adam aa tjiwa kutja tja ri komuti mbo ma ṱu.

Adam na Eva kaave hepa okurya komuti mbo kutja ve kayende komurungu okuhupa, orondu otjikunino tje urire nomiti omingi mbyaavi vepe ovikurya. (Genesis 2:9) Andakuzu kave rire komuti mbo, ovakupasane ovatenga mbo atjave raisa onḓuviro yawo ku ingwi ngwe ve pa omuinyo. Owo wina atjave raisa kutja Mukuru erike ongu nousemba wokuveraera kutja ngave tjite vi.

Kutja tu zuve nawa kutja ongwaye Adam na Eva tji va ṱa, eṱe matu sokukonḓonona ehungi nde tu ṱuna atuhe. Satan Omudiaboli wa ungurisa onyoka okukora otjizeze otjivi tjinene. Ombeibela mai tja: “Nungwari onyoka ya ri notjurutjutju tjinene povipuka avihe mbya ungurirwe i Muhona Ndjambi. Noyo ya pura komukazendu ai tja: ‘Indu Ndjambi otja hee, tjiri, kutja aamu ri komiti ngamwa avihe motjikunino?’”​—Genesis 3:1.

Eva wa tja: “Kovihape vyomiti, mbi ri motjikunino, tu nousemba okurya ku vyo, nungwari kovihape vyomuti mbu ri mokati kotjikunino, Ndjambi wa tja: ‘Eṋe amu ri ko ku wo, nu amu ṱunu ku wo; tjaa mamu ṱu.’” Nonyoka ya tja ku ye: “Kamambo! Indee uri, kamaamu ṱu! Nungwari Ndjambi ma tjiwa kutja tji mwa ri ku wo, omeho weṋu maye paturuka, amu sana ku Ndjambi omuini namu tjiwa ouwa nouvi.” Kunao, Satan wa tja Jehova omunavizeze nu kaa vanga kutja Adam na Eva ve mune ouwa.​—Genesis 3:2-5.

Eva wa kambura motjizeze tjo. Eye aa tara komuti. Owo aau munika nawa nu au nana ombango ye! Eye wa toora otjihape na utu okurya. Ombeibela mai tja: “Na yandja komurumendu we, neye wina a ri.”​—Genesis 3:6.

Tjiri tja ri otjihihamise ku Mukuru okumuna kutja ovanatje ve ovasuverwa kava ri nonḓuviro ku ye! Eye wa tjita tjike? Jehova wa tja ku Adam: “Mo yaruka kehi punga awa ungurwa. Orondu ove oove oruuma nu mo yaruka koruuma.” (Genesis 3:17-19) Mena ranao “eye wa koka a ri nozombura omasere muvyu nomirongo vitatu.” (Genesis 5:5) Adam kai re keyuru poo komaturiro wozombepo. Eye ka ri nomuinyo komurungu wa indu Jehova tje mu mema poruuma rwehi. Kunao tja ṱa ka ri  nomuinyo tjimuna oruuma rwehi pa ungurirwe. Eye ka ri po rukwao. Iho tjiri otjihihamise!

Mena rokuhina onḓuviro, Adam na Eva va pandjara ouhomonena wawo nomuinyo waaruhe. Owo kava ri ohomonena rukwao, va ri nouvi. Posi yokutja okuhina okukara nonḓuviro ku Mukuru kaku ṱunine ku wo uriri. Nu ouvi mbwi va yandja kovanatje vawo. Ovaroma 5:12, ma ri tja: “Ouvi wa zira momundu umwe nau ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe, owo avehe tjinga ava tjita ouvi.”

Ombeibela i tja ouvi nonḓiro vi ri tjimuna “ewiwiri roruhoze nda rekarekera oviwaṋa nomihoko avihe.” (Jesaja 25:7) Ewiwiri ndi rekarekera ovandu avehe ri ri tjimuna omuise omunawanga mbu ṱuna kovandu avehe. Tjiri, ‘ovandu avehe ve ṱa mena rokutja va za mu Adam.’ (1 Ovakorinte 15:22) Omuapostele Paulus wa pura epuriro ndi: “Owaṋi ngu me ndji kutura korutu ndwi ndu maru ndji twara konḓiro.” Hapo atja rira uṋe?​—Ovaroma 7:24.