Mukuru wa kwizikira omuprofete Abraham kutja umwe wozondekurona ze ongu ma tjiti kutja “omihoko avihe, mbi ri kombanda yehi” vi serwe ondaya. (Genesis 22:18) Hapo ondekurona ndjo aai sokurira uṋe?

Ape ozombura 2 000 nḓa kapita, Mukuru wa yandja omasa ku Jesus ngwa ri ondekurona ya Abraham, okutjita ovihimise. Ovihimise mbyo vya raisa kutja omakwizikiro nga tjitwa ku Abraham maye yenenisiwa koviwaṋa avihe okupitira mu Jesus.—Ovagalate 3:14.

Ovihimise Jesus mbya tjita vya vatera ovandu okutjiwa kutja eye ongwa toororwa i Mukuru okuyama ovandu, novyo wina vya raisa omuano Mukuru mu me ke mu ungurisa okuyeta ondjamo kovandu nga aruhe. Tara komuano ovihimise Jesus mbyaa tjiti mu vya raisa tjiva vyovikaṋena vye oviwa.

Otjari—Jesus aa verukisa ovavere.

Otjikando tjimwe omurumendu ngwa verere ongana we riheka ku Jesus okumuverukisa. Jesus wa ṱuna kuye na tja: “Ami me vanga.” Nu tjimanga eye wa veruka omutjise wongana.—Markus 1:40-42.

Ouharupu—Jesus aa parura ovandu mba ri nondjara.

Jesus kaa vanga kutja ovandu ve ṱondjara. Povikando tjiva eye wa parura ovandu omayovi omengi momuano omuhimise, mokutjita kutja ozomboroto ozonḓiṱi nozohi ozonḓiṱi ze yenene kuwo. (Mateus 14:17-21; 15:32-38) Tji va za nokurya avehe va ri nohange nu pa hupa ovikurya ovingi.

Ondjenda—Jesus aa pendura ovaṱi.

Jesus wa pendura omuzandona erike womuhepundu ngwa ṱoruhoze tjinene nu ngu hari nomundu warwe okumutjevera, mena rokutja “we mu ṱira ondjenda.”—Lukas 7:12-15.