1-2. (a) Jehova u noumune uṋe ohunga na imba mbe tjita ouvi ounene nu mbe he ritanaura? (b) Jehova u vanga kutja ovandu mbe tjita ouvi ve tjite vi?

 JEHOVA ka yakura omeritjindiro ayehe. Eye wa tonda ouvi. (Eps. 5:​4-6) Jehova u vanga kutja tu kare nonḓuviro komatwako we nge ri mOmbeibela. Otjingaperi kutja, Jehova u tjiwa kutja eṱe tu nouvi, nu kamaatu yenene okukara nonḓuviro ku ye okuura. (Eps. 130:​3, 4) Posi ya, Jehova ka yakura ovandu mbe ‘zunḓa otjari tje kokutja ve riise mo mongarero yawo ombi.’ (Judas 4) Nu Ombeibela i hungira ohunga noruveze indu “ovarunde” tji mave ‘kanyonwa’ movita vya Mukuru vya Armagedon.—2 Petr. 3:7; Omavan. 16:16.

² Posi ya, Jehova ka vanga omundu nandarire umwe ma kanyonwe. Motupa tu twa zu po, twe rihongo kutja eye u “vanga kutja avehe ve ritanaure komauvi wawo.” (2 Petr. 3:9) Tjimuna Jehova, ovanene vombongo ve raisa omuretima indu tji mave kondjo okuvatera omundu ngwa tjiti ouvi okuritanaura, nokumuvatera okutumbuka popezu na Jehova rukwao. Posi ya, povikando tjiva omundu ngwa tjiti ouvi ke ritanaura. (Jes. 6:9) Nandarire kutja ovanene vombongo ve kondja okuvatera povikando ovingi ovandu mba tjiti ouvi, tjiva vawo ve kayenda komurungu okutjita imbi mbi ri ovivi. Ovanene vombongo mave sokutjita vi mongaro otja indjo?

 “OMURUNDE NGA ISIWE MO MOKATI KEṊU”

3. (a) Ombeibela i tja otjikwaye tji matji sokutjitwa kovandu mbe hi nokuritanaura? (b) Ongwaye tji matu yenene okutja omundu ngwa panḓa okuritanaura wa toorora okuisamewa mombongo?

³ Indu omundu ngwa tjiti ouvi tje hi nokuritanaura, ovanene vombongo mave sokukongorera omuhunga mbu ri mOvakorinte ovatenga 5:​12, 13, mbu mau tja: “Omurunde nga isiwe mo mokati keṋu!” Omundu ngwa tjiti ouvi u tjiwa kutja ma isamewa mombongo indu tje he ritanaurire. Ku nao, i ri tjimuna eye wa tye rukuru okuisamewa mombongo. Eye ma kondo imbi mbya kunu. (Gal. 6:7) Ongwaye tji matu yenene okutja nao? Mena rokutja omutjite wouvi wa panḓa okutjita omarundurukiro, nandarire kombunda yaindu ovanene vombongo tji va kondja okumuvatera povikando ovingi. (2 Ozomb. 17:​12-15) Ovitjitwa vye vi raisa kutja eye ka vanga okukara nonḓuviro komatwako wa Jehova.—Deut. 30:​19, 20.

4. Omena raye tji pe tjitwa omatjivisiro indu omundu ngu he ritanaurire tja isamewa mombongo?

⁴ Indu omundu tje he ritanaurire nu a isamewa mombongo, pe tjitwa omatjivisiro mombongo kutja eye kaumwe wOvahongonone va Jehova rukwao. a Ondando yomatjivisiro ngo kayokutjita kutja omundu ngwa tjiti ouvi ma ṱohoṋi. Nungwari, oyokutjita kutja ovakambure ve kare nonḓuviro keronga rOmbeibela ndi tja “amu ha wana” ku nomundu ngo, nandarire “okurya ovikurya puna” ye. (1 Kor. 5:​9-11) Pe nomapu omawa wokutja ongwaye Jehova tja yandja erakiza ndo. Omuapostele Paulus wa tjanga kutja: “Osurise onḓiṱi i surisa otjisema atjihe.” (1 Kor. 5:6) Indu omundu ngu he ritanaurire komauvi we tje ha isamenwe mombongo, varwe mape ya ave utu okumuna kutja owo kave nokuhepa okukara nonḓuviro komatwako wa Jehova.—Omiano 13:20; 1 Kor. 15:33.

5. Indu omukambure omukwetu tja isamewa mombongo, eṱe matu sokukara noumune uṋe ohunga ye, nu omena raye?

⁵ Indu omukambure omukwetu tja isamewa mombongo, eṱe matu sokukara noumune uṋe ohunga nomundu ngo? Nandarire kutja katu kara pu na ye, eṱe tu sokumuvara otjonḓu ndja pandjara, posi ya ndji nomaundjiro. Orondu onḓu ndja pandjara mai yenene okukotoka korupanda. Zemburuka kutja omundu ngo we riyandja omuini ku Jehova. Ouhumandu, eye ka hupu otja komakwizikiro we, nu mena ranao mape ya a pandjara ondjingonekero yokukahupa nga aruhe. (Esek. 18:31) Posi ya, ngunda pe noruveze kotjari tja Jehova, eṱe tu nomaundjiro kutja omundu ngo ma tjiti omarundurukiro. Ku nao, ovanene vombongo mave yenene vi okuvatera omutjite wouvi ngwa isamewa mombongo?

OVANENE VOMBONGO VE VATERA VI IMBA MBA ISAMEWA MOMBONGO?

6. Ovikwaye ovanene vombongo mbi mave tjiti okuvatera omundu ngwa isamewa mombongo?

⁶ Hapo ovanene vombongo ve isa okukondja okuvatera omundu ngwa isamewa mombongo okukotoka ku Jehova? Kako, katjiperi. Indu ovanene vombongo tji mave raere omundu kutja eye ma isamewa mombongo, owo wina ve mu raera kutja ma sokutjita vi kutja ma kotoke. Posi ya, ovanene vombongo ve tjita ovingi kombanda yanao. Mozongaro ozengi, kombunda yomieze omiṱiṱi owo ve raera omundu ngwa tjiti ouvi kutja mave vanga okuhungira ku na ye, okutara kutja wa rundurura ongaro ye. Indu omundu ngo tje riyandjere okuhakaena ku novanene vombongo rukwao, owo mave mu tunduuza okuritanaura. Nandarire kutja omundu ngo kee ritanaura moruveze ndwo,  ovanene vombongo mave kondjo okuhakaena ku na ye rukwao moruyaveze, nokumutunduuza kutja me ritanaure.

7. Omomuano uṋe ovanene vombongo mu mave yenene okuhorera kotjari tja Jehova indu omundu tja isamewa mombongo? (Jeremia 3:12)

⁷ Ovanene vombongo ve horera ku Jehova ngu raisa otjari ku imba mba isamewa mombongo. Otjotjihorera, morukapitaveze Jehova kaa undju kutja Ovaisrael rutenga ve ritanaure kutja eye me ve vatere. Nungwari, eye aa hindi ovaprofete ve ku wo nandarire ngunda ave hi ye ritanaura. Orupa orutjavari mokambo nga, rwa kahurura omuano Jehova ma raera Hosea okuisira omukazendu we, nandarire kutja aa kayenda komurungu okutjita ouvi ounene. Momuano mbwi, Jehova aa hongo ovakarere ve kutja eye wa tumba otjari. (Hos. 3:1; Mal. 3:7) Tjimuna Jehova, ovanene vombongo tjiri ve vanga kutja omundu ngwa tjiti ouvi me ritanaure nokukotoka kombongo. Nu owo ve tjita kutja i rire oupupu ku ye okutjita nao.—Lesa Jeremia 3:12.

8. Otjisasanekero tja Jesus ohunga nomuatje omuzandu ngwa pandjarere matji tu vatere vi okuzuva nawa oumune wa Jehova ohunga na imba mba isa okumukarera? (Lukas 15:7)

⁸ Zemburuka otjisasanekero tja Jesus tjomuatje omuzandu ngwa pandjarere, otja tji twa hungirire ko morupa orutjavari mokambo nga. Indu ihe tja muna omuatje we omuzandu, eye wa tupuka “e rimanga mosengo ye ne mu hupite.” (Luk. 15:20) Eye ke na pa undja omuatje we okuningira ondjesiro. Nungwari, eye wa tupuka komuatje we mena rokutja we mu suverere. Jehova u kara noumune otja imbwo ohunga na imba mba isa okumukarera, nu ovanene vombongo ve tjita otja pu mave yenene okuhorera ku Jehova. Owo ve vanga kutja imba mba isa Jehova ve kotoke ku ye. (Luk. 15:​22-24, 32) Omundu ngwa tjita ouvi tja kotoka, Jehova, Jesus, ovaengeli, nombongo aihe ve kara nondjoroka tjinene.—Lesa Lukas 15:7.

9. Jehova u vanga kutja imba mbe tjita ouvi ve tjite vi?

⁹ Eṱe twe rihongo kutja Jehova ka yandjere imba mbe hi nokuvanga okuritanaura komauvi wawo okukayenda komurungu okurira orupa rwombongo. Posi ya, eye ngamba u kondja okuvevatera. Eye u vanga kutja ve kotoke. Oumune wa Jehova ohunga na imba mbe ritanaura u ri mu Hosea 14:​4, ndi ma ri tja: “Ami me kotora otjiwaṋa tjandje ku Ami omuini. Me tji suvere nomutima wandje auhe, orondu hi tji nomazenge na tjo rukwao.” Mena rokutja ovanene vombongo ve tjiwa oumune wa Jehova, owo ve paha otjiraisiro ngamwa atjihe tji matji raisa kutja omundu ngo wa utu okuritanaura. Nu omambo ngo ye yandja ongamburiro ku imba mba isa Jehova kutja eye we ve suvera nu u vanga kutja ve kotoke.

10-11. Ovanene vombongo mave vatere vi imba mba isamewa mombongo morukapitaveze?

¹⁰ Ovanene vombongo mave kondjo vi okuvatera imba mba isamewa mombongo morukapitaveze, ngahino ozombura ozengi nḓa kapita? Owo mape ya va isa okutjita otjiṋa tji tja tjita kutja ve isamewe mombongo. Owo nandarire mape ya ave ha zemburuka kutja omena raye tji va isamewa mombongo. Kainatja kutja owo va kakara orure ndu ṱeki pi, ovanene vombongo mave kondjo okuvepaha nokuveryangera. Indu tji ve keveryangera, ovanene vombongo mave kumbu pu na wo, nokuvetunduuza kutja ve kotoke kombongo. Otjingaperi kutja, indu omundu tja kara kokure nombongo oure wozombura ozengi, eye ma hepa okutjiwa Jehova rukwao, nokurihonga ouatjiri wOmbeibela rukwao. Ku nao, indu eye tja tja ma vanga okukotoka kombongo, ovanene vombongo mape ya ave ningire omundu okurihonga Ombeibela ku na ye, nandarire kutja ngunda ka kotorwa kombongo. Mozongaro azehe nḓa, ovanene vombongo  ombu mave twa po kutja omundu ngo me rihongo ku na uṋe Ombeibela.

¹¹ Ovanene vombongo ve kondja okuhorera otjari Jehova tje na tjo kovandu. Ku nao, owo ve paha avehe mba isa Jehova, nokuvetunduuza kutja ve kotoke ku ye. Indu omundu tje ritanaura na rundurura omeripura nomeritjindiro we, eye ma yenene okukotorwa kombongo.—2 Kor. 2:​6-8.

12. (a) Omozongaro zeṋe ovanene vombongo mu mave sokukengeza? (b) Ongwaye tji tu ha sokumuna kutja ovandu tjiva mba tjita ouvi ounene kamaave isirwa i Jehova? (Wina tara komambo wokehi.)

¹² Mozongaro tjiva, ovanene vombongo mave hepa okukengeza ngunda ave hi ya kotora omundu mombongo. Otjotjihorera, indu omundu tja tatumisa omuatje poo ovanatje, poo tja isa okurikotamena ku Jehova  okuzambo e mu pirukire, poo tja tjita ovineya kutja ma teye orukupo rwe, ngahino mokukatuka orukupo, ovanene vombongo ve sokutjiwa nawa kutja omundu ngo we ritanaura tjiri. (Mal. 2:14; 2 Tim. 3:6) Owo mave sokutjevera ovakambure mombongo. Posi ya komunda imbwo warwe, matu hepa okuzemburuka kutja Jehova ma yakura omundu ngamwa auhe ngwa tjita ouvi posi ya ngwe ritanaura tjiri, na isa okutjita oviṋa ovivi. Ku nao, ovanene vombongo ve sokutara nawa kutja omundu ngu ha ri nombinḓu komutima nu ngu ha ri omuṱakame tjiri we ritanaura. Posi ya owo kave sokumuna kutja omundu ngo kamaa isirwa i Jehova. b—1 Petr. 2:10.

OVIṊA OMBONGO MBI MAI YENENE OKUTJITA

13. Ombangu iṋe ndji ri pokati komuano mu tu tjinda omundu ngwa vyurwa i yovanene vombongo ku na ingwi ngwa isamewa mombongo?

¹³ Otja tji twa hungirire ko morupa ndwa kapita, povikando tjiva pe tjivisiwa kutja omundu wa vyurwa. Tji pa tjitwa nao, eṱe matu yenene okukayenda komurungu okukara pu na ye, mena rokutja eye wa rundurura omeripura novitjitwa vye ovivi. (1 Tim. 5:20) Eye ngunda orupa rwombongo, nu ma hepa okutunduuzwa i yovakambure ovakwao. (Hebr. 10:​24, 25) Posi ya, ongaro ndjo ya panguka ku indji yomundu ngwa isamewa mombongo. Eṱe katu “wana” poo “nangarire ingwi okurya ovikurya puna omundu ngu ri nai.”—1 Kor. 5:11.

14. Ondando iṋe Omukriste ndji ma sokutjita indu tji kwe ya kokutjinda omundu ngwa isamewa mombongo? (Wina tara kotjiperendero.)

¹⁴ Hapo eronga ndi ri mOvakorinte ovatenga 5:11 mari hee kutja katu sokuṋanga omundu ngwa isamewa mombongo kombongarero yombongo, poo okumukorisa indu tje ya pozombongarero zombongo? Kako. Otjingaperi kutja, katu sokukara pu na ye. Posi ya Ovakriste mave yenene okuungurisa omeritjiviro wawo womomutima okutya kutja mave ṋanga omundu ngwa isamewa mombongo kombongarero yombongo. Omundu ngo mape ya omuzamumwe poo wa ri epanga ropopezu ngunda e hi ya isamewa mombongo. Eṱe matu  sokutjinda vi omundu ngo indu tje ya kombongarero yombongo? Morukapitaveze, eṱe kaatu korisa omundu ngo. Nai Omukriste auhe ma hepa okuungurisa omeritjiviro we womomutima nga zikamena kOmbeibela okutoorora kutja ma tjiti vi. Tjiva mape ya ave mu korisa, poo ave mu yakura kombongarero yombongo. Posi ya, katu sokukara nehungi ere ku nomundu ngo poo okutjita oviṋa vyarwe pu na ye.

15. Omambo nge ri mu 2 Johanes 9-11 ye hungirira kovatjite veṋe vouvi? (Wina tara kokawongo nga “ Hapo Johanes na Paulus aave hungirire kouvi umwe?”)

¹⁵ Ovandu tjiva mape ya ave tja, ‘Hapo Ombeibela kai tja Omukriste tja minike omundu otja ingo u norupa mourunde we?’ (Lesa 2 Johanes 9-11.) Oviṋa mbya tjangwa mu 2 Johanes 9-11 vi hungirira komundu ngwa isa okurikotamena ku Jehova nu ngu mu pirukira, poo omundu ngu kondja okutjita kutja varwe ve tjite imbi Ombeibela mbi tja ovivi. (Omavan. 2:20) Ku nao, indu omundu tji ma handjaura omahongero woposyo poo omeritjindiro warwe omavi, ovanene vombongo kave nokuhakaena ku na ye. Otjingaperi kutja omundu ngo ma yenene okuritanaura. Ngunda omundu ngo e hi ya tjitire nao, eṱe kamaatu korisa omundu otja ingo poo okumuṋanga okukara pombongarero yombongo.

HORERA KOTJARI TJA JEHOVA

16-17. (a) Ovikwaye Jehova mbye vanga ovatjite vouvi okutjita? (Esekiel 18:32) (b) Omomuano uṋe ovanene vombongo mu ve ungura pu na Jehova indu tji mave kondjo okuvatera ovatjite vouvi?

¹⁶ Ovikwaye mbi twe rihongo mokambo nga? Jehova ka vanga kutja omundu nandarire umwe ma nyonwe. (Lesa Esekiel 18:32.) Eye u vanga kutja ovatjite vouvi ve hangane ku na ye. (2 Kor. 5:20) Jehova ope zokutunduuza ovakarere ve mbe mwesa, okuritanaura nokukotoka ku ye. Ovanene vombongo ve ungura kumwe na Jehova okuvatera imba mbe tjita ouvi ounene okuritanaura.—Rom. 2:4; 1 Kor. 3:9.

¹⁷ Meyuru mu kara enyando tjinene indu ovandu mbe tjita ouvi tji ve ritanaura. Tate wetu womeyuru Jehova, u kara nenyando tjinene otjikando atjihe indu onḓu ye ndja pandjarere tji ya kotoka kombongo. Orusuvero rwetu ku Jehova ru kurira ko otja tji matu ripurire ko oukoto komuano mbwe isira, otjari tje, nouwa we.—Luk. 1:78.