1. Hapo Jehova u undjira ko tjike kweṱe?

 OTJIṊA tjimwe tji tji yeta ondjoroka komurumendu nomukazendu mba kupasana, orondu tji va panduka okanatje kawo. Posi yokutja, nandarire kutja owo va suvera okanatje kawo tjinene, owo kamaave vanga kutja ke karerere okanatje. Owo tjiri mave rikende tjinene indu okanatje kawo tji ke hi nokukura. Momuano tjingewo, Jehova u kara nondjoroka indu tji twa toora omukambo omutenga wokurira ovakongorere va Jesus. Posi yokutja, eye kamaa vanga kutja tu yandere mbo. (1 Kor. 3:1) Nungwari, u tu ningira kutja tu rire Ovakriste mbe “kura.”—1 Kor. 14:20.

2. Matu kahungirira ku ye morupa ndwi?

² Omukriste ngwe kura u ripura nokuritjinda momuano uṋe? Matu hepa okutjita tjike kutja tu rire Ovakriste mbe kura? Omomuano uṋe okukonḓonona ouatjiri wOmbeibela oukoto mu mau tu vatere okukurisa oupanga wetu ku na Jehova? Nu omena raye tji tu ha sokumuna kutja oupanga wetu na Jehova we kura okuyenena nu katu nokuhepa okuungurira ko? Matu kazira omapuriro ngo morupa ndwi.

OMUKRISTE NGWE KURA U RIPURA NOKURITJINDA MOMUANO UṊE?

3. Okurira Omukriste ngwe kura maku hee tjike?

³ MOmbeibela, embo rOtjigrike nda torokwa ‘okukura’ wina ri yenena okuheya “omundu omunene.” a (1 Kor. 2:6) Tjimuna okanatje okaṱiṱi tji ke kayenda komurungu okukura nga tji ka rire omundu omunene, eṱe wina matu sokukayenda komurungu  okukurisa oupanga wetu ku na Jehova. Nu momuano mbwo, matu rire Ovakriste mbe kura. Nandarire kombunda yokukura, eṱe atu isa okukayenda komurungu okukurisa oupanga wetu ku na Jehova. (1 Tim. 4:15) Eṱe atuhe, nandarire imba omitanda, matu yenene okurira Ovakriste mbe kura. Nungwari eṱe matu tjiwa vi kutja oweṱe Ovakriste mbe kura?

4. Ovikeṋa mbi tjiukisa Omukriste ngwe kura?

⁴ Omukriste ngwe kura omundu ngu tjita oviṋa avihe Jehova mbye mu ningira okutjita, neye ka toorora okutjita imbi mbi ma vanga uriri. Otjiperi kutja eye u yenena okutataiza, tjinga e he ri ohomonena. Posi yokutja, eyuva arihe eye u kondja okuripura nokutjita imbi Jehova mbi ma vanga. Eye wa rundurura ongaro ye, nu u kondja okukayenda komurungu okuripura tjimuna Jehova. (Ef. 4:​22-24) Eye we rihonga okutoora omikambo omisemba, mokuripurira komatwako nomirari vya Jehova. Ku nao, eye ka hepa ozoveta ozengi okumuraera kutja ma sokutjita vi. Indu tja toora omukambo, eye u ungura oukukutu okuyenenisa imbi mbya tye okutjita.—1 Kor. 9:​26, 27.

5. Ouzeu uṋe mbu ya kOmukriste ngu hi ye kura? (Ovaefese 4:​14, 15)

⁵ Nungwari Omukriste ngu hi ye kura, u yenena okupukisiwa oupupu “nomapopero nomatjendje,” nu mape ya a kambura mozombuze zovizeze, poo eye mape ya a pukisiwa i yovandu mba isa okurikotamena ku Jehova nu mbe mu pirukira. b (Lesa Ovaefese 4:​14, 15.) Eye mape ya a ṱeruru na varwe, a kara mozombata pu na wo, poo a hakahana okupindika. Nu eye mape ya potuingi a tjiti oviṋa ovivi indu tja rorwa.—1 Kor. 3:3.

6. Omena raye tji matu yenene okusasaneka omuano mu tu kurisa oupanga wetu ku na Jehova ku nomuano omuatje me kura? (Wina tara kotjiperendero.)

⁶ Otja tji pa tamunwa rukuru, Omatjangwa ye sasaneka okukurisa oupanga wetu ku na Jehova ku nomuano omundu me kura okurira omunene. Pe noviṋa ovingi omuatje mbye ha tjiwa, ku nao eye u hepa omundu omunene okumutjevera nokumuhongorera. Okusasaneka, ina mape ya a ningire omuatje we omukazona okumuhanda keke indu tji mave kondo ondjira. Otja omukazona pu ma yende ame kuru, ina mape ya e mu yandjere kutja ma konde ondjira omuini, posi yokutja ina ngunda me mu zemburukisa okutara nawa ozohauto ngunda e hi ya konda. Indu omuatje tja rire omunene,  eye ma tjiwa omuano mu ma yenene okuyepa oumba otja imbwo. Tjimuna omuatje omuṱiṱi tje hepa ombatero yovanene kokutja ma yepe oumba, Omukriste ngu hi ye kura potuingi u hepa ombatero okuza kOmukriste ngwe kura okuyepa oviṋa mbi mavi zunḓa oupanga we ku na Jehova, nokutja ma toore omikambo omisemba. Posi ya, indu Ovakriste mbe kura tji mave toora omukambo, owo ve ripurira oukoto ohunga na imbi Ombeibela mbi mai hungire. Ku nao, owo ve yenena okumuna omeripura wa Jehova nu okuzambo ave tjiti imbi mbi ri ovisemba.

7. Hapo Omukriste ngwe kura u hepa ombatero yavarwe?

⁷ Hapo ihi matji hee kutja Omukriste ngwe kura ka hepa ombatero okuza ku varwe? Kako. Omukriste ngwe kura wina povikando tjiva u hepa okuningira ombatero. Posi yokutja Omukriste ngu hi ye kura, mape ya u vanga varwe okumuraera imbi mbi ma sokutjita poo omukambo eye omuini mbu ma sokutoora. Omukriste ngwe kura u ningira ombatero yavarwe mbe nounongo nondjiviro onyingi, nungwari eye u tjiwa kutja u nomerizirira wokutoora omikambo vye omuini nokutja eye ma “sokutjinda omutwaro we omuini.”—Gal. 6:5.

8. Ovakriste mbe kura va panguka momiano viṋe?

⁸ Tjimuna ovandu ovanene tji va panguka mombuniko, Ovakriste mbe kura wina ve novikaṋena mbya panguka tjimuna ounongo, ouvanḓe, ouharupu, notjari. Wina, indu Ovakriste vevari mbe kura tji ve ri mozongaro nḓa sana, owo mape ya ave toora omikambo mbya panguka, posi yokutja mbi mavi hitasana nomirari vyOmbeibela. Iho potuingi tji tjitwa indu Ovakriste tji mave sokutoora omikambo otja komeritjiviro wawo womomutima. Ku nao, owo kave pangurasana indu omikambo vyawo tji vya panguka. Posi yokutja, owo ve kayenda komurungu okukara nombwaneno.—Rom. 14:10; 1 Kor. 1:10.

MATU HEPA OKUTJITA TJIKE KUTJA TU RIRE OVAKRISTE MBE KURA?

9. Hapo matu yenene okukurisa oupanga wetu ku na Jehova nokuhinozongondjero? Kahurura.

⁹ Omuatje ma yenene okukura otja oruveze tji maru kayenda, posi yokutja kape nomundu ngu ma yenene okukurisa oupanga we ku na Jehova nokuhinongondjero. Otjotjihorera, ovakambure moKorinte va yakura ombuze ombwa, ave papitisiwa, ave pewa ombepo ondjapuke nu ave rihongo ovingi okuza ku imbi omuapostele Paulus mbye ve honga. (Oviung. 18:​8-11) Nungwari, ozombura tjiva kombunda yombapitisimo yawo, ovengi ngunda va ri Ovakriste mbe hi ye kura. (1 Kor. 3:2) Omomuano uṋe mu matu yenene okutjita kutja otjiṋa ho atji ha tjitwa kweṱe?

10. Matu sokutjita tjike okurira Ovakriste mbe kura? (Judas 20)

¹⁰ Kutja tu kure, eṱe matu sokukara nonḓero yokutjita nao. Imba mbe vanga okurira ‘ovandu vakauriri’ poo ovandu mbe hi nondjiviro, owo kamaave rire Ovakriste mbe kura. (Omiano 1:22) Eṱe katu nokuvanga okukara tjimuna ovandu ovanene mbe kura, posi yokutja mbe kayenda komurungu okuvanga kutja ovanene vawo ve ve toorere omikambo. Posi yokutja, eṱe matu vanga okutoora omerizirira wetu oveni wokukurisa oupanga wetu ku na Jehova. (Lesa Judas 20.) Indu ngamba tji u kondja okukurisa oupanga woye ku na Jehova, kumba ku ye neye me ku pe “ombango nomasorero okuyenenisa ondyero ye.”—Fil. 2:13.

11. Ombatero iṋe Jehova ndje tu pa kokutja tu rire Ovakriste mbe kura? (Ovaefese 4:​11-13)

¹¹ Jehova ka undjire ko kutja tu rire Ovakriste mbe kura nokuhinombatero. Eye we tu pa ovarise mbe tu honga mombongo okutuvatera kutja tu sane “komundu ngwe kura okuyenena nu ngu nomuseka ohamukwao na imbwi owaKristus.” (Lesa Ovaefese 4:​11-13.) Jehova wina u tu pa ombepo ye ondjapuke ndji tu vatera kutja  tu kare “nOmbepo yaKristus” poo omeripura wa Kristus. (1 Kor. 2:​14-16) Wina Mukuru wa hinga ovatjange vOmaevangeli yane okuraisa omuano Jesus mee ripura, maa hungire nomuano mee ritjindi indu tja ri kombanda yehi. Indu tji wa horere komuano Jesus mee ripura nokuritjinda, ove mo yenene okurira Omukriste ngwe kura.

OMUANO OUATJIRI OUKOTO MU MAU TU VATERE

12. “Ovirihongwa ovitenga vyokuzuvarisa Kristus” ovikeṋa?

¹² Kokutja tu rire Ovakriste mbe kura, eṱe wina matu sokuisa “ovirihongwa ovitenga vyokuzuvarisa Kristus.” Ovirihongwa ovitenga vi kamburira mo omahongero tjimuna ondanaukiro, ongamburiro, ombapitisimo, nombendukiro. (Hebr. 6:​1, 2) Omahongero nga i yemwe yomahongero Ovakriste avehe ngu ve kambura mo. Ku nao, indu Petrus tja zuvarisa kotjimbumba tjovandu meyuva ra Pentekoste, wa hungirira komahongero ngo. (Oviung. 2:​32-35, 38) Eṱe matu sokuyakura ovirihongwa ovitenga mbyo kokutja tu rire ovahongewa va Kristus. Otjotjihorera, Paulus wa raisa kutja indu tji tu hi nokukambura mombendukiro, eṱe kamaatu ritja oweṱe Ovakriste vatjiri. (1 Kor. 15:​12-14) Nungwari, kokutja tu rire Ovakriste mbe kura, eṱe katu sokuyandera povirihongwa ovitenga.

13. Otja tji pa tamunwa mOvaheberi 5:14 matu sokutjita vi kutja tu mune ouwa movirihongwa ovikoto vyOmbeibela? (Wina tara kotjiperendero.)

¹³ Ovirihongwa ovikoto vyOmbeibela kavi kamburire mo omatwako wa Jehova uriri, posi ya wina vi kamburira mo omirari vye, mbi tu vatera okuzuva nawa oumune we. Kutja tu mune ouwa movirihongwa mbyo, eṱe matu sokukonḓonona Ombeibela, nokuripurira ko oukoto ku imbi mbi twa lese, nokutjita otja pu matu yenene okuṱakamisa imbi mbi twe rihongo. Otja tji matu tjiti nao, tu rihonga okutoora omikambo mbi tjata ku Jehova. c—Lesa Ovaheberi 5:14.

14. Paulus wa vatera vi Ovakorinte okurira Ovakriste mbe kura?

¹⁴ Ovakriste mbe hi ye kura ve muna ko ouzeu okutjita ozondando ozosemba indu tji pe hi netwako kaaṋi mOmbeibela. Indu tji pe hi netwako kaaṋi mOmbeibela, tjiva mape ya ave munu kutja mave yenene okutjita oviṋa mbi mave vanga. Nu varwe mape ya ave ningire  kutja pe kare oveta ngunda ape hi noveta. Otjotjihorera, Ovakriste moKorinte va ningira omuapostele Paulus okutwa po oveta ohunga nokutja ve sokurya ovikurya mbya punguhirwa omukuru wovisenginina poo indee. Pendje nokuveraera kutja ngave tjite vi, Paulus wa raisa kutja omundu auhe u “nousemba wokutoorora” kutja ma tjiti vi ndoovazu omeritjiviro we womomutima maye mu yandjere. Eye wa tamuna omirari tjiva vyOmbeibela mbi mavi yenene okuvevatera okutoora omukambo mbu hi nokutjita kutja omeritjiviro wawo womomutima aye he ve vere nokutja ave ha putarisa varwe. (1 Kor. 8:​4, 7-9, NWT) Paulus aa hongo Ovakorinte okuungurisa Omatjangwa okutjita ozondando zawo oveni, pendje nokuṱaṱera kovandu varwe poo okupaha oveta. Momuano mbwi, aa kondjo okuvevatera kutja ve rire Ovakriste mbe kura.

15. Paulus wa vatera vi Ovakriste Ovaheberi okurira Ovakriste mbe kura?

¹⁵ Eṱe matu rihongo otjiṋa tjarwe otjinanḓengu okuza ku imbi Paulus mbya tjanga kOvakriste Ovaheberi. Tjiva va yandjera oupanga wawo ku na Jehova okuyaruka ombunda, ku nao owo va yaruka ‘okuhepa omaihi, nu kavikurya oviṱaṱunwa.’ (Hebr. 5:12) Owo kave na pu ve rihonga nokuyakura oviṋa ovipe Jehova mbyee ve hongo okupitira mombongo. (Omiano 4:18) Otjotjihorera, ovakambure ovengi Ovajuda aave kongorere Omatwako wa Moses, nandarire kutja ombunguhiro ya Jesus ya yandisa Omatwako ngo ozombura 30 komurungu wanao. (Rom. 10:4; Tit. 1:10) Ozombura 30 za ri oruveze ndwa yenene kOvakriste Ovajuda okurundurura omeripura wawo ngo. Ku nao, Paulus aa kondjo okuvevatera kutja ve yakure ouatjiri oukoto eye mbwee ve hongo. Orutuu rwe rwe ve vatera okumuna kutja omuano omupe womerikotameneno, Jehova mbwa twa po okupitira mu Jesus wa ri omusemba. Nu wina rwe ve pa ouvanḓe okukayenda komurungu okuzuvarisa nandarire kehi yomapirukiro wOvajuda.—Hebr. 10:​19-23.

ONGWAYE TJI MATU SOKUKAYENDA KOMURUNGU OKUKURA?

16. Matu sokutjita vi kutja tu kayende komurungu okukura?

¹⁶ Eṱe matu sokuungura oukukutu okurira ovandu mbe kura nu wina matu sokuungura oukukutu okukara omuano mbwo. Eṱe matu sokukengeza kutja atu ha munu kutja twa zikama nokutja katu nokuhepa okukayenda komurungu okukurisa oupanga wetu ku na Jehova.  (1 Kor. 10:12) Eṱe matu ‘sokurirora oveni’ okutara kutja tu kayenda komurungu okukura otjOvakriste.—2 Kor. 13:5.

17. Orutuu rwa Paulus kOvakolose ru raisa ounahepero waye wokukayenda komurungu okukura?

¹⁷ Morutuu rwe kOvakolose, Paulus wa raisa kutja eṱe matu hepa okukayenda komurungu okukura. Nandarire kutja Ovakolose va ri Ovakriste mbe kura, Paulus we ve raera kutja ve kengeze nu ave ha popwa i yomeripura wovandu mouye. (Kol. 2:​6-10) Nu Epafras ngwaa tjiwa nawa ouṋepo wombongo, eye aruhe ee ve kumbire kutje ve “zikame” poo ve kure otjOvakriste. (Kol. 4:12) Ovikwaye mbi matu rihongo okuza kotjiṋa ho? Paulus na Epafras aave tjiwa nawa kutja okukayenda komurugu okurira ovandu mbe kura ku hepa ozongondjero nombatero ya Mukuru. Owo aave vanga Ovakolose okukayenda komurungu okurira Ovakriste mbe kura, nandarire kehi yomauzeu ngaave munu.

18. Ovikwaye mbi mape ya avi tjitwa kOmukriste ngwe kura? (Wina tara kotjiperendero.)

¹⁸ Paulus wa rakiza Ovakriste Ovaheberi kutja tji ve hi nokukengeza, mape ya ave pandjara oupanga wawo ku na Jehova nga aruhe. Omukriste tje hi nokuraisa onḓuviro ku Jehova, mape ya a humburuka kokure na ye nu e he ritanaura kutja ma mune ondjesiro okuza ku Mukuru. Ovaheberi kave karere mongaro otja indjo, tji tji ri otjiṋa otjiwa. (Hebr. 6:​4-9) Hapo tjike ohunga na imba mba yaruka ombunda mongamburiro? Poo mba kondwa kombongo posi ya kombunda ave ritanaura? Indu owo tji ve risusuparisa nave ritanaura, mave raisa kutja owo kave ri tjimuna imba Paulus mba tjanga morutuu rwe, mbu mape ya ave pandjara oupanga wawo ku na Jehova nga aruhe. Posi yokutja, indu owo tji va kotoka ku Jehova, owo mave hepa ombatero eye ndje yandja. (Esek. 34:​15, 16) Ovanene vombongo mape ya ave ningire omurumendu omukambure poo omukazendu omukambure ngwe kura mongamburiro okuvevatera kutja ve kurise oupanga wawo ku na Jehova rukwao.

19. Matu sokukara nondando yaye?

¹⁹ Indu tji mo ryama komurungu okurira Omukriste ngwe kura, ove mo yenene okuyenenisa ondando yoye. Kayende komurungu okurihonga ouatjiri oukoto okuza mOmbeibela nokuripura tjimuna Jehova. Indu tji u ri Omukriste ngwe kura, kayende komurungu okukara nao.