1. Omomuano uṋe Epsalme 15:​1-5 mu mari yenene okutuvatera?

 MORUPA ndwa kapita twe rihongo kutja imba mbe riyandja ku Jehova, nu mbe kayenda komurungu okurira omapanga we wopopezu, mave yenene okurira ovayenda mondanda ye. Posi ya, ovikwaye mbi matu hepa okutjita kutja tu rire ovayenda ve? Epsalme 15 ri hungirira kepu ndi. (Lesa Epsalme 15: 1-5.) Epsalme ndi ri tu raera kutja ovikwaye mbi matu sokutjita kutja tu rire omapanga wopopezu ku na Mukuru.

2. Ovikwaye David mbi mape ya ee ripurire ko indu tja tamuna ondanda ya Jehova?

² Epsalme 15 ri uta nomapuriro nga: “Muhona, owaṋi ngu ma yenene okuvarura Ondjuwo yoye ondjapuke? Owaṋi ngu ma yenene okurikotamena koSion, ondundu yoye ondjapuke?” (Eps. 15:1) Indu omutjange wEpsalme David tja hungira ohunga ‘nOndjuwo ondjapuke’ poo ondanda, eye mape ya ee ripura nondanda yomaturiro ndja ri moGibeon oure woruveze kaaṋi. Poo mena rokutja David wa tamuna ‘ondundu ondjapuke’ ya Muhona, eye mape ya ee ripura ohunga nondanda ndja ri kondundu Sion moJerusalem. David wa tona ondanda ape ozokilometa 10 komamuho wa Gibeon, ma twa otjipwikiro tjomerikutiropamwe ngandu ondjuwo ondjapuke tji ya tungwa.—2 Sam. 6:17.

3. Omena raye tji matu vanga okuzuva nawa Epsalme 15? (Wina tara kotjiperendero.)

³ Otjingaperi kutja Ovaisrael ovengi kaave yandjerwa okukarera mondanda yomaturiro, nu ovandu ovaṱiṱi uriri omba rora okuhita mondanda maamu kara otjipwikiro tjomerikutiropamwe. Posi yokutja, ovakarere avehe va Jehova ovaṱakame mave yenene okurira ovayenda ve, mokurira omapanga we omakarerere. Iho otjiṋa eṱe atuhe tji tu vanga. Epsalme 15, ri tamuna ovikaṋena tjiva mbi matu hepa okukara na vyo nokuviraisa, kokutja tu kayende komurungu okurira omapanga wa Jehova.

 KARA NONḒUVIRO NOKUTJITA OUSEMBA

4. Matu tjiwa vi kutja ombapitisimo katjiṋa atjiyerike Jehova tje undjira ko kweṱe? (Jesaja 48:1)

⁴ Epsalme 15:2 ri tja epanga ra Mukuru “eye ngwi ngu nonḓuviro ku Ndjambi moviṋa avihe, nu ngu tjita ousemba aruhe.” Imbi oviṋa mbi matu sokukayenda komurungu okutjita. Hapo tjiri matu yenene okukara “nonḓuviro ku Ndjambi moviṋa avihe”? Ii. Nandarire kutja kape nomundu ngu ri ohomonena, Jehova eye u tu vara kutja tu ‘nonḓuviro ku ye moviṋa avihe’ indu tji matu kondjo okupuratena ku ye. Indu eṱe tji twe riyandja oveni ku Mukuru nokupapitisiwa indji ombutiro youpanga wetu ku na Mukuru. Otjotjihorera, moruveze rwOmbeibela, nandarire kutja omundu wa ri Omuisrael iho kaatji hee kutja omundu ngo omuyenda wa Mukuru. Tjiva aave rikotamene ku ye nungwari kamomuano ‘omusemba nu wouatjiri.’ (Lesa Jesaja 48:1.) Okuraisa kutja owo mave vanga okurira ovayenda va Jehova, Ovaisrael aave hepa okurihonga oviṋa Jehova mbye undjira ko nokuvikongorera. Momuano tjingewo, kutja tu kare noupanga wopopezu ku na Jehova ndino, eṱe matu hepa okuungura ovingi pendje nokupapitisiwa nokurira umwe wOvahongonone va Jehova. Eṱe matu sokukayenda komurungu ‘okutjita ousemba aruhe.’ Omomuano uṋe mu matu yenene okutjita nao?

5. Okukara nonḓuviro ku Jehova moviṋa avihe ku heya tjike?

⁵ Okukara ‘nonḓuviro moviṋa avihe nokutjita ousemba aruhe’ ku heya ovingi ku Jehova kombanda yokuyenda kozombongarero zombongo aruhe. (1 Sam. 15:22) Eṱe matu sokukondja okukara nonḓuviro ku Mukuru moviṋa avihe mbi tu tjita, nandarire indu tji tu ri atuyerike. (Omiano 3:6; Omuzuv. 12:​13, 14) Ounanḓengu okukondja okukara nonḓuviro ku Jehova, nandarire moviṋa mbi mavi munika tjimuna kavinanḓengu tjinene. Okutjita nao ku raisa kutja eṱe tjiri twe mu suvera nu ku tjita kutja eye me tu suverere ko.—Joh. 14:23; 1 Joh. 5:3.

6. Otja kOvaheberi 6:​10-12, ovikwaye mbi ri ovinanḓengu tjinene okukapita oviṋa oviwa mbi twa ungura morukapitaveze?

 ⁶ Jehova u tjaterwa tjinene i yoviṋa mbi twe mu tjitira morukapitaveze. Nungwari, mena rokutja twa tjita oviṋa oviwa morukapitaveze, iho katji nokuheya kutja eṱe matu karerere okurira ovayenda mondanda ya Jehova. Eṱe tu muna otjiṋa hi mOvaheberi 6:​10-12. (Lesa.) Jehova ka zembi oviṋa oviwa mbi twe mu tjitira morukapitaveze. Posi ya, eye u vanga kutja tu kayende komurungu okumukarera nomutima wetu auhe “nga komaandero.” Eye ma rire epanga retu nga komaandero indu “tji tu ha urirwe.”—Gal. 6:9.

HUNGIRA OUATJIRI NOMUTIMA WOYE AUHE

7. Okuhungira ouatjiri nomutima wetu auhe ku heya tjike?

⁷ Omundu ngu ma vanga okurira omuyenda mondanda ya Jehova, eye ma ‘sokuhungira ouatjiri nomutima we auhe.’ (Eps. 15:2) Ihi matji kamburire mo ovingi kombanda yokuhinokukorovizeze. Jehova u vanga kutja tu kare nouatjiri moviṋa avihe mbi matu hungire nokutjita. (Hebr. 13:18) Iho otjinanḓengu, mena rokutja ‘Muhona wa tonda ovandu mbe tjita ourunde, nungwari u yakura ovasemba nouṱakame.’—Omiano 3:32.

8. Ozongaro zeṋe eṱe nḓu matu hepa okuyepa?

⁸ Imba mbe ‘hungira ouatjiri nomitima vyawo avihe’ kave kara nonḓuviro ku Mukuru indu varwe tji mave ve munu uriri, nokutjita oviṋa ovivi indu tji ve ri aveyerike. (Jes. 29:13) Owo kave tjiti ovineya. Omundu ngu tjita ovineya mape ya a utu okuripura kutja ozoveta za Jehova tjiva kaaruhe tji zeri ozosemba. (Jak. 1:​5-8) Eye mape ya a ha kara nonḓuviro ku Jehova moviṋa mbi ma munu kutja kavinanḓengu tjinene ku ye. Okuzambo tja munu kutja kape notjiṋa otjivi tji tja tjitwa ku ye indu tje hi nokukara nonḓuviro, eye mape ya a utu okutjita oviṋa vyarwe ovivi kombanda yanao. Nandarire kutja me ripura kutja u karera Mukuru, Jehova kamaa yakura omerikotameneno we. (Omuzuv. 8:11) Nungwari, eṱe matu vanga okukara nouatjiri moviṋa avihe.

9. Ovikwaye mbya tjitwa indu Jesus tja hakaena ku na Natanael otjikando otjitenga, nu matji tu hongo tjike? (Wina tara kotjiperendero.)

⁹ Ounanḓengu tjinene okurira omundu ngu  “hungira ouatjiri nomutima we auhe.” Eṱe matu yenene okumuna otjiṋa hi, ku imbi mbya tjitwa indu Filipus tja ṋanga epanga re Natanael okuhakaena ku na Jesus. Nandarire kutja ya ri otjikando otjitenga Jesus okuhakaena ku na Natanael, eye wa tja: “Tara, ingwi tjiri Omuisrael, mu ye mu mu hi novineya!” (Joh. 1:47) Jesus aa tjiwa kutja ovahongewa ve varwe va ri nouatjiri, posi ya Natanael wa ri nouatjiri momuano wapeke. Natanael kaari ohomonena tjimuna eṱe, nungwari eye wa ri nouatjiri moviṋa avihe nu kaari omundu wovineya. Jesus wa suverere otjiṋa ho ohunga na Natanael nu e mu tanga. Otjingaperi kutja atuhe tu vanga kutja Jesus ma kare noumune tjingewo ohunga na eṱe.

10. Ongwaye tji matu sokukengeza ohunga noviṋa mbi matu hungire? (Jakobus 1:26)

¹⁰ Oviundjirwa ko ovingi mbya tamunwa mEpsalme 15, ohunga nomuano mbu tu tjinda varwe. Epsalme 15:3 ri tja omuyenda mondanda ya Jehova eengwi ngu “ha yamba [poo okuyamburura, NWT] ovakwao; eye ngwi ngu ha tjiti ouvi kovakwao, nu ngu ha ryangisire ovopopezu na ye ozohukutu.” Indu tji twa yamba poo okuyamburura varwe iho matji yenene okuvehihamisa tjinene, nu eṱe kamaatu rire ovayenda mondanda ya Jehova rukwao.—Lesa Jakobus 1:26.

11. Okuyamburura varwe ovikwaye, nu maku tjitwa tjike ku ingwi ngu yamburura varwe nokuhinokuritanaura?

¹¹ Omutjange wEpsalme wa tamuna okuyamba poo okuyamburura. Hapo okuyamburura ovikwaye? Okuhungira oviṋa mbi he ri ouatjiri ohunga nomundu warwe, mbi mavi yenene okuzunḓa ena re. Indu omundu tje yamburura varwe nu tje he ritanaura, eye ke nokuyenena okurira umwe wOvahongonone va Jehova rukwao.—Jer. 17:10.

12-13. Omozongaro zeṋe mu mape ya atu ryangisa ozohukutu, poo okuhungira oviṋa ovivi ohunga nomundu warwe nokuhinokuundjira ko? (Wina tara kotjiperendero.)

¹² Epsalme 15:3 wina ri tu zemburukisa kutja ovayenda va Jehova kave tjiti ouvi kovakwao nu kave ryangisa ozohukutu. Omomuano uṋe mu matu yenene okuryangisa ozohukutu?

 ¹³ Eṱe mape ya atu ryangisa ozohukutu, poo okuhungira oviṋa ovivi ohunga nomundu warwe nokuhinokuundjira ko. Otjotjihorera, (1) omukazendu omukambure wa isa otjiungura tjoukandjira, (2) ovakupasane kave nokukarera po Betel rukwao poo (3) omurumendu omukambure ke nokukarera otjomunene wombongo poo otjomuvatere wombongo. Ma rire navi okuraera varwe kutja ovakambure mbo va tjiti otjiṋa otjivi opu va zokupandjara omerizirira wawo. Mape ya pe nomapu omengi ngu tu hi nokutjiwa nga tjiti kutja ve kare nomarundurukiro ngo. Omuyenda mondanda ya Jehova ka ‘tjiti ouvi kovakwao nu ka ryangisa ovopopezu na ye ozohukutu.’

YOZIKA IMBA MBE NONḒUVIRO KU JEHOVA

14. Kahurura kutja omomuano uṋe ovayenda va Jehova mu ve pirukira “omundu ngamwa auhe ngu tjita oviṋa ovivi tjinene.”

¹⁴ Epsalme 15:​4, NWT, ri tja epanga ra Jehova ri “pirukira omundu ngamwa auhe ngu tjita oviṋa ovivi tjinene.” Omomuano uṋe mu matu yenene okutjiwa kutja omundu u tjita oviṋa ovivi tjinene? Otjovandu mbe he ri ohomonena, eṱe kamaatu yenene okutjiwa kutja omundu u tjita oviṋa ovivi tjinene poo indee. Omena raye? Mena rokutja mape ya atu suvere ovandu mbu matu munu kutja oupupu okuungura pu na wo, posi ya atu ha vanga okukara pu novandu varwe mena rokutja ve tjita oviṋa mbi tu ha vanga. Ku nao, eṱe matu sokupirukira imba mbe ritjinda momuano Jehova mbwe tja ‘omuvi tjinene.’ (1 Kor. 5:11) Imbi mavi kamburire mo imba mbe tjitira owina oviṋa ovivi, mbe ha raisa ondengero koviṋa mbi tu kambura mo, poo mbe kondja okungundiparisa oupanga wetu ku na Jehova.—Omiano 13:20.

15. Omomuano uṋe umwe mu matu yozike “imba mbe nonḓuviro ku Muhona”?

¹⁵ Okuzambo, Epsalme 15:4 ri tu ningira okuyozika “imba mbe nonḓuviro ku Muhona.” Ku nao, eṱe tu paha omiano vyokuraisa ouwa nondengero komapanga wa Jehova. (Rom. 12:10) Omomuano uṋe? Omuano umwe otja kEpsalme 15:​4, owombwi wokutja omuyenda mondanda ya Jehova “aruhe u yenenisa omakwizikiro we, nandarire kutja owo omazeu.” Okuhinokuṱakamisa omakwizikiro wetu ku hihamisa varwe. (Mat. 5:37) Otjotjihorera, Jehova u undjira ko kutja ovakupasane ve ṱakamise omakwizikiro ngu va tjita indu tji va kupasana. Eye wina u tjaterwa indu ovanene tji mave kondjo oukukutu okuṱakamisa omakwizikiro ngu ve tjita kovanatje vawo. Mena rokutja twa suvera Mukuru novandu varwe, eṱe matu kondjo pu matu yenene okuṱakamisa omakwizikiro wetu.

16. Omomuano uṋe warwe mu matu yozike omapanga wa Jehova?

¹⁶ Omuano warwe wokuyozika omapanga wa Mukuru omokuveraisira ouharupu nokuvesekirisa. (Rom. 12:13) Okukara pu novakambure ovakwetu potuveze twarwe tu tu he ri ozombongarero zombongo poo otjiungura tjokuzuvarisa, ku tu vatera okukurisa oupanga wetu ku na wo na Jehova. Kombanda yanao, indu tji matu sekirisa varwe tu horera ku Jehova.

O SUVERE OVIMARIVA

17. Ongwaye Epsalme 15 tji ri hungira ohunga novimariva?

¹⁷ Omuyenda wa Jehova ka ‘yazemisa ovimariva vye kutja ma munine po ovihohe, nu ka kambura oviyandjewa vyombopero kutja a kuminine po omuhinandjo.’ (Eps. 15:5) Ongwaye Epsalme ndi tji mari hungire ohunga novimariva? Mena rokutja okusuvera ovimariva mape ya a ku rire otjiṋa otjinanḓengu tjinene kweṱe okukapita ovandu, nu nandarire okukapita Mukuru. (1 Tim. 6:10) Moruveze orukuru, tjiva aave tjindi ovakambure ovakwao mba ri ovasyona momuano omuvi, mokutjita kutja ve sute ovimariva ovingi okukapita imbi mbi va yazema. Wina ovapangure tjiva aave yakura otjimariva tjombopero, nu okuzambo ave pangura ovehinandjo momuano mbu he ri omusemba. Ovitjitwa  otja imbyo oviyaukise komurungu wa Jehova.—Esek. 22:12.

18. Omapuriro yeṋe ngu maye tu vatere okutjiwa kutja tu noumune uṋe ohunga novimariva? (Ovaheberi 13:5)

¹⁸ Onawa okuripura oveni ohunga noumune wetu indu tji kwe ya kovimariva. Ripura omuini kutja: ‘Hapo potuingi mbi ripura ohunga novimariva noviṋa mbi me yenene okuranda na vyo? Indu tji mba yazema ovimariva, hapo mbi toora orure okuyarura mena rokumuna kutja omundu ku mba yazema ke nokuvihepa? Hapo okukara novimariva ku tjita kutja mbi rimune kutja owami omunanḓengu pu varwe, nu ku tjita kutja irire ouzeu kwami okurira omuharupu ku varwe? Hapo mbi muna kutja indu omukambure omukwetu tje novimariva ovingi omena rokutja wa suvera ovimariva kombanda ya Jehova? Hapo mbi vanga okukara pu na imba ovatumbe uriri nu ka womba ovasyona?’ Ounanḓengu okuripura omapuriro nga, mena rokutja twa pewa ondjingonekero yapeke yokurira ovayenda va Jehova. Posi ya eṱe matu yenene okukayenda komurungu okurira ovayenda va Jehova, indu tji twa kondjo kutja atu ha suvere ovimariva. Indu tji twa tjiti nao, Jehova kamaa roro okutwesa.—Lesa Ovaheberi 13:5.

JEHOVA WA SUVERA OMAPANGA WE

19. Ongwaye Jehova tje vanga kutja tu tjite oviṋa avihe mbya tamunwa mEpsalme 15?

¹⁹ Epsalme 15 ri yanda nomakwizikiro nga: “Ngwa tjiti oviṋa mbi kamaa yaraara ko nga aruhe.” (Eps. 15:5) Imba omutjange wEpsalme ma kahurura kutja ongwaye Jehova tje vanga kutja tu tjite oviṋa avihe mbya tamunwa mEpsalme ndi. Omena rokutja Jehova u vanga kutja tu kare nondjoroka. Ku nao, eye u tu pa omuhunga mbu mau tu etere ouwa nokututjevera.—Jes. 48:17.

20. Ovayenda va Jehova ve nomaundjiro waye?

²⁰ Ovayenda va Jehova mave yenene okukara nomaundjiro woruyaveze oruwa. Imba mba twirisiwa mave kahupa meyuru Jesus ke ve ṱunina oruveze. (Joh. 14:2) Imba mbu mave kahupa kombanda yehi ve nomaundjiro womakwizikiro nge ri mOmavandururiro 21:3. Tjiri, ondjingonekero onene kutja Jehova u vanga kutja tu rire ovayenda mondanda ye nga aruhe.