1. Ovandu mbe ri motjira tja Jehova ve ri mongaro iṋe, nu matu sokurimanena okutjita tjike?

 PE NOVANDU ndino mbe rikotamena pamwe ku Jehova nokutjita oviṋa oviwa. Owo orupa rwotjira tja Jehova, mu mu novandu omangete mbe yorokera ohange nombwaneno yatjiri. Imba mbe rikotamena ku Jehova ve rimanena okuhinokuisa okurikotamena ku ye. Owo wina ve vanga kutja ovandu ovengi ve yorokere oupanga ouwa ku na Jehova novakwao.

2. Otjikwaye tji tji ri otjihimise ohunga nomuano ovakarere va Jehova mu ve rikotamena ku ye?

² Ovakarere va Jehova ve yenena okurikotamena ku ye mohange na mombwaneno tji tji ri otjiṋa otjihimise, nandarire kutja ve hupa mouye wa Satan ourunde, ovandu ovengi mu va tondasana. (1 Joh. 5:19; Omavan. 12:12) Mukuru wetu worusuvero u muna omuano omuvi ouye mbwi mu u ṱuna kovandu, posi ya eye u tjita kutja ovakarere ve ve rimune kutja ve ri mondjeverero kokutja ve kayende komurungu okumukarera nondjoroka. Omuano ovakarere va Jehova mu ve rikotamena ku ye u ri tjimuna ‘omaundiro’ ‘notjikunino tji tji nomeva omengi.’ (Jes. 4:6; 58:11) Imba mbe rikotamena pamwe ku Jehova, ve ri mondjeverero nu ve nondjoroka momayuva omasenina nomazeu nga, mena rokutja Jehova u ve sera ondaya.—Jes. 54:14; 2 Tim. 3:1.

3. Hapo omaprofetero nga tjangwa mu Jesaja ekondwa 65 ya yenenisiwa vi moIsrael otjikuru?

³ Jehova wa ungurisa omuprofete Jesaja okuraisa kutja ehupo mari kakara vi ku imba mbe rikotamena ku Jehova pamwe. Ove mo yenene okumuna omambo ngo mu Jesaja ekondwa 65,  nga yenenisiwa otjikando otjitenga mombura ndji 537 K.O.Z. Oruveze ndwo, Ovajuda mbe ritanaura va kuturwa kouhuura wa Babilon nu ave yaruka kehi rawo. Jehova wa sera ondaya kovakarere ve nu e ve vatere kutja ve tungurure otjihuro tja Jerusalem, nokutjita kutja ondjuwo ondjapuke ya Muhona i rire oruveze aruyerike rwomerikotameneno wouatjiri moIsrael.—Jes. 51:11; Sak. 8:3.

4. Omaprofetero nga tjangwa mu Jesaja ekondwa 65 ye yenenisiwa vi ndino?

⁴ Omayenenisiro oyetjavari womaprofetero wa Jesaja ya uta mombura ndji 1919 O.Z., indu ovakarere va Jehova tji va kuturwa ku Babilon Otjinene. Ku nao, otji pa uta okukara ombwaneno mokati kovakarere va Jehova mouye auhe. Ovazuvarise vOuhona mouye auhe va zikamisa ozombongo ozengi nu va raisa ovikaṋena vyOukriste. Ovarumendu novakazendu mbaave tjiti outwe nokuritjinda momuano omuhakohoke ve ‘rihwikika omundu omupe ngwa utwa kosaneno yaNdjambi.’ (Ef. 4:24) Tjiri, otjingaperi kutja ozondaya ozengi nḓa tamunwa mu Jesaja maze yenenisiwa mouye oupe. Posi ya, nandarire nai tu muna ozondaya ozengi mokukara motjira tja Jehova. Matu katara kutja okurikotamena ku Jehova mohange ku tu ṱuna vi, nokutja omena raye tji tu ha sokuisa okutjita nao.

IMBA MBE RIKOTAMENA KU JEHOVA PAMWE VE FULA VI?

5. Otja tji pa kwizikwa mu Jesaja 65:​13, ovikwaye ovakarere va Jehova mbi ve yorokera?

⁵ Ovaveruke nu ve norusuvo. Omaprofetero wa Jesaja ye raisa ombangu ndji ri pokati kaimba mbe rikotamena ku Jehova pamwe mombwaneno na imba mbe ha tjiti nao. (Lesa Jesaja 65:13.) Jehova u yandja oviṋa avihe ovakarere ve mbi mave hepa kutja ve kare noupanga wopopezu na ye. Eṱe tu nombepo ye ondjapuke, Ombeibela, nomambo nga zikamena kOmbeibela, kokutja tu ‘rye tu nwe,’ ‘nokuyoroka.’ (Sasaneka Omavandururiro 22:17.) Posi ya, imba mbe ri pendje notjira tja Jehova mave “ṱondjara nonyota . . . , [nu mave] ṱisiwa ohoṋi,” mena rokutja owo kave tjiwa Mukuru.—Amos 8:11.

6. Omomuano uṋe etjangwa ra Joel 2:​21-24 mu ri hungirira koviyandjewa tjiva Jehova mbye tu pa, nu matu yenene vi okumuna mo ouwa moviyandjewa mbyo?

⁶ Momaprofetero we, Joel wa ungurisa oviṋa ovinahepero tjimuna ovikokotwa, omavinu, nomaze womiṋinga, okuraisa kutja Jehova u tu pa imbi mbi matu hepa okukurisa ongamburiro yetu. Imbi mavi kamburire mo omahongero okuza mOmbeibela. (Joel 2:​21-24) Otjotjihorera, eye u tjita nao okupitira mOmbeibela, nomambo wetu nga zikamena kOmbeibela, orungovi rwetu, nozombongarero zetu zombongo, omaworonganeno worukondwa nowotukondwa. Eṱe tji twa kara norupa moviṋa mbi eyuva arihe, tu rira ovaveruke nu tu muna orusuvo.

7. Ovikwaye mbi tu pa ‘ongaro ombwa yomutima’? (Jesaja 65:14)

⁷ Ve nondjoroka nu va kowa mu imbi mbi ve na vyo. Ovakarere va Mukuru “mave ravaere nenyando” mena rokutja ve nondangi ku Jehova. Jesaja 65:​14, NWT, mari tja: “Tara. Ovakarere vandje mave ravaere nenyando mena rongaro ombwa yomutima, Posi ya eṋe mamu riri mena romuhihamwatima, Nu eṋe mamu riri mena rokuwa momuinyo.” Ouatjiri nomakwizikiro omayanḓiparise okuza mEmbo ra Mukuru, nomaundjiro nga zikamena kotjisuta tjonguturiro tja Kristus ye tu pa ‘ongaro ombwa yomutima.’ Okuhungira ohunga noviṋa mbi ku novakambure ovakwetu ku tu pa ondjoroka yatjiri.—Eps. 34:8; 133:​1-3.

8. Ovakarere va Jehova ve tjiukirwa koviṋa viṋe vivari ovinanḓengu?

⁸ Ovakarere va Jehova ve tjiukirwa korusuvero nombwaneno ndji ri mokati kawo.  “Otjiwaneke tji tji [tu] kuta kumwe,” tji tu vatera okumuna kutja ehupo mari kasana pi mouye oupe, indu ovakarere va Jehova tji mave kayorokera orusuvero nombwaneno kombanda yanai. (Kol. 3:14) Omukazendu omukambure wa hungirira ku imbi mbya muna ohunga novakarere va Jehova indu tja hakaena ku na wo otjikando otjitenga. Eye wa tja: “Ami hee tjiwa kutja me sokutjita vi kutja mbi kare nondjoroka, nu nandarire meṱunḓu randje. Otjikando otjitenga tji mba muna ovandu amave raisasana orusuvero rwatjiri ya ri indu tji mba hakaena ku nOvahongonone va Jehova.” Auhe ngu ma vanga ondjoroka yatjiri nokukowa mu imbi mbye na vyo ma hepa okukara motjira tja Jehova. Kainatja kutja ouye u noumune uṋe ohunga novakarere va Jehova, owo ve nena ewa ku na Jehova novandu avehe mbe rikotamena ku ye.—Jes. 65:15.

9. Jesaja 65:​16, 17 ri kwizika tjike ohunga noviṋa mbi tu etera omihihamo nomauzeu ndino?

⁹ Va porimana. Jesaja 65:14 ri tja imba mbe toorora okuhinokurikotamena ku Jehova pamwe novakarere ve mave “riri mena romuhihamwatima [nave] riri mena rokuwa momuinyo.” Hapo tjike ohunga noviṋa avihe mbya tjita kutja ovakarere va Mukuru ve mune omihihamo nomauzeu? Korusenina “omaumba woruveze ndwa kapita maye zu po, nu maye zembwa.” (Lesa Jesaja 65:​16, 17.) Jehova ma isa po omauzeu wetu nu korusenina kamaatu zemburuka omuano omauzeu ngo mu ye tu ṱuna.

10. Ongwaye tji u muna kutja otjiṋa otjiwa okukara pu novakambure ovakweṋu? (Wina tara kotjiperendero.)

¹⁰ Nandarire nai, eṱe tu yenena okuporimana indu tji tu ri pozombongarero zombongo, mena rokutja katu ripurire koviṋa mbi tu kendisa mouye ourunde mbwi. Eṱe tu yenena okuvatera ovakambure ovakwetu okuporimana indu tji matu raisa orusuvero, enyando, ohange, omutima omuwa, nomerisusuparisiro, mbi ri ovihape vyombepo ondjapuke. (Gal. 5:​22, 23) Tjiri tu nondangi okurira orupa rwotjira tja Mukuru. Imba mbe kayenda komurungu okurikotamena ku Jehova mombwaneno mave kamuna omayenenisiro womakwizikiro wa Mukuru wokumema “eyuru epe nehi epe.”

11. Otja ku Jesaja 65:​18, 19, okurikotamena ku Jehova pu novakambure ovakwetu maku sokutuṱuna vi?

¹¹ Ve nondangi nu ve tjaterwa. Okuzambo Jesaja wa kahurura kutja omena raye ovakarere va Jehova tji mave ‘sokunyanda nokuyoroka.’ (Lesa Jesaja 65:​18, 19.) Ku nao katjikumise kutja Jehova u tu ungurisa okuvatera ovandu okuisa ovira vyouye mbi ha hongo ovandu ouatjiri ohunga na Mukuru, nokuvevatera kutja ve rikotamene ku Jehova pamwe na eṱe. Eṱe tu tjaterwa okuyorokera ozondaya nḓu tu  muna mena rokutja tu ri mouatjiri, nu iho tji tu hinga okuraera varwe ohunga nozondaya nḓo.—Jer. 31:12.

12. Ove u noumune uṋe ohunga nomakwizikiro nge ri mu Jesaja 65:​20-24, nu omena raye?

¹² Eṱe wina tu nondangi nu tu tjaterwa i yomaundjiro ngu tu na wo mena roupanga ouwa mbu tu yorokera ku na Jehova. Ripura ohunga noviṋa avihe mbi matu kamuna nokukatjita mouye oupe. Ombeibela ya kwizika kutja: “Ounatje kau tji nakukoka ngunda au ri ounyame, novandu avehe mave hupu orure tjinene otja pu mave sora.” Nu eṱe matu ‘tungu ozondjuwo natu tura mo oveni; matu kunu omivite natu ri ovihape vyavyo.’ “Oviungura, mbi [matu] ungura, mavi munu ondoṋeno” mena rokutja Jehova me tu “sere ondaya.” Eye we tu kwizikira ehupo ewa. “Nangarire ngunda ave hiya mana okukumba” eye u tjiwa oviṋa avihe omundu mbi ma hepa nu u “kutisa atjihe tji tji nomuinyo.”—Jes. 65:​20-24; Eps. 145:16.

13. Omomuano uṋe Jesaja 65:25 mu ra kahurura omarundurukiro ovandu ngu ve tjita indu tji va utu okukarera Jehova?

¹³ Ve nohange nu ve ri mondjeverero. Nombatero yombepo ya Mukuru, ovengi mbaave ritjindi noutwe, ovindandi, poo mbaave ha hungire ouatjiri, va rundurura ongaro yawo. (Lesa Jesaja 65:25.) Owo va ungura oukukutu okuisa ovikaṋena vyawo ovivi. (Rom. 12:2; Ef. 4:​22-24) Ovakarere va Mukuru ovandu mbe he ri ohomonena, ku nao matu kayenda komurungu okutjita ozondataiziro. Posi yokutja, Jehova wa wanisa ‘ovandu avehe’ mbe mu suvera na mba suverasana, nu mena ranao ve nohange nombwaneno yatjiri. (Tit. 2:11) Mukuru omunamasaayehe erike ongu ma yenene okutjita otjihimise ho.

14. Omomuano uṋe Jesaja 65:25 mu ra ṱuna komurumendu omukambure?

¹⁴ Hapo omundu tjiri ma yenene okurundurura ongaro ye youndu? Ripurira kotjihorera hi. Omurumendu omutanda ngwaa hiti nokupita monḓorongo povikando ovingi ngunda e hi ya tjita ozombura 20, aa hupu momuano omuhakohoke nu wa suverere outwe. Eye wa hita monḓorongo mena rokuvaka ozohauto, okuteya ozondjuwo, nokutjita oviṋa vyarwe ovivi. Eye aruhe aa utu ovirwa. Indu tja zuva ouatjiri wOmbeibela nokuuta okuyenda kozombongarero zOvahongonone va Jehova, eye wa ri nongamburiro kutja wa munu ondando mehupo, ndji ri okurikotamena ku Jehova pamwe novakarere ve. Tja za nokupapitisiwa, eye potuingi ee ripura nomuano Jesaja 65:25 maari ṱunu ku ye. Eye wa ri omundu otjindandi tjimuna ongeyama na runduruka okurira omundu omupore tjimuna onḓu.

15. Omena raye tji matu vanga okuṋanga varwe okurikotamena ku Jehova pamwe na eṱe, nu omomuano uṋe mu matu yenene okutjita nao?

¹⁵ Jesaja 65:13 ri uta nomambo wa Jehova nge tja: “Nambano otji me mu raere kutja.” Otjingaperi kutja, omakwizikiro we aruhe ye yenenisiwa. (Jes. 55:​10, 11) Ovakarere va Jehova ve rikotamena ku ye mombwaneno. Jehova u wanisa ovandu mbe rikotamena ku ye momuano omuhimise. Mena rokutja oweṱe orupa rweṱunḓu re, eṱe tu yenena okukara nohange nokurimuna mondjeverero mouye woutwe mbwi. (Eps. 72:7) Mena romapu nga, eṱe tu vanga okuvatera ovengi kokutja ve rikute keṱunḓu rovakambure ndi. Eṱe matu yenene okutjita nao indu tji matu yandja ombango okukaisa po ovandu ovahongewa.—Mat. 28:​19, 20.

OMUANO MU MATU YENENE OKUNANA OMBANGO YAVARWE OKURIKOTAMENA KU JEHOVA PU NA EṰE

16. Ovikwaye mbi yenena okutjita kutja ovandu ve vange okurikotamena ku Jehova pamwe novakarere ve?

¹⁶ Auhe wetu u notjiungura otjinanḓengu tjokunana ombango yavarwe okurikotamena ku Jehova pu na eṱe. Kokutja tu yenenise otjiṋa  hi, eṱe matu sokuhorera ku Jehova. Eye ka ṋiṋikiza ovandu okurira orupa rwotjira tje. Posi yokutja, eye u yenena ‘okuvenanena’ ku ye. (Joh. 6:44; Jer. 31:3) Ovandu vomitima omiwa mbe rihonga ohunga norusuvero rwa Jehova novikaṋena vye oviwa, ve yenena okutumbuka ku ye. Omomuano uṋe ovikaṋena vyetu oviwa nongaro yetu ombwa mu mavi yenene okunana ovandu kutja ve rikotamenene ku Jehova pu na eṱe?

17. Eṱe matu yenene vi okunanena varwe okurikotamena ku Jehova pu na eṱe?

¹⁷ Omuano umwe mu matu yenene okunanena varwe okurikotamena ku Jehova pu na eṱe, omokutjinda ovakambure ovakwetu momuano omuwa nokuveraisira orusuvero. Indu tji pe ya ovandu ovape kozombongarero zetu zombongo, matu vanga kutja ve kare noumune umwe tjimuna ovandu mbe ha ri Ovakriste nu mbaave ya kozombongarero zombongo moKorinte. Owo va tja: “Tjiri, Ndjambi u ri mba mokati keṋu!” (1 Kor. 14:​24, 25; Sak. 8:23) Ku nao, eṱe matu sokukayenda komurungu okukongorera eronga ndi tja: “Karasaneye nohange.”—1 Tes. 5:13.

18. Otjikwaye tji mape ya atji tjiti kutja ovandu ve nanukirwe i yotjira tja Jehova?

¹⁸ Eṱe aruhe tu sokukondja okuvara ovakambure ovakwetu otja Jehova tje ve vara. Eṱe tu yandja ombango kovikaṋena vyawo oviwa nu kavyombi ovivi, mbi hi nokukakara po rukwao moruyaveze. Eṱe matu yenene okuzengurura ozondjakaha momuano worusuvero, indu tji matu ‘karasana nouwa nomitima omitarazu, nokuisirasana.’ (Ef. 4:32) Nu ovandu mbe vanga okutjindwa momuano tjingewo mave vanga okurikotamena ku Jehova pamwe novakarere ve. a

 RIKOTAMENA KU JEHOVA PAMWE NOVAKARERE VE

19. (a) Tjiva va tja vi indu tja va uta okurikotamena ku Jehova rukwao, otja tji pa raisiwa mokawongo nga “ Owo va pita nave kotoka rukwao”? (b) Matu sokurimanena okutjita tjike? (Wina tara kotjiperendero.)

¹⁹ Eṱe tjiri tu nondangi kutja tu rikotamena ku Jehova pu novakambure ovakwetu. Nai, ovandu mbe rikotamena ku ye va ririra ko ovengi. Eṱe matu vanga okukayenda komurungu okuraisa ondangi kutja tu yenena okurikotamena ku Jehova pamwe novakambure ovakwetu. Auhe ngu ma vanga okumuna orusuvo, okukowa mu imbi mbye na vyo, okuporimana, nokurimuna mondjeverero, ma sokurikotamena ku Jehova pamwe novakarere ve nu ka sokuisa okutjita nao. Eṱe matu sokukengeza, mena rokutja Satan u kondja pu ma yenene okutjita kutja tu ise okurikotamena ku Jehova. (1 Petr. 5:8; Omavan. 12:9) Eṱe katu sokumuyandjera kutja ma kare nondoṋeno. Nu matu sokukondja okutjevera ouwa, oukohoke, nohange ndji tu muna mokurikotamena ku Jehova pamwe novakarere ve.