1. Ovikwaye mbi vatera ovakarere va Jehova okukayenda komurungu okurikotamena ku ye nandarire kutja ve muna omauzeu?

 OMBEIBELA i tja tu hupa ‘motuveze otuzeu’ tjinene. (2 Tim. 3:1) Ovakarere va Jehova ve muna omauzeu ovandu avehe ngu ve muna mouye wa Satan ourunde mbwi. Posi ya wina ve tatumisiwa mena rokutja ve rikotamena ku Jehova. Ovikwaye mbi ve vatera okukayenda komurungu okukarera Jehova nandarire kutja owo ve muna omauzeu? Omena rokutja owo ve muna ombatero ya Jehova, nu ve tjiwa kutja eye ‘oNdjambi Omunamuinyo.’—Jer. 10:10; 2 Tim. 1:12.

2. Ovikwaye mbi matu tjiwa ohunga na Jehova mbi mavi yenene okutupa omasa?

² Jehova u muna omauzeu ayehe ngu tu muna, nu eye aruhe u vanga okutuvatera. (2 Ekuruh. 16:9; Eps. 23:4) Indu tji matu zemburuka kutja Jehova u rikendera eṱe nu aruhe u vanga okutuvatera, matu yenene okutuurunga omauzeu ngamwa ayehe ngu matu munu. Tara kotjihorera tjOmbara David.

3. David aa hee tjike indu tja tja “Muhona u nomuinyo”?

³ David aa tjiwa Jehova nu ee riyameke ku ye. Indu Ombara Saul na varwe tjaave kondjo okuzepa David, eye wa kumba ku Jehova okumuvatera. (Eps. 18:6) Mukuru tja za nokuzira ongumbiro ye nokumuyama, David wa tja: “Muhona u nomuinyo!” (Eps. 18:46) David aa hee tjike? David wa raisa kutja Jehova oMukuru watjiri, ngu yenena okuvatera ovakarere ve aruhe. David aa tjiwa kutja Mukuru aa munu imbi mbi mavi tjitwa ku ye, nu ma yenene okumuvatera. Iho tje mu tunduuza okukayenda komurungu okukarera Jehova nokumutanga.—Eps. 18:​28, 29, 49.

4. Tu muna ouwa waye indu tji matu vara Jehova otja Mukuru omunamuinyo?

⁴ Indu tji tu nongamburiro kutja Jehova oMukuru omunamuinyo,  maku yenene okutuvatera okumukarera noupyuke. Matu kara nomasa okutuurunga omauzeu, nokukara nonḓero okukayenda komurungu okuungura oukukutu motjiungura tje. Eṱe wina tu rimanena okukara popezu na Jehova.

MUKURU OMUNAMUINYO ME KUPE OMASA

5. Otjikwaye tji matji tu pe ongamburiro indu tji matu munu omauzeu? (Ovafilipi 2:13)

⁵ Eṱe matu yenene okutuurunga omauzeu omanene poo omaṱiṱi, indu tji matu zemburuka kutja Jehova u nomuinyo nu aruhe me tu vatere. Eye ma yenene okutuvatera nouzeu ngamwa mena rokutja kape nouzeu mbu ri ounene ku Mukuru wetu. Eye Omunamasaayehe, nu ma yenene okutupa omasa kutja tu panḓere po. (Lesa Ovafilipi 2:13.) Ihi tji tu pa omasa indu tji matu munu omauzeu. Nu indu tji matu munu kutja Jehova u tu vatera nomauzeu wetu omaṱiṱi, wina ku tu pa ongamburiro kutja Jehova me tu vatere momauzeu wetu omanene.

6. Ovikwaye mbya tjitwa ku David indu tja ri omutanda mbye mu vatera kutja ma kare nongamburiro onyingi mu Jehova?

⁶ Tara koviṋa vivari mbya tjitwa ku David, mbye mu vatera kutja me kurise ongamburiro ye mu Jehova. Indu David tja ri omurise omutanda, ongu nongeyama vya hakana imwe yozonḓu za ihe. Povikando aviyevari, David wa rambera ovipuka mbyo nouvanḓe na yama ozonḓu. Posi ya David ke na we rimuna kutja wa tjita nao momasa we omuini. Eye aa tjiwa kutja Jehova we mu pa omasa okutjita nao. (1 Sam. 17:​34-37) David ke na pa zemba ovitjitwa mbyo. Okuripurira oukoto koviṋa mbi, kwe mu pa ongamburiro yokutja Mukuru omunamuinyo me mu pe omasa moruyaveze.

7. David ee ripurire ku ye, nu omena raye otjiṋa ho tji tje mu vatera okurwisa Goliat?

⁷ Kombunda, indu David tja ri omutanda, eye wa kavarura ondanda yovarwe vovita vOvaisrael. Eye wa kavaza ovarwe vovita aa va uruma mena rokutja Omufilisti wena Goliat we ya ‘okutoka Ovaisrael mba kuramene moruteto.’ (1 Sam. 17:​10, 11) Ovarwe vovita vOvaisrael aave tira mena rokutja aave yandja ombango komuano Goliat me kurire na komambo nge ve hungire. (1 Sam. 17:​24, 25) Posi ya David, aa yandja ombango kotjiṋa tjarwe. David aa tjiwa kutja indu Goliat tja toko otjimbumba tjovarwe vovita vOvaisrael, eye aa toko “otjimbumba tjovita tjaNdjambi Omunamuinyo.” (1 Sam. 17:26) David ee ripura ohunga na Jehova. Eye wa ri nongamburiro yokutja Mukuru ngwe mu vatera indu tja ri omurise, me mu vatere rukwao otjikando hi. Nombatero ya Mukuru, David wa rwisa Goliat na taara.—1 Sam. 17:​45-51.

8. Otjikwaye tji matji yenene okukurisa ongamburiro yetu kutja Jehova me tu vatere? (Wina tara kotjiperendero.)

⁸ Eṱe wina matu yenene okutuurunga omauzeu nondoṋeno, indu tji matu zemburuka kutja Mukuru omunamuinyo me tu vatere. (Eps. 118:6) Eṱe matu yenene okukurisa ongamburiro yetu kutja Jehova me tu vatere, indu tji matu ripurire koviṋa eye mbya tjita morukapitaveze. Lesa omahungi mOmbeibela ngu maye ku zemburukisa omuano Jehova ma yama ovakarere ve. (Jes. 37:​17, 33-37) Wina tarera poo lesa ondjivisiro morungovi rwetu jw.org ndji mai raisa omuano Jehova me vatera ovakambure ovakwetu ndino. Kombanda yanao, ripurira kovikando Jehova me ku vatera. Ove mape ya o munu kutja Jehova ke na pe ku tjitira otjiṋa otjihimise, tjimuna okukuyama kongeyama poo kongu. Ouatjiri owombwi wokutja Jehova we  ku tjitira oviṋa ovingi mehupo roye. Jehova we ku ṋanga okurira epanga re. (Joh. 6:44) Nandarire nai, ove u kayenda komurungu okumukarera mena rombatero ye. Ku nao, ningira Jehova okukuvatera okuzemburuka ovikando eye ma zira ozongumbiro zoye, me ku pa oviṋa mbyo hepa moruveze ndu ri ro, poo me ku vatera moruveze rwouzeu. Okuripurira koviṋa mbyo maku kurisa ongamburiro yoye, kutja Jehova ma kayenda komurungu okukuvatera.

9. Matu sokuzemburuka tjike indu tji tu ri momauzeu? (Omiano 27:11)

⁹ Okuvara Jehova otjOmundu omunamuinyo maku tu vatere okukara noumune ouwa ohunga nomauzeu wetu. Omomuano uṋe? Eṱe matu utu okumuna kutja omauzeu wetu orupa rwombata onene pokati ka Jehova na Satan. Omudiaboli u tja indu tji matu munu omazeu, eṱe matu isa Jehova. (Job 1:​10, 11; lesa Omiano 27:11.) Indu tji matu kayenda komurungu okurira ovaṱakame ku Jehova nandarire kehi yomauzeu ngu tu muna, tu raisa orusuvero rwetu ku Jehova nokutja Omudiaboli omunavizeze. Hapo u muna omapirukiro okuza kohoromende, u nouzeu wotjimariva, ovandu ku u zuvarisa kave nonḓero mombuze ombwa, poo u nouzeu warwe kaaṋi? Indu tji pe ri nao, zemburuka kutja ongaro mu u ri mai ku pe oruveze rwokuyorokisa omutima wa Jehova. Wina zemburuka kutja eye ke nokukutarera amo rorwa okukapita omasa woye. (1 Kor. 10:13) Eye me ku pe omasa kutja u kare nonḓaro orure.

MUKURU OMUNAMUINYO ME KU PE ONDJAMBI

10. Ovikwaye Mukuru omunamuinyo mbi ma katjitira imba mbe rikotamena ku ye?

¹⁰ Jehova u yandja ondjambi ku imba mbe rikotamena ku ye. (Hebr. 11:6) Eye u tu pa ohange nondjoroka nai, nu me ke tu pa omuinyo waaruhe moruyaveze. Eṱe tu nongamburiro kutja Jehova u vanga okutupa ondjambi, nu u nomasa wokutjita nao. Nu mena ranao, eṱe tu kayenda komurungu okurikotamena ku ye otja pu matu yenene, tjimuna ovakarere  ve tjaave tjiti morukapitaveze. Imbyo ooviṋa Timoteus mbyaa tjita meserewondo etanga.—Hebr. 6:​10-12.

11. Omena raye Timoteus tjaa ungura oukukutu mombongo? (1 Timoteus 4:10)

¹¹ Lesa 1 Timoteus 4:10. Timoteus wa ri nongamburiro yomasa kutja Mukuru me mu pe ondjambi. Ku nao, eye opaa zokuungurira Jehova novandu varwe oukukutu. Omomiano viṋe? Omuapostele Paulus we mu tunduuza okurira omuhonge omuwa motjiungura tjokuzuvarisa na mombongo. Paulus wina we mu raera kutja nga rire otjihorera otjiwa kovakambure ovakwao omitanda, na imba ovanene motjiwondo. Nu eye wa perwe oviungura ovizeu mbya vi kamburire mo okuvyura ovandu norusuvero. (1 Tim. 4:​11-16; 2 Tim. 4:​1-5) Povikando tjiva, varwe kaave munu oviungura Timoteus mbya ungura poo kaave raisa ondangi ku ye. Posi ya, eye wa ri nongamburiro kutja Jehova me mu pe ondjambi.—Rom. 2:​6, 7.

12. Omena raye ovanene vombongo tji ve kayenda komurungu okuungura oukukutu mombongo? (Wina tara kotjiperendero.)

¹² Ovanene vombongo ndino, ve yenena okukara nongamburiro kutja Jehova u muna nokuvara oviungura vyawo oviwa. Ovanene vombongo ovengi ve vatera moviungura vyokutunga na indu tji pa tjitwa oviwonga, nandarire ngunda ave noviungura varwe tjimuna okuvarura ouṋepo wombongo, okuhonga, nokuzuvarisa. Varwe ve vatera mOzokomiti zomapangero (HLC) poo okukavarura ovavere. Ovanene vombongo ve tjiwa kutja ombongo oya Jehova nungwari ka yomundu kaaṋi. Mena ranao, owo ve ungura oukukutu mombongo nu ve nongamburiro okuura kutja Mukuru ma sere ondaya koviungura vyawo.—Kol. 3:​23, 24.

13. Hapo Jehova u noumune uṋe ohunga noviṋa mbi tu mu ungurira?

¹³ Kamundu auhe ngu ma yenene okurira omunene wombongo. Posi ya eṱe atuhe matu  yenene okuyandja otjiṋa ku Jehova. Mukuru u kara nonyuṋe indu tji matu mu karere otja pu matu yenene. Eye u muna indu tji matu yandja oviyandjewa vyouharupu koviungura vyouye auhe, nandarire indu tji tu hi nokuyenena okuyandja ovingi. Eye u kara nondjoroka indu tji matu yere omake okuzira pozombongarero zombongo, nandarire kutja matu ṱohoṋi, na indu tji matu isire varwe mbe tu hihamisa. Indu tji u muna kutja imbi mbi ungurira Jehova kavi ya yenena, kara nongamburiro kutja eye u nohange na imbi mbi u mu tjitira. Eye we ku suvera nu me ku sere ondaya.—Luk. 21:​1-4.

KARA POPEZU NA MUKURU OMUNAMUINYO

14. Hapo okukara noupanga wopopezu ku na Jehova ku tu vatera vi okurira ovaṱakame? (Wina tara kotjiperendero.)

¹⁴ Indu tji tu noupanga wopopezu ku na Jehova, mai rire oupupu ku eṱe okurira ovaṱakame ku ye. Nu Josef wa ri mongaro otja indjo wina. Eye wa panḓa okutjita orukatuko, mena rokutja wa ri noupanga wopopezu ku na Mukuru nu kaa vanga okumuhihamisa. (Gen. 39:9) Kutja tu kare noupanga ouwa ku na Jehova, eṱe matu hepa okukumba nokukonḓonona Embo re. Oupanga wetu ku na Jehova otji mau kurire ko. Tjimuna Josef, indu tji tu noupanga wopopezu ku na Jehova, eṱe kamaatu vanga okutjita otjiṋa tji matji mu hihamisa.—Jak. 4:8.

15. Matu rihongo ye okuza ku imbi mbya tjitwa kOvaisrael mokuti onguza? (Ovaheberi 3:12)

¹⁵ Imba mbe isa okukara nongamburiro mu Jehova, i rira oupupu ku wo okuhinokurira ovaṱakame ku ye. Tara ku imbi mbya tjitwa kOvaisrael indu tji va ri mokuti onguza. Owo aave tjiwa kutja Jehova okeri, posi ya va uta okukeyakeya kutja Jehova me ve pe imbi mbi mave hepa. Nandarire owo va pura kutja: “Hapo, Muhona u ri mokati ketu poo indee?” (Eks. 17:​2, 7) Mena ranao owo va pirukira Mukuru. Tjiri eṱe katu nokuvanga okuhorera kotjihorera tjawo otjivi ho.—Lesa Ovaheberi 3:12.

16. Ovikwaye mbi mape ya avi roro ongamburiro yetu?

 ¹⁶ Ouye u tjita kutja i rire ouzeu kweṱe okukara noupanga wopopezu ku na Jehova. Ovengi ve tja Mukuru ke ko. Potuingi, imba mbe ha kongorere omirari vya Mukuru ve munika aayo ve nehupo ewa. Indu tji matu munu oviṋa mbyo amavi tjitwa, ongamburiro yetu i rorwa. Nandarire kutja matu tjiwa kutja Mukuru okeri, eṱe mape ya atu utu okukeyakeya kutja me tu vatere. Omutjange wEpsalme 73 wa ri noumune otja imbo. Eye aa munu imba mba ri ongondoroka na ye mbe hi na aave puratene komatwako wa Mukuru kutja va ri nehupo ewa. Ku nao, eye wa uta okuripura kutja hapo ohepero okukarera Mukuru.—Eps. 73:​11-13.

17. Ovikwaye mbi mavi tu vatere okukara noupanga wopopezu na Jehova?

¹⁷ Ovikwaye mbya vatera omutjange wEpsalme okurundurura oumune we? Eye we ripurira koviṋa mbi mavi tjitwa ku imba mbe isa okukara nongamburiro mu Jehova. (Eps. 73:​18, 19, 27) Eye wina we ripurira kouwa mbu za mokukarera Mukuru. (Eps. 73:24) Eṱe wina matu yenene okuripurira komuano Jehova me tu sera ozondaya. Ripura kutja ehupo retu atja ri kara vi andakuzu katu karere Jehova. Indu tji twa zemburuka kutja okukarera Jehova ku tu etera ouwa, maku tu vatere okurira ovaṱakame ku ye. Tjimuna omutjange wepsalme eṱe matu yenene okutja: “Ku ami okokuwa okukara popezu na Ndjambi.”—Eps. 73:28.

18. Omena raye tji tu ha sokutira oviṋa mbi mavi katjitwa moruyaveze?

¹⁸ Eṱe tu yenena okutuurunga omauzeu ngamwa ngu matu munu momayuva omasenina nga, mena rokutja tu “karera Ndjambi omunamuinyo nowouatjiri.” (1 Tes. 1:9) Mukuru u rikendera kweṱe nu aruhe me tu vatere. Eye wa ri pu novakarere ve voruveze orukuru, nu wina u ri pu na eṱe ndino. Moruyaveze rwopopezu, ozombamisiro ozonene maze utu kombanda yehi. Posi ya kaweṱe atuyerike, Jehova u ri pu na eṱe. (Jes. 41:10) “Eṱe otji matu sora okutja nai nomutima omupandi: ‘Muhona Eye omuvatere wandje, nu hi nokutira ko.’”—Hebr. 13:​5, 6.