Kutja tu tjate ku Jehova matu sokukara nongamburiro. Posi ya Ombeibela i tja “kavandu avehe mbe ri ovakambure.” (2 Tes. 3:2) Omuapostele Paulus aa hungire ohunga novemutatumise, kutja owo va ri ‘ovandu ovavi novarunde’ mbaave mu tatumisa. Posi ya imbi mbya hungira ohunga nongamburiro mavi kamburire mo ovandu varwe wina. Ovandu tjiva kave vanga okukambura kutja ku na Mukuru ngwa uta oviṋa avihe. (Rom. 1:20) Varwe mape ya ve kambura motjiṋa poo momundu omunamasa tjinene. Posi ya okukambura motjiṋa poo momundu omunamasa kaku ya yenena.

Matu hepa okukara nongamburiro kutja Jehova okeri, nu “u yandja ondjambi” ku imba mbe nongamburiro yomasa mu ye. (Hebr. 11:6) Kokutja tu kurise ongamburiro otja indjo, matu hepa ombepo ondjapuke okuza ku Mukuru. Nu kutja tu mune ombepo ondjapuke, matu hepa okuningira ku Jehova okupitira mongumbiro. (Luk. 11:​9, 10, 13) Omuano umwe mu matu yenene okumuna ombepo ondjapuke, eendu tji matu lese Ombeibela. Okuzambo atu ripura nokukondja okuṱakamisa imbi mbi matu rihongo. Indu tji twa tjiti nao, matu yandjere ombepo ya Jehova okutuvatera okuhupa momuano mbu mau raisa kutja tu nongamburiro ndji tjata ku ye.