ORITJATATU tji ya ri 18 ku Januari 2023, pa tjitwa omatjivisiro wapeke korungovi ndwi jw.org, ngaaye tja Mbuti Gage Fleegle na Mbuti Jeffrey Winder va zikwa otjouṋepo wOrutu Orunane rwOvahongonone va Jehova. Ovarumendu ovakambure vevari mba va karera Jehova nouṱakame oure woruveze orure.

Mbuti Fleegle we kurira koutjiro wa Pennsylvania, tja U.S.A., nu we kurisiwa mouatjiri i yovanene ve. Tja ri omutanda, eṱunḓu re ra tjindira kokarongo okaṱiṱi ku kwa ri ouhepe wovazuvarise. Katjisupi kombunda yanao, eye wa papitisiwa tji ya ri 20 ku Novemba, 1988.

Ovanene va Mbuti Fleegle aave mu tunduuza okuungurira Jehova oruveze aruhe. Potuingi aave sekirisa poyawo ovatarere mbe varura ozombongo na imba mbe karera poBetel. Mbuti Fleegle aa yenene okumuna omuano ovakambure mbo mu va ri nondjoroka. Kombunda yokupapitisiwa, eye wa ri ra omukandjira tji ya ri 1 ku Septemba 1989. Ozombura mbari kombunda yanao eye wa yenenisa ondando ye yokukarera poBetel, eye ndja tandere tja ri nozombura 12. Eye wa uta okukarera poBetel ya Brooklyn tji ya ri Oktoba, 1991.

PoBetel Mbuti Fleegle wa ungura morupa ndu twa ko omambo kumwe oure wozombura hambondatu, nu okuzambo wa kaungura mOrupa rwoviungura vyombongo. Oure woruveze ndwo, eye wa ri mombongo yOtjirussian oure wozombura ozonḓiṱi. Mo-2006, eye wa kupa omukazendu we Nadia, nu va uta okukarera pamwe poBetel. Owo va karera mombongo yOtjiputu, nu oure wozombura zokombanda omurongo owo va karera mombongo yOtjispanish. Kombunda yozombura ozengi zokuungura mOrupa rwoviungura vyombongo, Mbuti Fleegle wa kaungura mOmberoo yOkomiti ohonge, nu okuzambo a kaungura mOmberoo yOkomiti yoviungura vyombongo. Mu Marta 2022, eye wa zikwa  otjomuvatere wOkomiti yoviungura vyombongo yOrutu Orunane.

Mbuti Winder we kurira moMurrieta, California, tja U.S.A. Ovanene ve mu kurisira mouatjiri, nu wa papitisiwa tji ya ri 29 ku Marta, 1986. Omueze mbwa kongorera ko, eye wa uta okukarera otjomukandjira omuvatere. Eye tjiri wa tjaterwa tjinene nu aa vanga okukayenda komurungu okutjita nao. Kombunda yomieze hamboumwe vyokukara otjomukandjira omuvatere, eye wa uta okukarera otjomukandjira omukarere tji ya ri 1 ku Oktoba 1986.

Tja ri omutanda, Mbuti Winder wa karyangera omarumbi we yevari ngaaye karere poBetel oruveze ndwo. Iho tja tjita kutja ma vange okutjita omaningiriro koBetel indu tja rire omunene. Mu Mei 1990, eye wa ṋangwa okukarera poBetel moWallkill.

PoBetel Mbuti Winder wa ungura motupa pekepeke, tjimuna Orupa rwomakohororero, Orupa rwovihape novikokotwa, nOmberoo yoBetel. Mo-1997, wa kupa omukazendu we Angela, nu aave karere poBetel okuza koruveze ndwo. Mo-2014, va hindwa koWarwick, Mbuti Winder pa vatere nomatungiro womberoo ohongora. Mo-2016, owo va tjindira ko-Watchtower Educational Center poPatterson, Mbuti Winder pa kaungura mOrupa rwovipuratenwa nozovidio. Ozombura ine kombunda yanao va kotoka koWarwick, nu Mbuti Winder wa kaungura mOmberoo yOkomiti yokuvatera ouṋepo weṱunḓu roBetel. Mu Marta 2022, wa zikwa otjomuvatere wOkomiti yokuvatera ouṋepo weṱunḓu roBetel yOrutu Orunane.

Matu kumbu kutja Jehova ma sere ondaya kovarumendu mba, mbe ri “oviyandjewa kovandu,” otja tji mave kayenda komurungu okuungura oukukutu motjiungura tja Jehova.—Ef. 4:8.