Twa ungurwa kutja tu hupe nga aruhe
OVANDU avehe ve vanga okuhupa orure nokukara nondjoroka. Ripura nondjoroka ndji mo kara nayo tji mo hupu nga aruhe, nokuhina okuvera! Eṱe matu kara noruveze oruingi okukara pu novasuverwa vetu, okuryanga ongondoroka mouye, nokurihonga okuungura oviṋa ovingi mbi twa suvera.
Ongwaye ovandu tji ve vanga okuhupa nga aruhe? Omatjangwa ye tu raera kutja Mukuru wa twa mo onḓero ndjo mu eṱe. (Omuzuvarise 3:11) Oyo wina ye tja: “Ndjambi tjinga e ri orusuvero.” (1 Johanes 4:8) Hapo Mukuru worusuvero mape ya e tu ungura nonḓero yokuvanga okuhupa nga aruhe nu okuzambo a ha yenenisa ondando ye?
Otjingaperi kutja kape nomundu ngu vanga okukoka. Ombeibela wina i tja, onḓiro ‘omunavita.’ (1 Ovakorinte 15:26) Kovandu tjiva i ya tjimanga, ku varwe i womba. Posi yokutja komaandero atuhe tu koka. Ovandu ovengi tji mave ripura ohunga nonḓiro, ve tira. Hapo onḓiro mape ya ai kaisapewa? Iho matji tjitwa tjiri?
OVIṊA MBI TU PA OMAUNDJIRO
Hapo mape ya atji ku temisa okutjiwa kutja kandja ri ondando ya Mukuru ovandu okukoka? Embo ra Genesis ri raisa oukahu kutja ya ri ondando ya Mukuru kovandu okuhupa kombanda yehi nga aruhe. Jehova wa mema ehi noviṋa avihe ovandu mbi mave hepa ko kutja ve hupe nokukara nondjoroka. Okuzambo wa mema omurumendu omutenga Adam ne mu twa moparadisa motjikunino tja Eden. Nu okuzambo “Ndjambi wa nongonona avihe mbya ungura, nu vya ri oviwa tjinene.”—Genesis 1:26, 31.
Adam wa ri ohomonena nu wa memenwe kosaneno ya Ndjambi. (Deuteronomium 32:4) Eva omukazendu wa Adam, wina kaa ri notjipo, wa ri ohomonena mouripura na morutu. Jehova wa tja ku wo: “Kwatasaneye, takavareye nu mu urise ehi, noro ngari kare kehi yeṋu; nu kareye nouvara kombanda yomahundju wokuvare na kozonḓera zeyuru na kovinamuinyo avihe, mbi ri kombanda yehi.”—Genesis 1:28.
Okuurisa ehi nozondekurona zawo atja ku kambura oruveze. Eva atja panduka ovanatje, nu ovanatje mbo atjave kara novanatje nga indu ouye auhe tji we ura novandu tjimuna Mukuru tjaa vanga. (Jesaja 45:18) Mo munu kutja Jehova atja yandja ondjingonekero ndjo ku Adam na Eva andakuzu aa vanga kutja ve hupe okumuna ovanatje vawo, novanatje vovanatje vawo uriri, nokuhinokutjiwa kutja ma ku katjitwa tjike kuwo?
Ripura wina ohunga neronga rokukara nouvara kombanda yovipuka. Adam wa raerwa kutja nga ruke ovipuka omana, nu otjiṋa hi atja tji kambura oruveze. (Genesis 2:19) Posi yokutja okukara nouvara kombanda yovipuka aaku hee kutja ma sokurihonga vyo nokuvitjevera. Okutjita nao atja ku kambura oruveze oruingi.
Omarakiza wa Mukuru wokuurisa ehi nokukara nouvara kombanda yovipuka aaku raisa kutja ovandu ovatenga va ungurirwe kutja ve hupe oruveze orure tjinene. Nu tjiri Adam kahupire orure.
ONDANDO YA MUKURU OYOKUTJA OVANDU VE HUPE NGA ARUHE MOPARADISA KOMBANDA YEHI
OWO VA HUPA ORUVEZE ORURE
Adam, ozombura 930
Metuselak, ozombura 969
Noa, ozombura 950
Ndino, ozombura 70-80
Ombeibela i raisa kutja ovandu aave hupu oruveze orure okukapita eṱe ndino. Oyo i tja Adam “wa koka a ri nozombura omasere muvyu nomirongo vitatu.” Nu wina i hungira ohunga novarumendu 6 mba hupa ozombura zokombanda 900! Owo va ri Set, Enos, Kenan, Jered, Metuselak na Noa. Avehe va hupa komurungu wOmupupo wa Noa. Nu Noa wa hupa ozombura 600 komurungu womupupo. (Genesis 5:5-27; 7:6; 9:29) Ongwaye tjaave hupu orure nao?
Ovarumendu avehe mba va hupire popezu tjinene noruveze indu ovandu tji va ri ohomonena. Ngahino opu va zokuhupa orure nao. Hapo okurira ohomonena ku ṱuna vi kokuhupa orure? Nu onḓiro ma isapewa vi? Kutja tu mune omaziriro komapuriro ngo, eṱe rutenga matu hepa okutjiwa kutja ongwaye tji tu kurupa nokukoka.