Ripura uriri kutja ehupo kombanda yehi atja ri kara vi nokuhina ozohanya zeyuva? Eyuva riyandja omasa komiti okuhapisa oviyao, ozongara, ovihape nozondwi. Oro wina ri vatera omize okunana omeva okuza mehi, nge yenda koviyao vyomiti nu okuzambo a ye i meyuru.

Mukuru u tupa ombura ndji tjita kutja ehi rihapise ovikurya mbi tu rya. Nu u tupa omakondero wovikunwa moruveze orusemba, novikurya oviwa mbi tu parura nokutupa ondjoroka.

Ovarumendu ovengi mbe nomaṱunḓu ve rikenda ohunga nomuano mu mave yenene okutumba omaṱunḓu wawo. Omatjangwa ye tja: “Tareye kozonḓera zokuti: Ozo kaze kunu nu kaze kondo, nu kaze wongere momatuwo womapwikiro, nungwari Iho meyuru Eye ngo u ze kora. Neṋe kamu vananḓengu pozonḓera are?”—Mateus 6:25, 26.

“Tareye ozongara zozonyanga mokuti tji ze hapa . . . Nungwari me raere eṋe kutja nangarire ombara Salomo noutumbe we auhe ke na indu wa zarekerwe otja imwe yazo. Nu Ndjambi ngu zareka momuhingo mbwa sana ngo inga omahozu nge ri mokuti . . . , ma urwa i tjike okuzareka eṋe tjinene komeho?”—Mateus 6:28-30.

Mena rokutja Mukuru u yenena okutupa ovikurya nozombanda, eye wina ma yenene okutuvatera noviṋa vyarwe mbi matu hepa mehupo. Indu eṱe tji matu kondjo okutjita ombango ya Mukuru, eye ma sere ozongondjero zetu ondaya kutja imbi mbi twa kunu vi hape poo ma yenene okutuvatera okumuna oviungura kutja tu yenene okuranda mbi matu hepa mehupo.—Mateus 6:32, 33.

Indu tji matu tara keyuva, kombura, kouzera nozongara, ku tjita kutja tu suvere Mukuru. Orupa ndu maru kongorere ko maru kahungirira komuano Omuute wetu maa hungire ku novandu.