Kara nondjoroka ngunda amo undju ku Jehova nomuretima
HAPO ove u undja oruveze Jehova tji me yekuisa po ouvi auhe nokuyarura avihe koupe? (Omavan. 21:1-5) Otjingaperi kutja ove u undja oruveze ndwo. Posi ya kaaruhe tje rira oupupu okuundja ku Jehova nomuretima, tjinene indu tji matu munu omauzeu. Omaundjiro nge womba orure ye verisa omutima.—Omiano 13:12.
Jehova u vanga kutja eṱe tu undje nomuretima oruveze eye ndwa twa po indu tji me ku yandeka ouye mbwi. Ongwaye eye tje undjira ko otjiṋa ho kweṱe? Otjikwaye tji matji tu vatere okukara nondjoroka ngunda amatu undju?
ONGWAYE JEHOVA TJE VANGA KUTJA EṰE TU UNDJE?
Ombeibela i tja: “Muhona ma undju okumuṱira otjari. Eye me rirongerere okumuṱira ondjenda, orondu Muhona Eye ongu ri Ndjambi ngu tjita ousemba. Ovaṋingandu imba mbe riyameka ku Ye.” (Jes. 30:18) Omambo wa Jesaja nga oyeni ya tjangererwe kOvajuda mbaave pirukire Mukuru. (Jes. 30:1) Posi ya pa ri Ovajuda tjiva ovaṱakame nu omambo nga aaye ve pe omaundjiro. Omambo nga wina ye yandja omaundjiro kovakarere va Jehova ovaṱakame ndino.
Ku nao eṱe twa sokuundja nomuretima, mena rokutja Jehova u undja nomuretima. Eye u noruveze ndwa twa po indu tji mee ku yandeka ouye mbwi, nu eye u undja eyuva ndo noiri okuya. (Mat. 24:36) Oruveze ndwo, ma rire oukahu kutja ovizeze vya Satan ohunga na Jehova na imba mbe mu karera kauatjiri. Eye ma kaisa po Satan na ngamwa auhe ngu ri komunda we, posi ya eye me keturaisira “otjari.”
Ngunda amatu undju Jehova mape ya a ha isa po omauzeu wetu, posi ya eye u tu pa ongamburiro yokutja tjiri matu yenene okukara nondjoroka ngunda matu undju. Otja Jesaja tja hungira, eṱe matu yenene okukara nondjoroka ngunda amatu undju otjiṋa otjiwa okutjitwa. (Jes. 30:18) Omomuano uṋe mu matu yenene okukara nondjoroka ndjo? Pe noviṋa vine mbi mavi yenene okutuvatera.
OMUANO MU MATU YENENE OKUKARA NONDJOROKA NGUNDA AMATU UNDJU
Ripura ohunga noviṋa oviwa mehupo roye. Ombara David wa muna oviṋa ovingi ovivi amavi tjitwa ngunda e nomuinyo. (Eps. 37:35) Posi ya eye wa tjanga kutja: “Kara nomuretima nu undja ku Muhona. O handjisiwa i imba mbe nouindandu, na imba mbe ripura ovineya.” (Eps. 37:7) David omuini wa ungurisa omambo nga, indu tje ripurire komakwizikiro wa Jehova kutja me mu yama. Nu eye wina wa ri nondangi koviṋa avihe oviwa Jehova mbye mu tjitira. (Eps. 40:5) Nu eṱe wina tji matu ripurire koviṋa oviwa mehupo retu, pendje nokuripurira koviṋa ovivi mbi tjitwa ongondoroka na eṱe, mai rire oupupu kweṱe okuundja ku Jehova.
Tanga Jehova aruhe. Omutjange wEpsalme 71, ngu mape ya a rire David, wa tja nai ku Jehova: “Ami aruhe me undju kOve, nu me wezere ko ondangero yandje kOve.” (Eps. 71:14) Omomuano uṋe eye ma tanga Jehova? Eye wa raera varwe ohunga na Jehova nu ee mu imburire omatangero. (Eps. 71:16, 23) Tjimuna David, eṱe matu yenene okukara nondjoroka ngunda amatu undju ku Jehova. Eṱe tu mu tanga indu tji matu zuvarisa ku varwe, tji matu hungire ohunga na ye komapanga wetu na komaṱunḓu wetu, na tji matu imbura omaimburiro wetu. Otjikando tjarwe tji mo imbura rimwe romaimburiro wetu, ripurira komambo nomuano mu mari ku pe ondjoroka.
Yandjera ovambure ovakweṋu ve ku tunduuze. Indu David tjaa ri nouzeu wa tja nai ku Jehova: “Me zuvarisa ena roye momurungu wotjiwaṋa tjoye.” (Eps. 52:9) Eṱe wina matu yenene okumuna omatunduuziro okuza kovakambure ovakwetu tji tu ri pozombongarero zombongo, motjiungura tjokuzuvarisa, na tji twa worongana pamwe momiano vyarwe.—Rom. 1:11, 12.
Zeuparisa omaundjiro woye. Epsalme 62:5 mari tja: “Mu Ndjambi erike omuinyo omu u muna orusuvo; omaundjiro wandje ye za mu Ye.” Ounanḓengu tjinene okukara nomaundjiro womasa, tjinenenene indu omaandero wouye mbwi tji maye wombo. Eṱe matu sokukara nongamburiro yokutja omakwizikiro wa Jehova maye yenenisa, nandarire kutja twa undju orure ndu ṱa pi. Eṱe matu yenene okuzeuparisa omaundjiro wetu mokukonḓonona Embo ra Mukuru. Otjotjihorera ripura ohunga noviṋa avihe Ombeibela mbi ya hunganeka nu mbya yenenisiwa, omuano ovatjange vOmbeibela pekepeke mu ve yenda kumwe, nomuano Jehova me ritjiukisa. (Eps. 1:2, 3) Nu wina matu sokukayenda komurungu ‘okukumba aruhe momasa wOmbepo Ondjapuke,’ kokutja tu kare noupanga ouwa ku na Jehova ngunda amatu undju omakwizikiro we womuinyo waaruhe okuyenenisiwa.—Judas 20, 21
Tjimuna Ombara David, kara nongamburiro yokutja Jehova u tjevera imba mbe undja ku ye, nu u ve raisira orusuvero oruṱakame. (Eps. 33:18, 22) Kayende komurungu okuundja ku Jehova nomuretima mokuripurira koviṋa oviwa mehupo roye, mokumutanga, okuyandjera ovakambure ovakweṋu okukutunduuza, nokukayenda komurungu okuzeuparisa omaundjiro woye.
