1. Jehova wa rongerisa vi ovakarere ve momuano omuhirona meserewondo etenga?

 INDU Jehova tja yandja oviungura kovakarere ve okuungura, eye u vanga kutja ve vi ungure momuano omuhirona. (1 Kor. 14:33) Otjotjihorera, ombango ya Mukuru kutja ombuze ombwa i zuvarisiwe mouye auhe. (Mat. 24:14) Jehova wa zika Jesus okuhongorera po otjiungura ho. Nu Jesus wa tjita kutja otjiungura ho tji ungurwe momuano omuhirona. Meserewondo etenga, ozombongo tji za zikamisiwa motuveze pekepeke, ovanene vombongo poo ovatarere va zikwa okuyandja omuhunga nokuhongorera po. (Oviung. 14:23) MoJerusalem orutu rwovanene vombongo, ndwaaru kamburire mo ovaapostele novatarere vombongo, aaru twa po ozondando ozombongo azehe nḓaaze sokukongorera. (Oviung. 15:2; 16:4) Mena rokutja owo va ri nonḓuviro komirari mbi va pewa, “ozombongo otji za zeuparisiwa mongamburiro naze takavarere ko.”—Oviung. 16:5.

2. Okuza mombura ndji 1919, omomuano uṋe Jehova ma hongorera ovakarere ve nokuvepa omuhunga okuza mEmbo re?

² Jehova u kayenda komurungu okurongerisa ovakarere ve momuano omuhirona nandarire ndino. Okuza mombura ndji 1919, Jesus wa ungurisa okambumba okaṱiṱi kovarumendu ovatwirisiwa okurongerisa otjiungura tjokuzuvarisa nokuyandja omuhunga okuza mEmbo ra Mukuru kovemukongorere moruveze ndu ri rwo. a (Luk. 12:42) Oukahu kutja Jehova u sera oviungura vyokambumba ngo ondaya.—Jes. 60:22; 65:​13, 14.

3-4. (a) Yandja otjihorera tji matji raisa omuano mu tu muna ouwa mena rokutja twa rongerisiwa momuano omuhirona. (b) Matu katara ku ye morupa ndwi?

³ Andakuzu katu ya rongerisiwa momuano omuhirona, eṱe katja  tu yenenisa otjiungura Jesus tje tu pa okuungura. (Mat. 28:​19, 20) Otjotjihorera, andakuzu ovarumendu ovakambure kave tu rongerisa okukazuvarisa momuano omuhirona potuveze ombongo yetu ku i kazuvarisa, omundu auhe atja kazuvarisa ku ma vanga. Eṱe mape ya atu zuvarisa potuveze tjiva tjinene, posi ya atu ha zuvarisa potuveze twarwe oparukaze. Ove mape ya o ripura ohunga nomiano vyarwe mu tu muna ouwa mena rokutja tu rongerisiwa momuano omuhirona.

⁴ Tjimuna Jesus tjaa rongerisa ovemukongorere momuano omuhirona indu tjaari kombanda yehi, eye wina u kayenda komurungu okurongerisa ovakarere va Mukuru ndino momuano omuhirona. Morupa ndwi, matu katara kotjihorera Jesus tja twa po nomuano otjira tjetu mu tji kongorera otjihorera ho. Eṱe wina matu kahungirira komuano mu matu yenene okuraisa ongamburiro motjira tja Jehova.

OTJIRA TJETU TJI HORERA KU JESUS

5. Omuano uṋe umwe mu tu horera ku Jesus? (Johanes 8:28)

⁵ Jesus we rihongera ku Ihe womeyuru mu imbi mbya tjiti nokuhungira. Otjira tja Jehova tji horera ku Jesus mokuungurisa Embo ra Mukuru okutuvatera okutjiwa imbi mbi ri ovisemba na mbi he ri ovisemba, nokutupa omuhunga mehupo retu. (Lesa Johanes 8:28; 2 Tim. 3:​16, 17) Eṱe aruhe tu zemburukisiwa okulesa nokuṱakamisa Embo ra Mukuru. Eṱe tu muna vi ouwa mokuṱakamisa eronga ndo?

6. Omuano uṋe umwe omunanḓengu mu tu muna ouwa indu tji matu konḓonona Ombeibela?

⁶ Eṱe tu muna ouwa tjinene indu tji matu konḓonona Ombeibela mokuungurisa omambo wetu nga zikamena kOmbeibela. Otjotjihorera, eṱe tu yenena okusasaneka omahongero wOmbeibela ku nomuhunga mbu tu muna okuza kotjira tja Jehova. Mena rokutja omuhunga otjira tja Jehova mbu tji ungurisa wa zikamena kOmbeibela, eṱe tu kara nongamburiro mu tjo.—Rom. 12:2.

7. Ombuze yatjike Jesus ndja zuvarisa nu omomuano uṋe otjira tja Jehova mu tji horera ku ye?

⁷ Jesus wa zuvarisa “Ombuze Ombwa youhona waNdjambi.” (Luk. 4:​43, 44) Jesus wina wa rakiza ovahongewa ve okuzuvarisa ohunga nOuhona wa Mukuru. (Luk. 9:​1, 2; 10:​8, 9) Avehe ndino mbe ri motjira tja Jehova ve zuvarisa ombuze ohunga nOuhona, nandarire kutja va tura pi poo ve nomerizirira nge ṱa pi motjira tje.

8. Ondjingonekero yaye ndji twa pewa?

⁸ Ondjingonekero yapeke kweṱe okuraera varwe ohunga nOuhona wa Mukuru. Kamundu auhe ngu u muna ondjingonekero ndjo. Otjotjihorera, indu Jesus tja ri kombanda yehi, eye kaa yandjere ozombepo ozohakohoke okuzuvarisa ohunga na ye. (Luk. 4:41) Ndino, indu omundu ngunda e hi ya uta okuzuvarisa pu nOvahongonone va Jehova, eye ma sokuhupa otja komuano mbu tjata ku Jehova. Eṱe tu raisa ondangi kondjingonekero ndji mokuzuvarisa apehe pu tu ri nu otja pu matu yenene. Eṱe tu vanga okukara tjimuna Jesus, ku nao tu kondja pu matu yenene okuzuvarisa ku varwe nokuvehonga ouatjiri.—Mat. 13:​3, 23; 1 Kor. 3:6.

9. Otjira tja Jehova tji tjiukisa vi ena ra Mukuru?

⁹ Jesus wa tjiukisa ena ra Mukuru. Mongumbiro ye ku Ihe womeyuru, Jesus wa tja: “Ami mbe ve tjiukisa ena roye.” (Joh. 17:26) Otjira tja Jehova tji horera ku Jesus mokukondja otja pu matji yenene okuvatera varwe okutjiwa ena ra Mukuru. Omuano umwe otjira mu tja tjita nao okupitira momatorokero wOmbeibela ndji o-New World Translation of the Holy Scriptures. Omatorokero nga ya kotora ena ra Mukuru poruveze pu ra ri rukuru momaraka Ombeibela mu ya tjangerwe. Omatorokero wOmbeibela ndji ye munikwa motupa poo moumbomba wayo momaraka wokombanda yo-270. Tara mokambo nga Okambo kokukonḓonona Embo raMukuru pomukuma 1-13 , ohunga nokutja ena ra Mukuru ra kotorwa vi mOmbeibela. Tji mo vanga okutjiwa kutja ena ra Mukuru kutja ri munika ovikando 237 mOmatjangwa wOtjigrike, twende pomukuma 6 kehi yorupa 2 rwokambo nga Okambo kokukonḓonona Embo raMukuru.

10. Matu rihongo ye okuza komambo womukazendu ngwa za koMyanmar?

¹⁰ Tjimuna Jesus, eṱe tu vanga okuvatera ovandu ovengi otja pu matu yenene okutjiwa ena ra Mukuru. Indu omukazendu wozombura 67 ngwa za koMyanmar tje rihonga kutja Mukuru u nena, eye wa uta okurira. Eye wa tja: “Ihi otjikando otjitenga mehupo randje okuzuva kutja ena ra Mukuru oJehova. . . . Eṋe mwe ndji honga otjiṋa otjinanḓengu tjinene.” Otja tji twa munu motjihorera hi, indu ovandu tji ve rihongo ohunga nena ra Mukuru tji yenena okurundurura ehupo rawo.

KAYENDE KOMURUNGU OKURAISA ONGAMBURIRO MOTJIRA TJETU

11. Omomuano uṋe ovanene vombongo mu mave yenene okuraisa ongamburiro motjira tja Jehova? (Wina tara kotjiperendero.)

¹¹ Omomuano uṋe umwe ovanene vombongo mu mave yenene okuraisa ongamburiro motjira tja Mukuru? Indu otjira tji tja yandja omaronga kovanene vombongo, owo mave hepa okuyelesa nawa nokuṱakamisa omaronga ayehe ngo otja pu mave yenene. Otjotjihorera, owo ve pewa omuhunga okuhongorera po otupa pozombongarero zombongo poo okukumba, nu owo wina ve pewa omuhunga ohunga nokutja ve sokutjevera vi ozonḓu za Kristus. Indu ovanene vombongo tji mave ṱakamisa omaronga ayehe ngu maye zu kotjira, ovakambure ovakwetu ve muna kutja Jehova we ve suvera nu u ve tjevera.

12. (a) Ongwaye tji matu sokupuratena ku imba mbe tu hongorera po? (Ovaheberi 13:​7, 17, NWT) (b) Ongwaye tji matu sokuyandja ombango kovikaṋena oviwa vyaimba mbe tu hongorera po?

¹² Indu tji twa munu omuhunga okuza kovanene vombongo, eṱe matu sokuukongorera nonḓero. Mokutjita nao, eṱe matu tjiti kutja i rire oupupu ku imba mbe tu hongorera po okuungura oviungura vyawo. Ombeibela i tu tunduuza kutja tu kare nonḓuviro nokuriwisa kehi yaimba mbe tu hongorera po. Ovaheberi 13:7 (NWT) mari tja: “Zemburukeye imba mbe mu hongorera po mokati keṋu, mba hungira embo ra Mukuru kweṋe, nu horereye kongamburiro yawo otja tji mamu tara kutja omeritjindiro wawo ye eta ovikongorereko viṋe.” Ezeva 17 (NWT) mari tja: “Kareye nonḓuviro ku imba mbe mu hongorera po mokati keṋu nu riwiseye kehi yawo, mena rokutja ve nomerizirira wokumutjevera, kokutja ve tjite nao nenyando nokuhinoruhoze, tjarwe ihi matji mu hihamisa.” Povikando tjiva i rira ouzeu. Omena raye? Mena rokutja ovarumendu mba kavandu ohomonena. Posi yokutja, indu tji twa yandja ombango kovikaṋena vyawo ovivi pendje nokuyandja ombango kovikaṋena vyawo oviwa, eṱe matu vatere ovanavita na eṱe. Ongwaye tji matu tja nao? Ovanavita na eṱe ve vanga kutja tu keyakeye kutja Jehova u ungurisa otjira tje okutuhongorera po. Ku nao, indu tji tu noumune woposyo ohunga novanene vombongo, eṱe mape ya atu utu okuripura navi ohunga notjira nu atu pandjara ongamburiro mu tjo. Ovikwaye mbi matu sokutjita kutja tu mune nokupirukira ovizeze vyovanavita na eṱe?

O YANDJERE VARWE OKUNGUNDIPARISA ONGAMBURIRO YOYE MOTJIRA TJA JEHOVA

13. Omomuano uṋe ovanavita na Mukuru mu ve kondja okuzunḓa otjira tje?

¹³ Ovapirukire va Mukuru ve kondja okutjita kutja oviṋa oviwa ohunga notjira tja Jehova vi munike aayo oviṋa ovivi. Otjotjihorera, eṱe twe rihonga kutja Jehova u vanga kutja tu rire ovandu ovakohoke korutu na momeritjindiro, nokurikotamena ku ye momuano me yakura. Eye  u tja omundu ngu kayenda komurungu okuritjinda ouhakohoke nu ngu ha vanga okurundurura ongaro ye, omundu otja ingo ka sokurira orupa rwombongo. (1 Kor. 5:​11-13; 6:​9, 10) Eṱe tu nonḓuviro kerakiza ndo. Mena rokutja tu kara nonḓuviro kerakiza ndo, ovetupirukire ve tja eṱe katu ya suvera ovandu, tu ve pangura, nu katu yakura omundu ngwa panguka kweṱe.

14. Ouṋe ngu handjaura ozombuze zovizeze ohunga notjira tja Jehova?

¹⁴ Ouṋe ngu hongorera po omapirukiro wotjira tja Jehova? Satan Omudiaboli ongu etisa ozombuze zovizeze. Eye ‘oihe yovizeze avihe.’ (Joh. 8:44; Gen. 3:​1-5) Ku nao, eṱe matu sokuundjira ko kutja Satan ma ungurisa ovanavita na eṱe okuhandjaura ozombuze zovizeze ohunga notjira tja Jehova. Iho tja tjitirwe ku Jesus nOvakriste veserewondo etenga.

15. Otjikeṋa ovanane vozongamburiro tji va tjita ku Jesus novemukongorere?

¹⁵ Nandarire kutja Omuna wa Mukuru Jesus wa ri ohomonena nu wa tjita ovihimise, Satan wa ungurisa ovandu tjiva okuhandjaura ovizeze ohunga na ye. Otjotjihorera, ovanane vozongamburiro va raera ovandu kutja omasa Jesus nge na wo wokupitisa ozombepo ozohakohoke aa pewa i ‘yomuhona wozombepo ozohakohoke.’ (Mar. 3:22) Indu Jesus tja ri mombanguriro, ovanane vozongamburiro ve mu kuminina kutja omuyamburure nu va popa ovandu kutja ve mu zepe. (Mat. 27:20) Kombunda, otja ovakongorere va Kristus tjaave zuvarisa ombuze ombwa, imba mbaave ve pirukire “va handjisa omihoko vyarwe” kokutja ve tatumise Ovakriste mbo. (Oviung. 14:​2, 19) Okambo kOruhungu 1 ku Desemba 1998, ka kahurura embo rOviungura 14:2 ku tja: “Imba mbaave yandja oruvara ku Satan va nakaura ombuze Ovakriste ndjaave zuvarisa, nu owo wina va hungira oviṋa ovivi ohunga na wo kokutja ovandu ave ha yenene okupuratena ku wo nokutja ve ve tonde.”

16. Matu sokuzemburuka tjike indu tji twa zuu ozombuze zovizeze?

 ¹⁶ Satan u kayenda komurungu okukorovizeze nga kundino. Eye u “pukisa ouye auhe.” (Omavan. 12:9) Indu tji wa zuu ozombuze zoposyo ohunga notjira tja Jehova poo ohunga novarumendu ovakambure mbe hongorera po otjira tje, zemburuka omuano ovanavita na Mukuru mu va tjinda Jesus novahongewa veserewondo etenga. Jesus wa tja ovandu mave pirukire imba mbe karera Jehova nu mave korovizeze ohunga na wo, nu iho otjiṋa tji tji tjitwa ndino. (Mat. 5:​11, 12) Ozombuze zovizeze kamaaze tu pukisa indu tji twa tjiwa ingwi ngu ze handjaura natu toorere ko omukambo tjimanga. Omukambo uṋe mbu matu sokutoora?

17. Omomuano uṋe mu matu yenene okuyepa ozombuze zovizeze nḓu mape ya aze tu etere oumba? (2 Timoteus 1:13) (Wina tara kokawongo nga “ Mo sokutjita vi indu tji wa zuu ozombuze zovizeze?”)

¹⁷ Nakaura ozombuze zovizeze. Omuapostele Paulus wa hungira oukahu imbi mbi matu sokutjita indu tji twa zuu ozombuze zovizeze. Eye wa raera Timoteus kutja nga raere ovandu tjiva kutja “ngave ise ovimbaharere” “vyourunde noviporoporo.” (1 Tim. 1:​3, 4; 4:7) Ripura notjihorera hi. Okanatje mape ya ake toora otjiṋa tjondova pehi nake twa motjinyo, posi yokutja omundu omunene kamaa tjiti nao mena rokutja eye ma tjiwa kutja otjiṋa ho mape ya atji mu verisa. Eṱe tu nakaura ozombuze zovizeze mena rokutja matu tjiwa kutja ondjivisiro yovizeze i za pi. Nungwari eṱe tu puratena “komambo wouatjiri” uriri.—Lesa 2 Timoteus 1:13.

18. Eṱe matu yenene okuraisa vi kutja tu nongamburiro motjira tja Jehova?

¹⁸ Eṱe twa tara komiano vitatu uriri otjira tja Mukuru mu tji horera ku Jesus. Otja tji mo konḓonona Ombeibela, kondja okupaha omiano vyarwe omingi otjira tja Mukuru mu tji horera ku Jesus. Vatera varwe mombongo yeṋu okukurisa ongamburiro motjira tja Jehova. Nu kayende komurungu okuraisa ongamburiro yoye mokukarera Jehova nouṱakame, nokukara popezu notjira eye tje ungurisa okuyenenisa ombango ye. (Eps. 37:28) Ngatu kayende komurungu okuraisa ondangi aruhe kondjingonekero ndji tu na yo yokurira orupa rwovakarere va Jehova vorusuvero novaṱakame.