OVATJANGE vOmbeibela potuingi aave yarukire po embo kembo. Ngatu katare koviṋa vitatu mbi mape ya aavi tjiti kutja ovatjange ve yarukire po omambo:

Oruveze Ombeibela tjaai tjangwa. MoIsrael otjikuru, ovandu ovengi kava ri noviherengururwa vyOmatwako. Owo aave puratene kOmatwako indu otjiwaṋa tji tja worongana pamwe pondanda yomaturiro. (Deut. 31:​10-12) Mape ya pa ri oviṋa mbyaavi tjiti kutja ave ha puratene nawa otja tjaave kurama ozoiri ozengi mokati kovandu ovengi. (Neh. 8:​2, 3, 7) Mozongaro otja inḓo, okuyarukira po omambo omananḓengu, aaku tjiti kutja i rire oupupu kovandu okuzemburuka omatjangwa nokuyeungurisa. Nu wina, aaku tjiti kutja ve zemburuke ozoveta Jehova nḓe ve pa.—Lev. 18:​4-22; Deut. 5:1.

Omuano mu ya tjangwa. Otupa tjiva twOmbeibela twa tjangerwe otjomaimburiro, tjimuna Omapsalme, Eimburiro rOmaimburiro raSalomo, nOmiimbo vyoruhoze vyaJeremia. Povikando tjiva, omaimburiro aaye yarukire po omambo kutja ovandu ve yenene okuyezemburuka. Otjotjihorera, tara omambo nge ri mEpsalme 115:​9-11: “Vaisrael, riyamekeye ku Muhona! Eye u mu vatera nu u mu yama. Nganda yaAron, riyameka ku Muhona! Eye u ku vatera nu u ku yama. Eṋe mbu mu karera Muhona, riyamekeye ku Ye! Eye u mu vatera nu u mu yama.” Okuyarukira po omambo ngo aaku vatere ovaimbure okuzemburuka ouatjiri ounanḓengu mbwo nokuveṱuna komutima.

Ounanḓengu wokuṋunisa omapu omananḓengu. Ovatjange vOmbeibela povikando tjiva aave yarukire po omambo omananḓengu. Otjotjihorera, indu Jehova tja raera Ovaisrael kutja kave sokurya ombinḓu, wa raera Moses okuveraera povikando ovingi kutja omena raye tji ve ha sere okutjita nao. Mukuru aa vanga okuṋunisa epu rokutja omuinyo u ri mombinḓu. (Lev. 17:​11, 14) Kombunda, ovaapostele novanene vombongo moJerusalem va tjanga oviṋa Ovakriste mbi mave sokunakaura. Nu va ṋunisa rukwao ounahepero wokukara kokure nombinḓu.—Oviung. 15:​20, 29.

Nandarire kutja Ombeibela i yarukira po omambo, iho katji nokuheya kutja Jehova u vanga kutja tu tjite nao aruhe. Otjotjihorera, Jesus wa tja: “Tji mamu kumbu, amu wondjorora tjinene.” (Mat. 6:7) Okuzambo, eye wa kahungirira koviṋa mbi matu yenene okukumbira. (Mat. 6:​9-13) Nandarire kutja katu yarukire po omambo mozongumbiro zetu, matu yenene okuyarukira po omapu rukwao na rukwao.—Mat. 7:​7-11.

Mena romapu omawa ngo, Embo ra Mukuru opu ri zokuyarukira po omambo tjiva. Imbwi umwe womiano omingi Omuhonge wetu omunenenene me tu honga kutja tu mune ouwa.—Jes. 48:​17, 18.