1. Ovikwaye omundu ngwe ritanaura mbye tjita?

 INDU tji twa tjiti otjiṋa otjivi, ounanḓengu tjinene kweṱe okuritanaura. Otja kOmbeibela, omundu ngwe ritanaura u kara nomuhihamwatima noviṋa ovivi mbya tjiti, u isa okutjita oviṋa mbyo, nu u rimanena okuhinokutjita ouvi mbwo rukwao.—Mat. 3:8; Oviung. 3:19; 2 Petr. 3:9.

2. Omena raye atuhe tji matu hepa okurihonga ohunga nokuritanaura? (Nehemia 8:​9-11)

² Ovandu avehe ve hepa okurihonga ohunga nokuritanaura. Omena raye? Mena rokutja atuhe tu tjita ouvi eyuva arihe. Otjozondekurona za Adam na Eva, auhe wetu twa rumata ouvi nonḓiro. (Rom. 3:23; 5:12) Eṱe atuhe oweṱe ovanauvi nu tu hepa okuritanaura. Nandarire ovandu mbaari nongamburiro yomasa tjimuna omuapostele Paulus, ya ri ouzeu ku wo okutjita imbi mbi ri ovisemba. (Rom. 7:​21-24) Hapo ihi matji hee kutja eṱe aruhe matu sokuwa momuinyo mena romauvi wetu? Kako. Jehova u notjari, nu u vanga kutja tu kare nondjoroka. Tara kotjihorera tjOvajuda mba hupire moruveze rwa Nehemia. (Lesa Nehemia 8:​9-11.) Jehova kaa vanga kutja ve we momuinyo tjinene, mena romauvi ngu va tjita morukapitaveze. Eye aa vanga kutja ve rikotamene ku ye nondjoroka. Jehova u tjiwa kutja indu tji twe ritanaura, tji tjita kutja tu kare nondjoroka. Ku nao, eye u tu honga ohunga nokuritanaura. Indu tji twe ritanaura komauvi wetu, eṱe matu yenene okukara nongamburiro kutja Tate wetu ngu notjari me tu isire.

3. Ovikwaye mbi matu kahungirira ko morupa ndwi?

³ Morupa ndwi, matu kerihonga ohunga nokuritanaura. Matu katara koviṋa vitatu. Rutenga, matu kerihonga oviṋa Jehova mbya honga Ovaisrael ohunga nokuritanaura. Okuzambo, matu kerihonga omuano Jehova me vatera ovandu okuritanaura. Korusenina,  matu katara koviṋa Jesus Kristus mbya honga ovahongewa ve ohunga nokuritanaura.

OVIṊA JEHOVA MBYA HONGA OVAISRAEL OHUNGA NOKURITANAURA

4. Ovikwaye Jehova mbya honga otjiwaṋa tjOvaisrael ohunga nokuritanaura?

⁴ Indu Jehova tja yandja omatwako we kOvaisrael, owo va kwizika okukara nonḓuviro komatwako ngo. Nu Jehova wa kwizika kutja indu tji va kara nonḓuviro komatwako ngo, eye me ve tjevere nu me ve sere ondaya. Eye wa tja nai ohunga nomatwako we: “Etwako, ndi me ku rakiza ndinondi, kazeu kove nu kari ri kokure.” (Deut. 30:​11, 16) Posi ya indu tji ve ha karere nonḓuviro komatwako we, poo tji va toorora okurikotamena koomukuru varwe, eye ke nokuvetjevera nu mave munu omauzeu. Iho kaatji hee kutja Jehova me ve nakaura oparukaze. Owo aave yenene ‘okuritanaura ku Muhona, Ndjambi wawo, nokupuratena keraka re.’ (Deut. 30:​1-3, 17-20) Indu tji va tjiti nao, Jehova aa tumbuka popezu na wo, nokuvesera ondaya rukwao.

5. Omomuano uṋe Jehova ma raisa kutja kena pa yumba ohama kovakarere ve? (2 Ozombara 17:​13, 14)

⁵ Otjiwaṋa Jehova tja toorora, tje mu pirukira povikando ovingi. Owo aave rikotamene koomukuru vovisenginina, nu aave tjiti oviṋa vyarwe ovivi tjinene. Mena ranao, owo aave munu omauzeu. Posi ya Jehova wa kayenda komurungu okukondja okuvatera ovakarere ve okurikotamena ku ye rukwao. Eye wa hinda ovaprofete povikando ovingi okutunduuza ovakarere ve kutja ve ritanaure nokurikotamena ku ye nomitima vyawo avihe.—Lesa 2 Ozombara 17:​13, 14.

6. Omomuano uṋe Jehova ma ungurisa ovaprofete okuhonga ovakarere ve ounanḓengu wokuritanaura? (Wina tara kotjiperendero.)

⁶ Indu ovakarere va Jehova tji ve ha karere nonḓuviro ku ye, eye potuingi aa hindi ovaprofete ve okuverakiza kutja mape tjitwa tjike indu tji ve hi nokutjita omarundurukiro. Otjotjihorera, Mukuru wa raera Jeremia okuraera Ovaisrael kutja: “Muhinouṱakame Israel, kotoka ku Ami. Ami mbi notjari, nu hi nokuṱomazenge na ove nga aruhe. Rihepura uriri kutja u nondjo, nokutja wa pirukira Muhona Ndjambi  woye.” (Jer. 3:​12, 13) Okupitira mu Joel, Jehova wa tja: “Ritanaureye ku Ami nomitima vyeṋu avihe.” (Joel 2:​12, 13) Eye wa ungurisa Jesaja okuveraera kutja: “Rikohororeye nawa! Iseye ko ozondjito zouvi weṋu komurungu wandje; amu tjiti ourunde rukwao.” (Jes. 1:​16-19) Okupitira mu Esekiel Jehova wa pura kutja: “Mamu tjangovasi Ami mbi nonyuṋe monḓiro yomurunde are? Indee uri, Ami tjinene mbi vanga okumumuna kutja a kare nomuinyo. Ami hi nonyuṋe monḓiro yomundu. Ritanaureye komauvi weṋu, nu mamu kara nomuinyo!” (Esek. 18:​23, 32) Jehova u kara nondjoroka tjinene indu ovandu tji ve ritanaura komauvi wawo, mena rokutja u vanga kutja ve hupe nga aruhe. Ku nao, Jehova ka undju kutja omundu me ritanaure kutja me mu vatere. Ngatu katare kovihorera varwe.

7. Ovikwaye Jehova mbya honga ovakarere ve, indu tja ungurisa otjihorera tjomuprofete Hosea nomukazendu we?

⁷ Tara koviṋa Jehova mbya honga ovakarere ve okupitira motjihorera tjomuprofete Hosea nomukazendu we Gomer. Gomer wa katuka orukupo nu a isa Hosea. Jehova wa tjita vi? Jehova, ngu tjiwa oviṋa avihe mbi ri mourekoto womundu, wa raera Hosea kutja: “Twende rukwao u kasuvere omukazendu ngu katuka orukupo puna ombarise. Mu suvera tjimuna Ami nga mba tji mba suvera Ovaisrael, nangarire kutja owo ve tanaukira koomukuru varwe.” (Hos. 3:1; Omiano 16:2) Hosea tja raerwa omambo ngo, omukazendu we tjandje u kayenda komurungu okutjita ouvi ounene. Posi ya, Jehova wa raera Hosea okumuisira, nokutja nga kotore omukazendu we. a Momuano tjingewo, Jehova wa ungurisa otjihorera ho okuhonga ovakarere ve omuano mbwaa fula. Nandarire kutja owo aave kayenda komurungu okutjita oviṋa ovivi tjinene, eye we ve suverere. Eye wa kayenda komurungu okuhinda ovaprofete kutja ve ve vatere okuritanaura, nokutjita omarundurukiro mehupo rawo. Otjihorera ho tji tu honga kutja Jehova u tjiwa oviṋa avihe ohunga nomundu, nu u kondja okuvatera omundu ngo okuritanaura komauvi we, nandarire kutja u kayenda komurungu okutjita omauvi omanene. (Omiano 17:3) Ngatu katare kutja omomuano uṋe Jehova me tjita nao.

OMOMUANO UṊE JEHOVA ME KONDJA OKUVATERA OVANDU OKURITANAURA?

8. Ovikwaye Jehova mbya tjita okuvatera Kain okuritanaura? (Genesis 4:​3-7) (Wina tara kotjiperendero.)

⁸ Kain wa ri omuatje omuzandu omutenga wa Adam na Eva. Tjimuna ovanatje avehe va Adam na Eva, Kain wa rumata onḓero yokutjita imbi mbi ri ovivi. Posi ya Kain kee ritjaere. Ombeibela i tja: “Ozondjito ze za ri ozombi.” (1 Joh. 3:12) Nu mape ya mena repu ndo “Kain ka tjatere ku Muhona pamwe nombunguhiro ye.” Pendje nokurundurura ongaro ye, Kain wa ‘pindikire tjinene, na tivarisa omurungu we.’ Jehova wa tjita vi okuzambo? Eye wa hungira ku na Kain. (Lesa Genesis 4:​3-7.) Jehova wa hungira momuano omuwa ku Kain, ne mu raere kutja eye me mu sere ondaya indu tja tjiti imbi mbi ri ovisemba. Jehova wina wa rakiza Kain kutja omazenge we mape ya aye tjiti kutja ma tjite otjiṋa otjivi. Ouhumandu, Kain ka puratenene. Eye ke na pa yandjera Jehova okumuvatera okurundurura ongaro ye. Nandarire kutja Kain ke na pa puratena, Jehova ka yandjerere otjiṋa ho okutjita kutja ma ise okuvatera varwe okuritanaura.

9. Jehova wa vatera vi David okuritanaura?

⁹ Jehova wa suverere Ombara David tjinene. Eye nandarire wa tja David ‘omurumendu ngu tjata’ ku ye. (Oviung. 13:22) Posi ya David wa tjita oviṋa tjiva ovivi tjinene, tjimuna okukatuka  orukupo nokuzepa. Otja kOmatwako wa Moses, David aa sokuṱa. (Lev. 20:10; Num. 35:31) Posi ya, Jehova aa vanga okuvatera David okuritanaura. b Eye wa hinda omuprofete we Natan okukaryangera ombara, nandarire kutja David kaa raisa kutja we ritanaura. Natan wa ungurisa otjisasanekero okuvatera David okuzuva nawa oviṋa ovivi mbya tjita. David wa muna kutja wa hihamisa Jehova tjinene, nu eye we ritanaura. (2 Sam. 12:​1-14) Eye wa tjanga Epsalme ndi raisa omuhihamwatima mbwa ri na wo ohunga noviṋa mbya tjita. (Eps. 51, omambo wokombanda) Epsalme ndo ra huhumiṋa ovandu ovengi mba tjita ouvi nu re ve hinga okuritanaura. Eṱe tjiri tu nondangi kutja Jehova wa vatera David.

10. Hapo ove u fula vi okutjiwa kutja Jehova u nomuretima, nu u tu isira?

¹⁰ Jehova wa tonda ouvi ngamwa auhe. (Eps. 5:​4, 5) Posi ya, Jehova we tu suvera, nu indu tji twa tjiti ouvi, eye u vanga okutuvatera. Eye aruhe u kondja okuvatera ovandu okuritanaura nokutumbuka popezu na ye, nandarire imba mbe tjita ouvi ounene tjinene. Tjiri otjiṋa otjihuhumiṋe okutjiwa kutja Jehova u vanga okutuisira. Indu tji twe ripura ohunga nomuano Jehova me tu isira, nomuretima mbwe tu raisira, ku tu hinga okurira ovaṱakame ku ye nokuhakahana okuritanaura indu tji twa tjiti ouvi. Nai matu katara koviṋa Jesus mbya honga ovahongewa ve ohunga nokuritanaura.

OVIṊA OVAKONGORERE VA JESUS MBI VE RIHONGA OHUNGA NOKURITANAURA

11-12. Jesus wa ungurisa otjisasanekero tjiṋe okutuhonga kutja Jehova u nonḓero okutuisira? (Tara kotjiperendero.)

¹¹ Meserewondo etenga O.Z., Jehova wa ungurisa Johanes Omupapitise okuhonga ovandu ounanḓengu wokuritanaura. Nu indu Jesus tja uta otjiungura tje tjokuzuvarisa, eye wina wa tjita nao.—Mat. 3:​1, 2; 4:17.

¹² Indu Jesus tja ri kombanda yehi, eye wa honga ovandu kutja Ihe u nonḓero okutuisira indu tji twa tjiti ouvi. Eye wa honga epu enanḓengu ndi, indu tja serekarera ehungi ohunga nomuatje omuzandu ngwa pandjarere. Omuatje omuzandu ngo wa tya okuza po  ponganda nu wa katjita oviṋa ovivi tjinene. Posi ya, “korusenina eye we rizemburuka” na yaruka konganda. Hapo Ihe wa tjita vi? Jesus wa tja: “Ngunda e ri kokure, ihe arire tje mu munu, nu a ṱondjenda na ye, a utuka, e rimanga mosengo ye ne mu hupite.” Omuatje omuzandu kaa undjire ko kutja ihe me mu isire. Ku nao, eye we mu ningira kutja ma ungure otjomukarere ponganda. Posi ya ihe aa vanga okumuisira. Eye wa tja ingwi “omuatje wandje,” nu we mu yakura. Ihe wina wa tja: “Eye . . . wa pandjarere, nambano eye ngwi wa munika rukwao.” (Luk. 15:​11-32) Indu Jesus tja ri meyuru, eye povikando ovingi wa muna omuano Ihe ma raisa otjari, nomuano ma hakahana okuisira imba mbe ritanaura. Ehungi Jesus nde tu serekarera, tjiri ri tu huhumiṋa, nu ri raisa omuano Tate wetu Jehova me notjari.

13-14. Ovikwaye omuapostele Petrus mbye rihonga ohunga nokuritanaura, nu ovikwaye mbya honga varwe ohunga notjiṋa ho? (Wina tara kotjiperendero.)

¹³ Omuapostele Petrus we rihonga oviṋa ovinanḓengu okuza ku Jesus ohunga nokuritanaura nokuisira. Petrus wa tjita ozondataiziro ozengi, nu Jesus we mu isira. Otjotjihorera, kombunda yaindu Petrus tja paṱana Omuhona we povikando vitatu, eye aa fula navi tjinene ohunga noviṋa mbya tjita. (Mat. 26:​34, 35, 69-75) Posi ya, kombunda indu Jesus tja pendurwa, eye we rimunikisa ku Petrus ngunda e ri erike, kutja ma hungire ku na ye. (Luk. 24:​33, 34; 1 Kor. 15:​3-5) Oruveze ndwo, Jesus aa tjiwa kutja Petrus we ritanaura nu aa vanga okumuraera kutja we mu isira.

¹⁴ Mena rokutja Petrus wa ri mongaro otja indjo, eye aa yenene okuhonga varwe ohunga nokuritanaura nondjesiro. Kombunda eyuva enene roPentekoste, Petrus wa yandja ehungi kotjimbumba tjOvajuda mbe ha ri ovakambure, okukahurura kutja owo va zepa Messias. Posi ya eye we ve tunduuza kutja: “Ngamu tji ritanaura omitima, nu mu vingurukire ku Ndjambi, kokutja Eye e mu isire omauvi weṋu.” (Oviung. 3:​14, 15, 17, 19) Petrus wa honga kutja  omundu omunauvi u ritanaura indu tja rundurura omeripura we omavi, tja isa okutjita oviṋa ovivi, nokuuta okutjita oviṋa mbi yorokisa omutima wa Mukuru. Petrus wina wa raisa kutja Jehova me ve isire. I ri tjimuna u zemisa omauvi wawo, nu omauvi wawo ye zenga oparukaze. Nu ozombura ozengi kombunda yanao, Petrus wa tunduuza Ovakriste kutja: “Muhona . . . u nomuretima na eṋe, tjinga e ha vanga kutja omundu nangarire umwe a yandekwe, nungwari tjinga e vanga kutja avehe ve ritanaure komauvi wawo.” (2 Petr. 3:9) Tjiri otjihuhumiṋe okutjiwa kutja Jehova u tu isira oparukaze indu tji twe ritanaura komauvi wetu, nandarire kutja omanene tjinene.

15-16. (a) Omomuano uṋe omuapostele Paulus me rihonga ohunga nondjesiro? (1 Timoteus 1:​12-15) (b) Matu katara ku ye morupa ndu maru kongorere ko?

¹⁵ Saulus ngwa zire koTarsus wa tjita oviṋa ovingi ovivi. Eye aa tatumisa ovakongorere va Kristus. (Oviung. 7:58–8:3) Ovakriste ovengi mape ya aave munu kutja eye kamaa karunduruka. Posi ya, Jesus aa tjiwa kutja Saulus ma yenene okutjita omarundurukiro nokuritanaura. Eye na Ihe va muna ovikaṋena oviwa mu Saulus. Jesus wa tja: ‘Ami mbe mu toorora okundjikarera nokutjivisa ena randje kovanavisenginina.’ (Oviung. 9:15) Jesus nandarire wa ungurisa otjihimise okutjita kutja Saulus me ritanaure. (Oviung. 9:​1-9, 17-20) Saulus, poo Paulus, we ritanaura na rire Omukriste. Jesus we mu pa otjiungura tjokurira omuapostele. Paulus potuingi aa hungire omuano maa ri nondangi kutja Jehova na Jesus ve mu raisira ouwa notjari. (Lesa 1 Timoteus 1:​12-15.) Paulus wa tja: “Ndjambi mouwatima we ma vanga okukueta kondanaukiro yomutima are?”—Rom. 2:4.

¹⁶ Eyuva rimwe, Paulus wa zuva kutja ombongo ya Korinte aai yandjere omurumendu omukambure ngwaa tjiti oruvakiro okukara mombongo. Ovikwaye Paulus mbye ve raera okutjita? Okuza koviṋa mbya hungira, eṱe matu yenene okurihonga omuano Jehova me raisa orusuvero indu tji ma vyura ovakarere ve, nokuraisa otjari indu tji ve ritanaura. Nu matu rihongo omuano mu matu yenene okuhorera ku ye. Morupa ndu maru kongorere ko, matu kahungirira koviṋa mbya tjitwa mombongo ya Korinte.