1. Ongwaye tji matu hepa Jehova okutuhongorera po? Yandja otjihorera.

 NGATU tje wa pandjara mokuti. Okuti ngo okunaumba mena rokutja mu novipuka ovinyondorore, ovikunwa ovinawanga, noupuka ounawanga. Nu wina mape ya o wire mozondjombo ozonguru poo motupoko. Ove mo tjaterwa tjinene tji u ri pu nomundu ngu ma tjiwa oruveze ndwo nawa nu ngu me ku hongorere po. Ouye mbwi u ri tjimuna okuti ngo. Mwe ura omaumba omengi ngu mape ya aye ṱunu koupanga wetu ku na Jehova. Posi ya eṱe tu na Jehova ngu ri Omuhongore wetu omusembasemba. Eye u tu hongorera po kokure nomaumba kokutja tu kamune omuinyo waaruhe mouye oupe.

2. Omomuano uṋe Jehova me tu hongorera po?

² Omomuano uṋe Jehova me tu hongorera po? Omuano omutenga, okupitira mEmbo re Ombeibela. Posi ya eye wina u ungurisa ovandu okutuhongorera po. Otjotjihorera, eye u ungurisa “omukarere omuṱakame nomunazondunge” okutupa ovikurya mbi tu vatera okutoora omikambo omisemba. (Mat. 24:45) Jehova wina u ungurisa ovarumendu ovaṱakame varwe okutuhongorera po. Otjotjihorera, ovatarere votukondwa novanene vombongo ve tu tunduuza nokutupa omuhunga mbu mau yenene okutuvatera moruveze rwouzeu. Eṱe tu nondangi tjinene ku Jehova kokutja eye u tu hongorera po moruveze rwouzeu ndwi ngunda omaandero aye hi ye ya. Ihi tji tu vatera kutja tu kayende komurungu okurira omapanga wa Jehova kokutja tu yenene okuyorokera ehupo nai nokukayorokera ehupo nga aruhe.

3. Matu katara ku ye morupa ndwi?

³ Posi ya povikando tjiva mape ya ai rire ouzeu kweṱe okukongorera omuhunga wa Jehova, tjinenenene indu tji mau zuu kovandu mbe he ri ohomonena. Omena raye? Mape ya atu ha tjaterwa  i yomuhunga mbu mave tu pe. Poo mape ya atu munu kutja omuhunga mbu mave tu pe kamusemba, ku nao kau nokuza ku Jehova. Oruveze otja indo, eṱe matu sokukara nongamburiro yokutja Jehova ongu ma hongorere po ovakarere ve, nu okukongorera omuhunga mbo ku tu etera ouwa. Morupa ndwi matu katara koviṋa vitatu mbi mavi yenene okuzeuparisa ongamburiro yetu. (1) Omuano Jehova ma hongorera po ovakarere ve moruveze rwOmbeibela, (2) omuano Jehova me tu hongorera po ndino, (3) nomuano mu tu muna ouwa indu tji matu kayenda komurungu okukongorera omuhunga we.

OMUANO JEHOVA MA HONGORERA PO OTJIWAṊA TJA ISRAEL

4-5. Omomuano uṋe Jehova ma raisa kutja aa ungurisa Moses okuhongorera po Ovaisrael? (Tara kotjiperendero tjokombanda yokambo nga.)

⁴ Jehova wa zika Moses okuhongorera po otjiwaṋa tja Israel okupita moEngipte. Nu eye wa yandja oviraisiro ovikahu kOvaisrael kutja eye me ve hongorera po okupitira mu Moses. Otjotjihorera, eye wa yandja otjikamba tjaatji zorere mutenya notjikamba tjomuriro okuyera ouṱuku. (Eks. 13:21) Moses aa kongorere otjikamba tjaatji hongorere ye nOvaisrael okuyenda kOmurongawotuu. Posi ya Ovaengipte va rambera Ovaisrael nu owo va urumine tjinene mena rokutja aave ripura kutja Ovaengipte mave ve zepa. Owo aave munu kutja Moses wa ri posyo okuveeta kOmurongawotuu. Posi ya eye kaari posyo. Jehova ongwa ungurisa Moses okutwara ovakarere ve ngo. (Eks. 14:2) Mukuru we ve yama momuano omuhimise.—Eks. 14:​26-28.

⁵ Ozombura 40 kombunda yanao, Moses wa kayenda komurungu okukongorera otjitwimise tjotjikamba Jehova tja ungurisa okuhongorera po ovakarere ve mokuti onguza. a Oure woruveze kaaṋi, Jehova wa twapere otjikamba kombanda yondanda ya Moses, Ovaisrael avehe paave yenene okumuna. (Eks. 33:7, 9, 10) Jehova aa hungire ku na Moses okupitira motjikamba, nu eye wa raera ovandu oviṋa Jehova mbye mu raera. (Eps. 99:7) Ovaisrael aave yenene okumuna oukahu kutja Jehova ma ungurisa Moses okuvehongorera po.

6. Ovaisrael va ri noumune uṋe ohunga nomuano Jehova mee ve hongorere po? (Numeri 14:​2, 10, 11)

⁶ Otjihihamise, Ovaisrael ovengi kaave munu kutja Jehova aa hungire ku na wo okupitira mu Moses. (Lesa Numeri 14:​2, 10, 11.) Povikando ovingi, owo kaave yakura kutja Jehova aa ungurisa Moses okuvehongorera po. Nu mena ranao, Jehova kena pe ve yandjera okuhita mEhi ekwizikwa.—Num. 14:30.

7. Yandja ovihorera vyovandu mba kongorera omuhunga wa Jehova. (Numeri 14:24) (Wina tara kotjiperendero.)

⁷ Posi ya Ovaisrael tjiva va kongorera omuhunga wa Jehova. Otjotjihorera, Jehova wa tja “Kaleb . . . u nonḓuviro ku Ami.” (Lesa Numeri 14:24.) Mukuru wa sera Kaleb ondaya nu nandarire we mu yandjera kutja ma toorore poṋa pu ma vanga okutura mEhi ekwizikwa. (Jos. 14:​12-14) Ovaisrael mba yandjerwa okuhita mEhi ekwizikwa, va raisa otjihorera otjiwa okukongorera omuhunga wa Jehova. Indu Josua tja zikwa poruveze rwa Moses okuhongorera po Ovaisrael, owo “ve mu yozika otja tji va yozikire Moses ngunda a ri nomuinyo.” (Jos. 4:14) Mena ranao, Jehova we ve sera ondaya nu we ve pa ehi eye nde ve kwizikira.—Jos. 21:​43, 44.

8. Kahurura omuano Jehova maa hongorere po ovakarere ve moruveze rwozombara. (Wina tara kotjiperendero.)

⁸ Ozombura kombunda yanao, Jehova wa ungurisa ovapangure okuhongorera po ovakarere ve. Kombunda yanao, moruveze rwozombara Jehova wa zika ovaprofete okuhongorera po ovakarere ve. Ozombara ozonḓakame za puratena komaronga wovaprofete. Otjotjihorera, Ombara David wa yakura omaronga  okuza komuprofete Natan. (2 Sam. 12:​7, 13; 1 Ekuruh. 17:​3, 4) Ombara Josafat wa puratena komuprofete Jahasiel, nu wa tunduuza ovandu moJuda ‘okukara nongamburiro mu imbi mbi mave raerwa i ovaprofete’ va Mukuru. (2 Ekuruh. 20:​14, 15, 20) Indu Ombara Hiskija tja wire momuinyo, wa ningira ombatero komuprofete Jesaja. (Jes. 37:​1-6) Indu ozombara tjaaze kongorere omuhunga wa Jehova, eye ee ve sere ondaya nu otjiwaṋa aatji yamwa. (2 Ekuruh. 20:​29, 30; 32:22) Ya ri oukahu kutja Jehova aa ungurisa ovaprofete ve okuhongorera po ovakarere ve. Posi ya ozombara ozengi nOvaisrael kave na pu va puratena kovaprofete va Jehova.—Jer. 35:​12-15.

OMUANO JEHOVA MA HONGORERE PO OVAKRISTE VESEREWONDO ETENGA

9. Jehova wa ungurisa uṋe okuhongorera po Ovakriste veserewondo etenga? (Wina tara kotjiperendero.)

⁹ Kombunda yaindu Jesus tja za nokupendurwa, Jehova wa zika ombongo yOukriste. Omomuano uṋe Jehova ma hongorera po Ovakriste veserewondo etenga? Eye wa zika Jesus otjotjiuru tjombongo. (Ef. 5:23) Posi ya, Jesus kena pa raera ovahongewa kourike wawo kutja ngave tjite vi. Eye wa ungurisa ovaapostele novatarere vombongo moJerusalem okuhongorera po ovakarere ve. (Oviung. 15:​1, 2) Wina, ovanene vombongo va zikirwe okuhongorera po ozombongo.—1 Tes. 5:12; Tit. 1:5.

10. (a) Ovakriste veserewondo etenga va ri noumune uṋe ohunga nomuhunga mbwaave pewa? (Oviungura 15:​30, 31) (b) Ongwaye tjiva moruveze rwOmbeibela tji ve hi na va puratena kovandu Jehova mba zika? (Tara kokawongo nga “ Ongwaye tjiva tji va nakaura oviraisiro ovikahu?”)

¹⁰ Hapo Ovakriste veserewondo etenga va puratena komuhunga mbo? Ovengi vawo va ri nondjoroka okukongorera nokuungurisa omuhunga mbwaave pewa. Owo wina “va nyanda omitima tjinene mena rombuze ombwa” ndji va pewa. (Lesa Oviungura 15:​30, 31.) Hapo omomuano uṋe Jehova me hongorera po ovakarere ve ndino?

OMUANO JEHOVA ME TU HONGORERA PO NDINO

11. Yandja otjihorera tji matji raisa omuano Jehova me hongorera po imba mbe hongorera po moruveze rwetu.

¹¹ Jehova u kayenda komurungu okuhongorera po ovakarere ve ndino. Eye u tjita nao okupitira mEmbo re nOmuna we ngu ri otjiuru tjombongo. Hapo tu muna oviraisiro kutja Mukuru ndino u kayenda komurungu okuungurisa ovandu okutuhongorera po? Ii. Otjotjihorera,  tara koviṋa mbi vya tjitwa kombunda yombura ndji 1870. Charles Taze Russell nomapanga we, va uta okuzuva nawa kutja ombura ndji 1914 mai rire ombura onanḓengu yomazikamisiro wOuhona wa Mukuru. (Dan. 4:​25, 26) Owo va muna oviṋa mbi mena rokutja va tjita omakonḓononeno mOmbeibela nu va ri nongamburiro yokutja omaprofetero ngo maye yenenisiwa. Hapo Jehova ee ve hongorere po indu tjaave tjiti omakonḓononeno wawo wOmbeibela? Ii otjingaperi. Imbi mbya tjitwa mouye mombura ndji 1914 vya raisa kutja Ouhona wa Mukuru wa uta okuhonapara. Ovita vyOuye Ovitenga vya uta nu kwa kongorera omitjise, omanyinganyingiro wehi omatirise, nondjara. (Luk. 21:​10, 11) Jehova tjiri aa ungurisa ovarumendu Ovakriste mbo okuvatera ovakarere ve.

12-13. Ovikwaye ovarumendu ovakambure mbaave hongorere po otjira tja Jehova tji va tjita kutja otjiungura tjokuzuvarisa tji kurire ko mOvita vyOuye Ovitjavari?

¹² Wina tara ku imbi mbya tjitwa mOvita vyOuye Ovitjavari. Ovarumendu ovakambure pomberoo ohongora mbaave hongorere po, va konḓonona Omavandururiro 17:8. Okuza komakonḓononeno wawo ngo, owo va zuva nawa kutja Ovita vyOuye Ovitjavari kavi nokuuta ovita vya Armagedon. Ku nao aave tjiwa kutja mape kara oruveze rwohange kombunda yovita, Ovahongonone va Jehova mu mave yenene okuzuvarisa kovandu ovengi. Nandarire kutja kaau munika tjimuna omuhunga omusemba, ovarumendu ovakambure mbaave hongorere po otjira tja Jehova va uta oskole ya Gilead, ndjaai rongerisa ovahindwa okukazuvarisa nokukahonga momahi ayehe. Ovahindwa aave hindwa nandarire mokati kovita. Nu wina omukarere omuṱakame wa rongerisa oskole b okuvatera avehe mombongo okurira ovazuvarise novahonge ovawa. Momuano mbwi, ovakarere va Jehova aave rongerisiwa kutja ve kazuvarise.

¹³ Tji matu tara ndino, tu muna kutja Jehova tjiri aa hongorere po ovakarere ve moruveze rwouzeu ndwo. Okuza kOvita vyOuye Ovitjavari, ovakarere va Jehova momahi omengi ve nouyara wokuzuvarisa. Ovandu ovengi va uta okutjiwa Jehova nu ovakarere ve ve zuvarisa mouye auhe.

14. Ongwaye tji matu sokukambura momuhunga mbu mau zu kotjira tja Jehova novanene vombongo? (Omavandururiro 2:1) (Wina tara kotjiperendero.)

 ¹⁴ Ndino ouṋepo wOrutu Orunane u kayenda komurungu okupaha omuhunga wa Kristus. Owo ve vanga kutja omuhunga auhe mbu mave yandja kovakambure ovakwao u raise oumune wa Jehova na Kristus. Nu wina owo ve ungurisa ovatarere votukondwa novanene vombongo okuyandja omuhunga kozombongo. c Ovanene vombongo ovatwirisiwa ve ri “meke [ra Kristus] rokunene.” (Lesa Omavandururiro 2:1.) Otjingaperi kutja ovanene vombongo avehe kahomonena nu ve tjita ozondataiziro. Moses, Josua novaapostele wina povikando tjiva aave tjiti ozondataiziro. (Num. 20:12; Jos. 9:​14, 15; Rom. 3:23) Posi ya, eṱe tu muna oukahu kutja Jesus u hongorera po omukarere omuṱakame novanene vombongo, nu eye ma kayenda komurungu okutjita nao “omayuva aehe nga komaandero wouye.” (Mat. 28:20) Ku nao, eṱe matu sokukambura momuhunga auhe mbu mau zuu ku imba mba zikwa okutuhongorera po.

TU MUNA OUWA INDU TJI MATU KONGORERE OMUHUNGA WA JEHOVA

15-16. Hapo ove we rihongo tjike okuza kovihorera vya imba mba kongorera omuhunga wa Jehova?

¹⁵ Indu tji matu kayenda komurungu okukongorera omuhunga wa Jehova, eṱe tu muna ouwa. Otjotjihorera, Andy na Robyn va puratena kondunge yokuhinokukara noviṋa ovingi mehupo. (Mat. 6:22) Ku nao, owo va yenena okuvatera okutunga omatuwo womerikotameneno nomatuwo warwe wOvahongonone va Jehova. Robyn wa tja: “Povikando tjiva aatu kara moutuwo ouṱiṱi nu povikando tjiva mbu ha ri nokombeisa. Nu ami ee hepa okurandisa oviṋa vyandje ovingi mbyee ungurisa okuperenda oviperendero, nandarire kutja otjiṋa tji mba suverere okutjita. Ami tjiri mba rira indu tjee vi randisa. Posi ya tjimuna omukazendu wa Abraham, Sara, ami mbe rimanena okutara komurungu.” (Hebr. 11:15) Ouwa uṋe ooAndy na Robyn mbu va muna? Robyn wa tja: “Tjiri eṱe twa ri nondjoroka tjinene mena rokutja aatu yandja ku Jehova oviṋa avihe mbi twa ri na vyo. Indu ami nomurumendu wandje tji matu ungura oviungura Jehova mbye tu pa, tu ripura ohunga nomuano ehupo mu mari kakara mouye oupe.” Andy wa tja: “Eṱe tu nondjoroka tjinene mena rokutja tu ungurisa oruveze rwetu aruhe nomasa wetu ayehe okuungurira Jehova.”

¹⁶ Omomuano uṋe warwe mu tu muna ouwa indu tji matu kayenda komurungu okukongorera omuhunga wa Jehova? Otjotjihorera, Marcia tja za nokumana oskole, eye aa vanga okukongorera ondunge ndja pewa yokurira omukandjira.  (Mat. 6:33; Rom. 12:11) Eye wa tja: “Ami ee sokukerihonga otjari ozombura ine komerihongero wokombanda. Posi ya ami ee vanga okuungurira Jehova ovingi. Pendje nokuyenda komerihongero wokombanda, ami mba tya okurihonga oviungura vyokomake kutja mbi yenene okukara novimariva mbi mavi ndji vatere kutja mbi rire omukandjira. Tjiri ami mba toora omukambo omusembasemba. Owami omukandjira ngu mbi nondjoroka nu mena rokutja mbi yenena okutya kutja me ungura pu pe ṱa pi, iho tji tjita kutja mbi vatere poBetel na wina okuungura oviṋa vyarwe ovingi motjira tja Jehova.”

17. Ozondaya zeṋe zarwe nḓu tu muna indu tji matu kayenda komurungu okukongorera omuhunga wa Jehova? (Jesaja 48:​17, 18)

¹⁷ Povikando tjiva eṱe tu muna omaronga nge tu tjevera kokusuvera ovimariva nokutjita oviṋa mbi mavi tjiti kutja tu teye ozoveta za Mukuru. Nu moviṱo mbyo, mai rire nawa kweṱe indu tji twa kongorere omuhunga wa Jehova. Tji twa tjiti nao matu kara nomeritjiviro omawa womomutima nokuyepa omauzeu omengi. (1 Tim. 6:​9, 10) Kape notjiṋa tji matji tu pe ohange nondjoroka pendje nokukarera Jehova okuura.—Lesa Jesaja 48:​17, 18.

18. Ongwaye ove tji u nonḓero okukayenda komurungu okukongorera omuhunga wa Jehova?

¹⁸ Jehova ma kayenda komurungu okuungurisa ovandu okuyandja omuhunga mondatumisire ozondirise, nu nandarire indu Jesus tji ma honaparere po oure wozombura eyovi. (Eps. 45:16) Hapo eṱe matu kayenda komurungu okukongorera omuhunga mbo nandarire kutja katu nokuvanga okutjita nao? Mai rire oupupu kweṱe okutjita nao indu tji tu kongorera omuhunga wa Jehova nai. Ngatu kayende komurungu okukongorera omuhunga wa Jehova, mbu mau kamburire mo imbwi mbu tu pewa i yovarumendu ovaṱakame eye mba zika okututjevera. (Jes. 32:​1, 2; Hebr. 13:17) Eṱe matu yenene okukongorera Omuhongore wetu Jehova nongamburiro aihe, mena rokutja eye u tjita kutja tu kare kokure noviṋa mbi mape ya avi tjiti kutja tu teye oupanga wetu ku na ye nokutuhongorera po kokutja tu kamune omuinyo waaruhe.