Omuprofete Moses wa tja tji twa ṱakamisa omatwako wa Mukuru, Eye me tu sere ondaya. (Deuteronomium 10:13; 11:27) Onḓuviro yetu ku Mukuru kaizu mokutira kutja me tu vere. Ovikaṋena vye oviwa vi tu hinga kutja tu kare nonḓuviro kuye mena rokutja twe mu suvera, nu katu vanga okutjita otjiṋa tji mape ya atji mu hihamisa. Ombeibela i tja: “Norusuvero rwetu ku Ndjambi eendu tji matu ṱakamisa omatwako we.”—1 Johanes 5:3.

Hapo okukara nonḓuviro ku Mukuru ku tu yetera vi ouwa? Tara komiano vivari mbi.

“OwAmi Muhona Ndjambi woye, ngu mbi vanga okukuhonga ihi tji tji ri ombatero kove, nu ngu me ku urikire ondjira mu mo sokuryanga.”—JESAJA 48:17.

Jehova Mukuru ngu ri Omuute wetu, u tu tjiwa nu u tu urikira ondjira mu matu sokuryanga. Indu tji matu vanga kutja omahongero we ye tu vatere okutwapo ozondando ozombwa, eṱe matu sokurihonga okuza mOmbeibela kutja Mukuru u vanga kutja tu tjite vi nu okuzambo atu ungurire ko.

“Ovaṋingandu komeho imba mbe zuva embo ra Ndjambi nave ṱakamisa ro!”—LUKAS 11:28.

Ndino ovandu ovengi mbe nonḓuviro kEmbo ra Mukuru ve kara nondjoroka. Tara kotjihorera tjomurumendu moSpain ngwaa pindike tjimanga nokutumba varwe navi, nandarire omukazendu we. Eyuva rimwe wa lesa momatjangwa womuprofete Moses ohunga nomuano Josef omuatje wa Jakob ma raisa oupore. Josef wa randisiwa otjomukarere nu wa paterwa motjovakamburwa nokuhinondjo, posi yokutja eye wa raisa oupore, wa ri nohange nu wa isira. (Genesis, ekondwa 37-45) Omurumendu ngwa turire moSpain ngo wa tja: “Okuripurira kotjihorera tja Josef kwe ndji hinga kutja mbi kare noupore, otjari nomeritjaerero. Mena rotjiṋa ho, ami nai mbi nondjoroka mehupo.”

Ombeibela i tupa omirari omingi ohunga nomuano mu matu sokutjinda varwe. Matu katara komirari mbyo morupa ndu maru kongorere ko.