Okuza kombutiro yomundu, Omuute wetu aa hungire ku novandu okupitira movaengeli novaprofete. Eye wina wa tjita kutja, ombuze ye nozondaya nḓa kwizika ze tu we momatjangwa. Mukuru wa kwizika kutja matu ka kara nondjoroka moruyaveze. Hapo omakwizikiro wa Mukuru matu ye vaza pi ndino?

Ombuze ya Mukuru kweṱe i ri mOmbeibela. (2 Timoteus 3:16) Omomuano uṋe Mukuru ma ungurisa ovaprofete okutjanga ombuze ye? (2 Petrus 1:21) Mukuru wa twamo omeripura we mourizemburuka wovatjange nu owo ave yenene okuyetjanga. Ndino ovandu wina ve tjita nao. Otjotjihorera, indu omunangetjefa tja ungurisa omutjangerepo we okumutjangera ombuze, tu yakura kutja omunangetjefa ongu ri omutjange wombuze ndjo. Momuano otjingewo, nandarire kutja Mukuru wa ungurisa ovarumendu okutjanga Ombeibela, eye omuini ongu ri Omutjange wOmbeibela.

Ombuze ya Mukuru onanḓengu tjinene nu eye u vanga kutja ovandu avehe ve lese nokuizuva nawa. Ndino ‘ombuze ombwa yaaruhe’ ya Mukuru i munikwa “komihoko avihe na komaraka aehe na koviwaṋa avihe.” (Omavandururiro 14:6) Mena rozondaya za Mukuru, Ombeibela i yenena okulesewa aihe poo motupa momaraka wokombanda 3 000, tjinene okukapita omambo warwe kombanda yehi.