Ovandu tjiva ve muna kutja Embo ra Mukuru ra rundururwa. Omuprofete Jesaja wa tja Embo ra Mukuru “ri karerera nga aruhe.” (Jesaja 40:8) Hapo matu tjiwa vi kutja omakwizikiro wa Mukuru kaye ya rundururwa?

Mukuru u nomasa wokutjevera Embo re nokuṱakamisa kutja a ri ha rundururwa. Moruveze orukuru, indu omatjangwa tjaaye tjangwa neke, ovatjange aave tara embo arihe romatjangwa omayapuke nongengezero okutjiwa kutja kape nembo nda weziwa ko, nda tanaurwa poo nda isiwa pehi. Nandarire nao, ovatjange tjiva va tjita ozondataiziro ozonḓiṱi, mena rokutja ovandu ka homonena.

Pe noviherengururwa ovingi vyomambo omakuru wOmbeibela. Indu tji mo sasaneke oviherengururwa pekepeke vyomambo wOmbeibela ku ri ra oupupu okumuna ngamwa ondataiziro ndji ri po. Tji mo vanga ondjivisiro yokomurungu, Lesa orupa ndwi, “Has the Bible Been Changed or Tampered With?” ko jw.org.

Otjotjihorera, tara komambo omakuru nge isanewa oDead Sea Scrolls, nga munikwa i yOvaaraba mbaave tjindi okuza koruveze rumwe okuyenda ku rwarwe motupoko tu turi meṋe yOmurongawomongwa mombura ndji 1947. Omatjangwa omakuru ngo ye notupa tjiva twOmbeibela tu twa tjangwa ozombura zokombanda yomayovi yevari nḓa kapita. Ozonongo za sasaneka omambo omakuru ngo ku nOmbeibela ndji tu ungurisa ndino. Hapo owo va muna tjike?

Ozonongo za muna kutja ombuze ndji ri mEmbo ra Mukuru ndi tu ungurisa ndino, ngamba kai ya runduruka. * Matu yenene okukara nongamburiro kutja Mukuru we tu ṱakamisira nawa ouatjiri wOmbeibela nga ku ndino.

Kunao, matu yenene okulesa Embo ra Mukuru nongamburiro okuura yokutja ka ri ya rundururwa. Tjiperi nao, nambano matu katara kutja matu rihongo ye ohunga na Mukuru okuza kovaprofete ve.